လၢကီၢ်အဲကလံး (England), Herefordshire ကီၢ်ရ့ၣ်အပူၤန့ၣ် Ross-on-Wye မ့ၢ်ဝ့ၢ်လၢအအိၣ်ဒီးန့ဆၢၣ်တၢ်ကွၢ်ကီအလီၢ်အကျဲ, လၢအဃံလၤဒိၣ်မးတဖျၢၣ်န့ၣ်လီၤ. တၢ်ဘါသရိၥ်အပျိၢ်ခိၣ်စိၣ်လၢအထီ, ဒီးတၢ်ဆါတၢ်ပှ့ၤအဟံၣ်လီၢ်လံၤတဖၣ်, ဖီကရၢၢ်လၢကစၢၢ်အတၢ်လူၢ်ဒီခိၣ်တဖၣ်န့ၣ် မ့ၢ်န့ဆၢၣ်အလီၢ်ဃံလၤလီၤလီၤဆီဆီလၢ Wye ထံကျိ နံၤန့ၣ်လီၤ. နမ့ၢ်ဟးဝ့ၤဝီၤလၢ ရိး(စ)(Ross) ဝ့ၢ်အကျဲတဖၣ်န့ၣ် နကထံၣ်ဘၣ် ပှၤကညီအမံၤ, ကၠီ(န) ခါ(ရ) (John Kyrle) န့ၣ်လီၤ.

ဖဲ ၁၆၃၇ နံၣ်န့ၣ် ကၠီ(န) အိၣ်ဖျဲၣ်ထီၣ်ဝဲဒၣ် ပှၤထူးပှၤတီၤအဒူၣ်ဖိထၢဖိ, ဒီးစူးကါ ဝဲဒၣ် အတၢ်န့ၢ်သါတဖၣ် လၢတၢ်မၤဂ့ၤတၢ်တဖၣ်အဂီၢ်န့ၣ်လီၤ. လၢအၦၤတဝၢဖိအဂီၢ်န့ၣ် တ့သူၣ်ထီၣ်ဝဲ ဖီကရၢၢ်လၢကစၢၢ်အတၢ်လူၢ်ဒီခိၣ်န့ၣ် တမ့ၢ်လၢအနီၢ်ကစၢ်ဒၣ်ဝဲအဂီၢ်ဘၣ်. ဒီးအတၢ်မၤန့ၣ် တမ့ၢ်ပှၤညီနုၢ်မၤအီၤ ဖဲစိၤဆၢကတီၢ်အံၤန့ၣ်ဘၣ်. ပှၤကမျၢၢ်ကဟးကသုၣ်ကသီအသးအဂီၢ်, ဒါလီၤဝဲဒၣ် ကျဲလၢအလဲၤသဃဲၤလိာ်သးဒီးထံကျိ, ဆှၢတီၣ်ထီၣ် ထံကျိအထံဆူဝ့ၢ်ပူၤ, ဟ့ၣ်မၤစၢၤကျိၣ်စ့ဆူ ကၠိတဖၣ်, ရဲၣ်ကျဲၤန့ၢ်ဝဲ ပှၤလၢအတၢ်ဖံးတၢ်မၤတအိၣ်သ့ၣ်တဖၣ် ဒ်သိးကမၤလိသ့အသး, ဒီးကဒိးန့ၢ်တၢ်ဖံံးတၢ်မၤအဂီၢ်, ၦၤဖှီၣ်ဖိယာ်ဖိတဖၣ်န့ၣ် တူၢ်လိၥ်ဝဲလၢအဟံၣ်, ဒီးနီၤလီၤဝဲကိၣ်လၢ တၢ်ဆါတၢ်ပှ့ၤအဟံၣ်တဖၣ်န့ၣ်လီၤ.

ဒ်ယဘူၣ်သကိးဘါသကိးယွၤ အါနံၣ်အါလါ လၢ ရိး(စ) အတၢ်ဘါသရိၥ်အသိး, ယဆိကမိၣ်ထီၣ် လံၥ်စီဆှံတတီၤ, ပဖးအီၤလၢမုၢ်တနံၤအံၤန့ၣ် မ့ၢ်အတၢ်ဘၣ်ထွဲအိၣ်ဝဲဒီးတၢ်လၢအပူၤကွံာ် ခါ(ရ) အတၢ်မၤဂ့ၤမၤစၢၤ ၦၤဖှီၣ်ဖိယၥ်ဖိ, ဒီးၦၤလၢအလိၣ်ဘၣ်တၢ်မၤစၢၤအဂ့ၢ်န့ၣ်လီၤ. လံၥ်စီဆှံအဆၢသ့ၣ်တဖၣ်အံၤ ပာ်ဖျါထီၣ်ဝဲ တၢ်အိၣ်ဖှိၣ်လၢ စီၤတံၤမသ့း ကွၢ်ထွဲဝဲဒၣ်န့ၣ် ၦၤထူးၦၤတီၤတဖၣ် အသုတပာ်ထီၣ်ထီအသး လၢအတၢ်ထူးတၢ်တီၤ အဃိန့ၣ်တဂ့ၤ, ဒီးလၢအလီၢ်န့ၣ် ကမၤဝဲတၢ်မၤအဂ့ၤအဝါအဂီၢ် (၁ တံၤ ၆:၁၇-၁၈) န့ၣ် စီၤပီလူး ဟ့ၣ်ကူၣ်ဟ့ၣ်ဖးဝဲဒၣ်န့ၣ်လီၤ. ဖဲၦၤတူၢ်ဒိၣ်ကီၤဒိၣ်အဂၤတဖၣ် သူၣ်ထီၣ် ဟံၣ်ဒိၣ်ဟံၣ်သွါတဖၣ် အိၣ်ၦဲၤဒီးတၢ်စုလီၢ်ခီၣ်ခိၣ်လၢအလီၤဘီလီၤမုၢ်အကတီၢ်, မ့မ့ၢ် ခါ(ရ) တဂၤ ပၥ်ဖှိၣ်ဝဲ မူခိၣ်အတၢ်ထူးတၢ်တီၤ, ခီဖျိလၢတၢ်မၤဂ့ၤမၤစၢၤပှၤဂုၤၦၤဂၤ (:၁၉) န့ၣ်လီၤ.

ဒ်သိးပကစူးကါအီၤအဂီၢ်, ပဝဲတဂၤစုာ်စုာ်န့ၣ် ပအိၣ်ဒီးတၢ်ဆၢကတီၢ်, တၤလၣ်, ဒီး စုလီၢ်ခီၣ်ခိၣ်ဂံၢ်ခီၣ်ထံးတဖၣ်, ဒီးကစၢ်ယွၤ အဲၣ်ဒိးဝဲဒၣ်လၢ ပကစူးကါအီၤဂ့ၤဂ့ၤဘၣ်ဘၣ်န့ၣ်လီၤ. အါဂ့ၤစှၤဂ့ၤ, ဒ် John Kyrle အိၣ်မူဟ့ၣ်ဒိတ့ၢ်ပှၤအသိး, ခီဖျိလၢတၢ်မၤဂ့ၤမၤစၢၤ ပှၤဂုၤၦၤဂၤအတၢ်အိၣ်မူန့ၣ် ပမၤလၤကပီၤ ကစၢ်ယွၤ သ့ဝဲဒၣ်န့ၣ်လီၤ.