ဖဲ ဒဲ(န) န့း(စ) (Denis) သူၣ်ထီၣ် တၢ်ဆၢကိၢ်လိၢ် အခီပနံၣ် (Company) လၢတၢ်ဃံးတၢ်စ့ၤအလီၢ်အကျဲ, ဒီးၦၤဘျၢလီၤကျိၣ်စ့လၢ အခီပနံၣ်တဂၤ သံကွၢ်အီၤလၢ ၦၤမၢတၢ်ဖိတဖၣ် ဟးထီၣ်လၢတၢ်ဖံးတၢ်မၤန့ၣ် အမျးကယၤအိၣ်ဝဲဒၣ်ထဲလဲၣ်အဂ့ၢ်န့ၣ်ဒီး, Denis စံးဆၢဝဲဒၣ်လၢ “တအိၣ်နီတဂၤ” ဘၣ်န့ၣ်လီၤ. ၦၤလၢအသံကွၢ်အီၤတဂၤ ကမၢကမၣ်ဝဲန့ၣ်လီၤ. ဘၣ်ဆၣ်, အၦၤတၢ်မၢဖိဟးထီၣ်ဆံးဝဲစှၤဝဲန့ၣ် ပၥ်ဖျါထီၣ် တၢ်မၤလီၢ်လၢ Denis ဒုးအိၣ်ထီၣ်ဝဲဒၣ်န့ၣ် မ့ၢ်တၢ်သူၣ်ကညီၤသးကညီၤအလီၢ်အကျဲ, အဂ့ၢ်ဒ်အံၤ, အဝဲသ့ၣ်ညါ ၦၤမၤတၢ်ဖိကိးဂၤဒဲးအမံၤ, ကိးမုၢ်နံၤဒဲးန့ၣ် တူၢ်လိၥ်မုာ်ဝဲကိးဂၤဒဲး, ဒီးဒ်သိးအပှၤမၤတၢ်ဖိတဖၣ် ကသ့ၣ်ညါဝဲလၢ အတၢ်မၤကစၢ်သ့ၣ်ညါအဝဲသ့ၣ်, ဒီးပာ်လုၢ်ပာ်ပှ့ၤအဝဲသ့ၣ်အဂီၢ်, မၤလီၤတံၢ်ဝဲဒၣ်န့ၣ်လီၤ. အတၢ်မၤလီၢ်န့ၣ် ဒုးကဲထီၣ်တၢ်လီၢ်လၢ “ၦၤကိးဂၤဒဲးန့ၣ် ဘၣ်တၢ်သ့ၣ်ညါနီၣ်, ပၥ်လုၢ်ပာ်ပှ့ၤအဝဲသ့ၣ်, ဒီးဖံးမၤဘၣ်တၢ်ဘံၣ်ဘံၣ်ဘၢဘၢ” န့ၣ်လီၤ.

Denis ဟ့ၣ်လီၤအသး, ဒီးဒုးအိၣ်ထီၣ် တၢ်အဲၣ်တၢ်သးကညီၤ အလီၢ်အကျဲန့ၣ် ဒ်သိးလိၥ်သးဒီးတၢ်အိၣ်ဃူအိၣ်ဖိး, ဒ်ပှၤတၢ်မၢဖိ စီၤပ့းတရူး သဆၣ်ထီၣ် ၦၤစူၢ်နၥ်ကစၢ်ယ့ၣ်ရှူးတဖၣ် ကအိၣ်မူအိၣ်ဂဲၤလၢဟံၣ်လၢဃီ, လၢတၢ်အိၣ်ဖှိၣ်အပူၤ, ဒီးလၢၦၤတဝၢအဂီၢ်, ကွဲးပာ်ဖျါဝဲအသိး “မ်ပှၤခဲလၢၥ်ကဲထီၣ် ပှၤသးတဖျၢၣ်ဃီ, ၦၤဒိးဃုၥ်တၢ်, ၦၤအဲၣ် ဒီပုၢ်ဝဲၢ်, ၦၤသးကညီၤတၢ်, ၦၤဆီၣ်လီၤအသးန့ၣ်တက့ၢ်. လၢတၢ်အၢအဃိန့ၣ်, ဟ့ၣ်ကၣ် တၢ်အၢတဂ့ၤ. လၢတၢ်ဒုၣ်ဒွဲၣ်အဃိန့ၣ်, ဟ့ၣ်ကၣ်တၢ်ဒုၣ်ဒွဲၣ်တဂ့ၤ” (၁ ပ့း ၃:၈-၉) န့ၣ်လီၤ.

တၢ်နဲၣ်လိအံၤ ဘၣ်တၢ်ဆှၢလီၤဝဲဆူ နံၣ်ကယၤတၢ တၢ်အိၣ်ဖှိၣ်ဖိတဖၣ် လၢအအိၣ်လီၤပြံလီၤပြါဝဲလၢ Asia Minor ထံကီၢ်တဖၣ်, ညီနုၢ်ၦၤစူၢ်နၥ် ကစၢ်ယ့ၣ်ရှူးတဖၣ်န့ၣ်ဘၣ်တၢ်မၤအၢမၤနး, ဘၣ်တၢ်ဆီၣ်သနံးတဖၣ်အဂီၢ်န့ၣ်လီၤ. ဘၣ်ဆၣ်, ကစံးဆၢမၤဆၢက့ၤတၢ်အဂီၢ်န့ၣ် စီၤပ့းတရူး စံးဝဲဒၣ် “လၢတၢ်ဒုၣ်ဒွဲၣ်အဃိန့ၣ်, ဟ့ၣ်ကၣ် တၢ်ဒုၣ်ဒွဲၣ်တဂ့ၤ,” ဒီး “မ်အဃုတၢ်ဃူတၢ်ဖိး, ဒီးလူၤအီၤတက့ၢ်” (:၉-၁၁) န့ၣ်လီၤ.

ဟီၣ်ခိၣ်ချၢအံၤ, ညီနုၢ်ကဲထီၣ်ဝဲဒၣ် တၢ်လီၢ်လၢ အပာ်ဖျါထီၣ် တၢ်သူၣ်ဒိၣ်သးဖျိးလၢ online, ဒီးလၢတၢ်ဖံးတၢ်မၤအလီၢ်, တၢ်အ့ၣ်လိာ်သး လၢကျဲခိၣ်, တၢ်မၤစုဆူၣ်ခီၣ်တကးအတၢ်မၤလၢ ထံဂ့ၢ်ကီၢ်ဂ့ၢ်အပူၤ, ဒီးလၢဟံၣ်ဖိဃီဖိအဘၢၣ်စၢၤတဖၣ်အဃိ, ဒ်သိးပကမၤဆံးလီၤစှၤလီၤ ပတၢ်သူၣ်ဒိၣ်သးဖျိးတဖၣ်အဂီၢ်န့ၣ် ပဃ့ကစၢ်ယွၤ သ့ဝဲဒၣ်န့ၣ်လီၤ. ဒ်ပမ့ၢ်ပှၤစူၢ်က့ၤနၥ်က့ၤ ကစၢ်ခရံၥ်သ့ၣ်တဖၣ်အသိး, ယွၤအသးစီဆှံန့ၣ် ကမၤၦဲၤပသူၣ်ပသး လၢအတၢ်အဲၣ်, ဒီးအတၢ်ကပီၤန့ၣ်လီၤ.