ပှၤအါဂၤအသးစဲဒိၣ်အါဝဲလၢ ဆၣ်ဧိၤဖီဧိၤတလးပီညါ (astrology) လၢအဃုမၤလိနၢ်ပၢၢ် ဆၣ်, မူဖျၢၣ်တဖၣ် အတၢ်အိၣ်အသးမၤအသးတဖၣ် ဒီးပှၤနာ်ဝဲဒၣ်လၢ တၢ်သ့ၣ်တဖၣ်အံၤ ဒိၣ်စိလုၣ်ဘၢ ပှၤကညီတဖၣ် အတၢ်ဟဲဝံန့ၣ်လီၤ. ပှၤကညီလၢအကကွဲၢ်တဖၣ်, လီၤဆီဒၣ် ပှၤသးစၢ်စိၤစဲၤသွဲၣ်ဖိတဖၣ် ကိးလါဒဲးန့ၣ်, နုာ်လီၤကွၢ်ဝဲဒၣ် တၢ်ထိၣ်ဒွးဆၣ်ဧိၤဖီဧိၤအိၣ်တၢ်အလီၢ်အကျဲ, ဖဲပှၤတဂၤအိၣ်ဖျဲၣ်အကတီၢ်, ဒ်သိးဒီးကသ့ၣ်ညါဝဲ ခါဆူညါတၢ်ကမၤအသးဒီးအီၤအဂီၢ်န့ၣ်လီၤ. ပှၤကတိၤနံၤဝဲ Mercury မူဖျၢၣ် က့ၤတရံးအသးဆူ တၢ်လီၢ်ခံအဂ့ၢ်, တၢ်ထိၣ်သတြီၤ zodiac အတၢ်ပနီၣ်တဖၣ်လၢ ဆၣ်ဖိကီၢ်ဖိဒီးပှၤဂဲၤဒိ တၢ်ဂီၤမူတဖၣ် ဒီးပှၤအဲၣ်ဒိးသ့ၣ်ညါ ခါဆူညါတၢ်ကမၤအသးဒီးအဝဲသ့ၣ်အဂီၢ်န့ၣ် နုာ်လီၤဖးကွၢ်ဝဲ တၢ်ကွဲးတဖၣ် လၢပှၤတဲဆိပာ် မူခိၣ်ကလံၤသီၣ်ဂီၤအဂ့ၢ်တဖၣ်န့ၣ်လီၤ. အဂ့ၢ်ဒ်အံၤ, အဝဲသ့ၣ် မုၢ်လၢ်ကွၢ်စိဝဲလၢ ဆၣ်ဧိၤဖီဧိၤ အတၢ်အိၣ်အသးတဖၣ်န့ၣ် ကကဲထီၣ်တၢ်မၤစၢၤလၢ အဝဲသ့ၣ်ကဘှါဆှဲ အတၢ်ဂ့ၢ်ကီတဖၣ် (မ့) ကပာ်ဖျါဆိ ခါဆူညါအတၢ်ဟဲဝံတဖၣ်န့ၣ်လီၤ. ဘၣ်ဆၣ်, တၢ်စံးဆၢတဖၣ်အဂီၢ်န့ၣ် ပကွၢ်ထီၣ်ဆူ မူကပိာ်လိၤ, ဒီးပသးပ့ၤနီၣ် ပှၤလၢအတ့လီၤပာ်လီၤ ဆၣ်ဧိၤဖီဧိၤတဖၣ်န့ၣ်လီၤ.
၅ မိၤရှ့ ၄:၁၉ အပူၤန့ၣ် စီၤမိၤရှ့ ဟ့ၣ်ပလီၢ် ပှၤအံၣ်စရ့လးဖိတဖၣ်လၢ “ဒီးနကကျ့ထီၣ်ဘၣ်ဖုး နမဲာ်ဆူမူခိၣ်, ဒီးနထံၣ်ဘၣ် မုၢ်, ဒီးလါ, ဒီးဆၣ်ဧိၤဖီဧိၤ, …, ဒီးနကဘၣ်တၢ်ကလံာ်ဘၣ်ဖုးနၤ, ဒ်သိးနကဘါထီၣ်အီၤဒီးမၤအတၢ် ” န့ၣ်လီၤ. တၢ်ဟ့ၣ်ပလီၢ်တဘျီအံၤ ဘၣ်တၢ်မၤအီၤဖဲ တၢ်ဒုးသ့ၣ်နီၣ်မၤသီထီၣ် ကစၢ်ယွၤ မၤဝဲ တၢ်အၢၣ်လီၤအီလီၤ, လၢအတၢ်ရ့လိာ်ဘၣ်ထွဲလိာ်သးလီၤလီၤဆီဆီဒီးပှၤအံၣ်စရ့လးဖိတဖၣ် (:၂၃) အကတီၢ်န့ၣ်လီၤ. တချုးလၢ ပှၤအံၣ်စရ့လးဖိတဖၣ် နုာ်လီၤအိၣ်ဆိးဝဲဒၣ်လၢ ကီၢ်တၢ်စံးပာ်အပူၤ (ကွၢ် ၅ မိၤ ၃၁) န့ၣ် အဝဲသ့ၣ် နၢ်ဟူဝဲဒၣ် “ယွၤကတိၤတၢ်” (:၁၂) လၢကစၢၢ်စံၤနါန့ၣ်လီၤ. ဒီးဒိးန့ၢ်ဝဲ “တၢ်မၤလိာ်, ဒီးတၢ်စံၣ်ညီၣ်တဖၣ်” (:၁၄) န့ၣ်လီၤ. ကစၢ်ယွၤ ဒုးသ့ၣ်နီၣ် အပှၤဂီၢ်မုၢ်လၢ အဝဲတ့လီၤပာ်လီၤဝဲ ဆၣ်ဧိၤဖီဧိၤ, ဒီးမူဖျၢၣ်တဖၣ်လၢ မူကပိာ်လိၤန့ၣ် ဒ်သိးကယဲၢ်ပှၤကလုာ်တဖၣ်ခဲလၢာ် ကထံၣ်ဘၣ်ဝဲအဂီၢ်, ဒီးတမ့ၢ် ကဘါထီၣ်ဝဲအဂီၢ်ဘၣ်. တၢ်ဘါတၢ်ဂီၤတၢ်ဖီၣ်န့ၣ် မ့ၢ်တၢ်ကဲကုၢ်အတၢ်မၤအဂ့ၢ်န့ၣ် လံာ်စီဆှံ ပာ်ဖျါထီၣ်ဝဲဒၣ် လီၤတံၢ်လီၤဆဲးန့ၣ်လီၤ. ထဲဒၣ် ကစၢ်ယွၤတဂၤဧိၤ, ဒုးနဲၣ်ဖျါထီၣ် တၢ်မ့ၢ်တၢ်တီ, ဒီးပၢဆှၢနဲၣ်လိၤ ပှၤကညီအတၢ်စံၣ်စိၤတဲစိၤ, ဒီးတမ့ၢ်ဆၣ်ဧိၤဖီဧိၤတဖၣ်ဘၣ်.
ဒ်ပှၤတနီၤနီၤမၤတ့ၢ်ဝဲအသိး, တၢ်ဃုသ့ၣ်ညါ ခါဆူညါတၢ်ကမၤအသးဒီးအဝဲသ့ၣ်အဂ့ၢ်, လၢအလီၢ်န့ၣ် မ်ပကဃု “ယွၤပကစၢ်” န့ၣ်တက့ၢ်. ထဲကစၢ်ယွၤတဂၤဧိၤန့ၣ် ဟ့ၣ်လီၤပှၤ တၢ်ကူၣ်သ့, တၢ်နဲၣ်ကျဲ, ဒီးတၢ်ဘံၣ်တၢ်ဘၢတဖၣ်, တၢ်လၢပဆၢမိၣ်န့ၢ်ဝဲတဖၣ်န့ၣ်လီၤ.
