လၢ ဝ့ၢ် အဲးတလဲ(န)တ့း (Atlantic) Boardwalk အဘျီၣ်ရိဖှိၣ်အပူၤန့ၣ် မ့း(ဒ)မၣ်-လိး(ၡ) (Midmer-losh) ပီၤဘိ-တနၢ်ယီၢ်ပှီၢ်, (pipe organ) န့ၣ် ပှၤပာ်ပနီၣ်အီၤ, ဒ်တၢ်သံကျံအပိးလီအဒိၣ်ကတၢၢ်, ဒီးအကလုၢ်သီၣ် အဒိၣ်ကတၢၢ်တခါ လၢအဘၣ်တၢ်တ့ဒုးအိၣ်ထီၣ်အီၤန့ၣ်လီၤ. တနၢ်ယီၢ်ပှီၢ် အပီၤဘိတဖၣ်န့ၣ် အိၣ်ဝဲဒၣ် ၃၃၀၀၀ ဘျဲၣ်, ဒီးထုးထီၣ်န့ၢ်ဝဲတၢ်သံကျံအကလုၢ် ပှဲၤသိးသိးလိာ်အသးဒီး တၢ်ဒ့တၢ်အူအကရူၢ်ဖးဒိၣ် ၁၂ ကရူၢ်န့ၣ်လီၤ. လၢဟီၣ်ခိၣ်ဒီဘ့ၣ် တနၢ်ယီၢ်ပှီၢ်ဖးဒိၣ်ခံဖျၢၣ်, လၢအကလုၢ်သီၣ်အပတီၢ် အဖုၣ်ကတၢၢ်အကျါတဖျၢၣ်, တုၤဒၣ်လဲာ်, ပှၤကညီနၢ်ဟူတန့ၢ်တသ့ဝဲဘၣ်န့ၣ်လီၤ. ဖဲပှၤဒ့တနၢ်ယီၢ်ပှီၢ်ဖးဒိၣ်အံၤအကတီၢ်န့ၣ် ပှၤဒိကနၣ်တၢ်ဖိတဖၣ် ပာ်ဖျါထီၣ်ဝဲဒၣ်လၢ အဝဲသ့ၣ်တူၢ်ဘၣ်ဝဲဒၣ် ဒ်တၢ်ဟဲတရုၤမၤဟူးဝးအသးနါပှၢ်, လီၤဂာ်ဒီးကဘီယူၤရံး ဟဲယူၤဝဲဒၣ်လၢ အဝဲသ့ၣ်အဖီခိၣ်အသိးန့ၣ်လီၤ.

တနၢ်ယီၢ်ပှီၢ်ဖးဒိၣ် လၢအကလုၢ်သီၣ် လီၤကမၢကမၣ်ဝဲန့ၣ် ပမ့ၢ်ထိၣ်သတြီၤအီၤဒီးကစၢ်ယွၤ အကလုၢ်, လၢအသီၣ်မုာ်ဝဲအဒိၣ်ကတၢၢ်န့ၣ်ဒီး, ကမ့ၢ်ဝဲဒၣ် တၢ်အကဒုဖိတမံၤန့ၣ်လီၤ. လံာ်ယိၤဘး ပာ်ဖျါထီၣ်ဝဲ ကစၢ်ယွၤ အကလုၢ်န့ၣ် လၢတၢ်လီၤလိၢ်လီၤလး, ဃုာ်ဒီး, လၢတၢ်လီၤပျံၤလီၤဖုး, ခံမံၤလိာ်အပူၤအါစုအါဘျီန့ၣ်လီၤ. စီၤယိၤဘး အတံၤသကိး, စီၤအလံဟူၤ ထိၣ်သတြီၤပာ်ဖျါဝဲ ကစၢ်ယွၤအကလုၢ်န့ၣ် “ပျၢ်ဝဲလၢမူခိၣ် ဒီဘ့ၣ်ညါအဖီလာ်, ဒီးအတၢ်ကပီၤဆူ ဟီၣ်ခိၣ်အကတၢၢ်လီၤ. လၢအလီၢ်ခံန့ၣ် တၢ်သီၣ်ထီၣ်, ဒုးလီသီၣ်ထီၣ် လၢအကလုၢ်ကညီၢ်” (၃၇:၃-၄), စီၤအလံဟူၤ စံးဝဲဒၣ် “ယွၤဒုးလီသီၣ်လၢအကလုၢ်လီၤလး, မၤတၢ် အဒိၣ်အထီတဖၣ် လၢပနၢ်တပၢၢ်ဘၣ်” (:၅) န့ၣ်လီၤ. တၢ်အကလုၢ်လၢ အစိကမီၤဒိၣ်, ဒီးအသဟီၣ်ဆူၣ်န့ၣ် ဆဲးကပီၤပာ်ဖျါဝဲ ကစၢ်ယွၤအကံၢ်စီအတၢ်ကဟုကညီၢ်, ဒိၣ်န့ၢ်ဂ့ၤန့ၢ်ဒံး ပတၢ်သ့ၣ်ညါနၢ်ပၢၢ်တၢ်တဖၣ်န့ၣ်လီၤ.

လၢပသးသမူဒီတစိၤ, ကစၢ်ယွၤ အကလုၢ်သီၣ်ဝဲဒၣ်န့ၣ် တမ့ၢ်ပကနၢ်ဟူဘၣ်လၢပနၢ်တီတီဘၣ်. ဘၣ်ဆၣ်, ကစၢ်ယွၤအကလုၢ်, အတၢ်မ့ၢ်တၢ်တီ, လၢအစိကမီၤဒိၣ်န့ၣ် ပဖးအီၤ သ့ဝဲဒၣ် လၢလံာ်စီဆှံအပူၤ, ဒီးပကထံၣ်ဘၣ် ယွၤအကလုၢ်န့ၣ် ဘၣ်တၢ်အိၣ်မူဒုးနဲၣ်ဖျါထီၣ်အီၤလၢ ကစၢ်ယ့ၣ်ရှူး, လၢအမ့ၢ် ယွၤအကလုၢ်လၢအမူတဂၤ အသးသမူအပူၤန့ၣ်လီၤ. ပမ့ၢ်ဒိကနၣ် “တၢ်အကလုၢ် လၢအသီၣ်” အံၤ လၢတၢ်သူၣ်အိၣ်သးအိၣ်အပူၤန့ၣ်ဒီး, ကဆီတလဲမၤဂ့ၤထီၣ်က့ၤ ပသးသမူန့ၣ်လီၤ.