ခီပနံၣ်လၢ ယနုၥ်လီၤမၤတၢ်သီသီန့ၣ် ရဲၣ်ကျဲၤဝဲ ကမျၢၢ်အတၢ်ထံၣ်မဲာ်ထံၣ်နါစံးကတိၤသကိးတၢ်တဘျီအမူးန့ၣ် ၦၤမၤသကိးတၢ်ဖိကိးဂၤဒဲး အိၣ်ဒီးမူဒါ, ဒ်ၦၤတူၢ်လိၥ်တၢ်ဖိတဖၣ်, ဒီးၦၤဆှၢထီၣ်ဆှၢလီၤတၢ်ဖိတဖၣ်န့ၣ်လီၤ. တၢ်ရဲၣ်တၢ်ကျဲၤအံၤ မ့ၢ်မူဖးဒိၣ်တခါ, ဒီးဖဲၦၤကိးဂၤဒဲး အတၢ်မၤအါအကတီၢ်, ၦၤသမှံၤတဂၤ မၤလီၤဂၢ်ဘၣ် တၢ်ဆၢထံလၢ လၢၢ်ဘ့ၣ်ဘၣ်တၢ်ဒါအဖီခိၣ်န့ၣ်ဒီး, ၦၤတပာ်သူၣ်ပာ်သးဝဲနီတဂၤဘၣ်န့ၣ်လီၤ. ခီဖျိလၢအသးန့ဆၢၣ်အပူၤန့ၣ် ခီပနံၣ်ခိၣ်နၢ်အကျါတဂၤ, တၢ်မၤလၢအမၤဝဲန့ၣ် ပၥ်တ့ၢ်ဝဲ, ဒီးဖီၣ်ထီၣ်နီၣ်တြူၢ်, ဒီးနုၥ်လီၤမၤစၢၤ တြူၢ်စီကွံာ် တၢ်ဆၢထံလၢအလီၤဂၢ်န့ၣ်လီၤ.

ဒ်ၦၤရဲၣ်ကျဲၤတၢ်ခိၣ်နၢ် လၢအပၢဆှၢကွၢ်ထွဲ မူးဖးဒိၣ်တဂၤအသိး, အဝဲအိၣ်ဒီးတၢ်စိတၢ်ကမီၤလၢ ကမၢဝဲၦၤတဂၤဂၤ ကမၤကဆှီတၢ်အဂီၢ်န့ၣ်လီၤ. ဘၣ်ဆၣ်, ၦၤတနီၤကထံၣ်ဝဲဒၣ် ဒ်တၢ်မၤလၢအပတီၢ်ဖုၣ်တမံၤန့ၣ် အဝဲဃုထၢမၤဝဲအဃိ, ယယူးယီၣ်ပၥ်ကဲအီၤဒိၣ်မးန့ၣ်လီၤ.

တၢ်ဆီၣ်လီၤသးအဂ့ၢ်ယိယိဖိ, ဒ်သိးပကအိၣ်မူပာ်ဖျါထီၣ်အီၤနီၢ်နီၢ်အဂီၢ်န့ၣ် ဖံလံးပံၤ ၂:၃-၄ ပၥ်ဖျါထီၣ်ဝဲ “လၢတၢ်အ့ၣ်လိၥ်ဆိးက့, ဒီးတၢ်ဟူထီသါလီၤကလီကလီန့ၣ်, မၤတၢ်နီတမံၤတဂ့ၤ…., မ်ၦၤပၥ်ၦၤဂၤဂ့ၤန့ၢ်အကစၢ်ဒၣ်ဝဲတက့ၢ်. သုတကွၢ်တဂၤလၢ အတၢ်ဒၣ်ဝဲ, တဂၤလၢအတၢ်ဒၣ်ဝဲတဂ့ၤ” န့ၣ်လီၤ.

တၢ်စံးဆၢမၤဆၢ တၢ်လၢအလိၣ်ဝဲတမံၤအဂီၢ်န့ၣ် ယတၢ်မၤအကစၢ် တကွၢ်ဝဲဒၣ် အလီၢ်အလၤဘၣ်. တၢ်ဆီၣ်လီၤသးနီၢ်နီၢ်စံးတၢ်န့ၣ် တမ့ၢ်တၢ်ဟံးဃာ်ပၢၤဃာ် ပသူးသ့ၣ် ကံၢ်စီအက့ၢ်ဂီၤ, (မ့) ပလီၢ်ပလၤန့ၣ်ဘၣ်. ဘၣ်တဘျီဘျီန့ၣ် တၢ်ဆီၣ်လီၤသး ဟဲဖျါထီၣ်ဝဲ ခီဖျိလၢပတၢ်စံးတၢ်ကတိၤ, (မ့) ပတၢ်ဖံးတၢ်မၤ လၢအဆဲးကပီၤဖျါက့ၤ သးလၢအဟ့ၣ်တၢ်, ဒီးသးလၢအတကွၢ်အကစၢ်ဒၣ်ဝဲအဂီၢ်, ဒီးမၤလၢပှဲၤ ပှၤဂုၤၦၤဂၤအတၢ်လိၣ်တဖၣ်န့ၣ်လီၤ. မ့ၢ်သးလၢအဆဲးကပီၤဖျါက့ၤ ကစၢ်ယ့ၣ်ရှူး, အလီၢ်အလၤမ့ၢ်ဝဲဒၣ် ကစၢ်ယွၤ, “ဘၣ်ဆၣ် ဒီးညိကွံၥ်အလၤအကပီၤ, ဒီးလိၣ်ထီၣ်အသးလၢၦၤကညီ, ဒီးဒိးန့ၢ်ကုၢ်အက့ၢ်အဂီၤ” (:၇) န့ၣ်လီၤ. မ်ပကဃ့ ကစၢ်ယွၤ ဒ်သိးကမၤစၢၤၦၤလၢ ပကပၥ်ၦၤဂၤဂ့ၤန့ၢ်ပနီၢ်ကစၢ်ဒၣ်ဝဲအဂီၢ်, ဒီးဒ်သိးပကလီၤဂၥ်အါထီၣ်ဒီးကစၢ်ခရံၥ်, ပတၢ်ခ့တၢ်ၦၤအကစၢ်န့ၣ်တက့ၢ်.