တၢ်သ့စီလီခီတဖၣ်လၢစု, ဒီးလီၤတဲၥ်သ့ၣ်ဖးဝဲတလီၢ်လီၢ်န့ၣ် ကၠိၣ်စဖ့(န) ခီး(ခ)ရဲ(န) (Josephine Cochrane) (၁၈၃၉-၁၉၁၃) အသးဟးဂီၤဝဲအဃိ, ပာ်လီၤအသးလၢကတ့ဒုးအိၣ်ထီၣ် ကဟၣ်လၢအသ့စီလီခီန့ၣ်လီၤ. ဖဲအစးထီၣ်တ့ ကဟၣ်အက့ၢ်ဂီၤဒိဝံၤ တယံၥ်ဘၣ်, အဝၤသံ, ဒီးပာ်တ့ၢ်အီၤဒီးအဒ့ၣ်ကမၢ်တဖၣ်န့ၣ်လီၤ. တၢ်အိၣ်အသးအကီအခဲတဖၣ်အံၤ ထိၣ်ဟူးထိၣ်ဂဲၤအီၤ, ဒ်သိးကမၤဝံၤဝဲ အတၢ်ပညိၣ်န့ၣ်လီၤ. ဒီးဖဲ ၁၈၈၆ နံၣ်န့ၣ် အဝဲတ့ဒုးအိၣ်ထီၣ် ကဟၣ်သ့စီလီခီအဆိကတၢၢ်, လၢအဘၣ်စူးကါအီၤလၢစု, ခီဖျိလၢၦၤဘှီစဲးဖီကဟၣ်တဂၤအတၢ်မၤစၢၤန့ၣ်လီၤ. လၢထံကီၢ်ပဒိၣ်အအိၣ်စ့ၢ်ကီး, ဒိးန့ၢ်ဝဲခွဲးယၥ်လၢ ကတ့ဆါထဲတဂၤဧိၤအဂီၢ်န့ၣ်လီၤ. အခီၣ်ထံးန့ၣ် တဆါဘၣ် ကဟၣ်သ့စီလီခီတဖၣ်န့ၣ်ဘၣ်. ဘၣ်ဆၣ်, သမှံၤဟံၣ်ဒွဲ, ဒီးတၢ်အီၣ်အကျးတဖၣ် စးထီၣ်ပှ့ၤဝဲဒၣ် ကဟၣ်သ့စီလီခီတဖၣ်န့ၣ်လီၤ. စးထီၣ်လၢ ၁၉၅၀ နံၣ်အဘျဲၣ်တဖၣ်အကတီၢ်န့ၣ်မး, ပှၤအါဂၤဘၣ်သူၣ်ဘၣ်သး ကဟၣ်သ့စီလီခီတဖၣ်, ဒီးစူးကါဝဲလၢဟံၣ်ဃီတဖၣ်န့ၣ်လီၤ.

ဘၣ်တဘျီဘျီန့ၣ် ဒ်သိးတၢ်တိၥ်ကျဲၤသ့ၣ်တဖၣ် ကကဲထီၣ်လိၣ်ထီၣ်ဝဲအဂီၢ်န့ၣ် ပကဘၣ်ဟ့ၣ် တၢ်ဆၢကတီၢ်, ဒီးပကဘၣ်ဂုာ်ကျဲးစၢးမၤသပှၢ်ပှၢ်န့ၣ်လီၤ. ဘၣ်တဘျီဘျီ, ကစၢ်ယွၤအတၢ်အၢၣ်လီၤတဖၣ်စ့ၢ်ကီး, မၤအသးဒ်သိးအံၤန့ၣ်လီၤ. ကစၢ်ယွၤ အၢၣ်လီၤအီလီၤတ့ၢ်ဝဲ စီၤအၤဘြၤဟၣ်ဒီးအစၢၤအသွဲၣ်တဖၣ် ကကဲထီၣ် ၦၤတကလုၥ်ဖးဒိၣ်ဘၣ်ဆၣ်, စီၤအၤဘြၤဟၣ်, စီၤအံၤစဲးဒီး, စီၤယၤကိၥ် တချုးန့ၢ်ဝဲဒၣ်နီတဂၤဘၣ်န့ၣ်လီၤ. ဖဲ နီၢ်စၤရါ ဆံးစၢ်န့ၢ်အီၤ အဖိခွါ, စီၤအံၤစဲး န့ၣ် စီၤအၤဘြၤဟၣ် အသးအိၣ်ဝဲဒၣ် အနံၣ်တကယၤလံ (၁မိၤ ၂၁), ဒီးဖဲ နီၢ်ရံးဘကၤ ဆံးစၢ်န့ၢ်အီၤ အဖိသဃံာ်ခံဂၤန့ၣ် စီၤအံၤစဲးအသး အိၣ်ဝဲဒၣ် အနံၣ်ဃုဆံ (၂၅:၂၀-၂၁,၂၆) န့ၣ်လီၤ. ဖဲတၢ်သၣ်ဝံၤလီၤဒိလီၤဘၣ်ဝဲ, ဒီးစီၤယၤကိၥ် နုာ်လီၤအိၣ်ဆိးဝဲလၢ ကီၢ်အဲကူးပတူး အဆၢကတီၢ်န့ၣ် အဒူၣ်ဖိထၢဖိနီၢ်ဂံၢ် အိၣ်ဝဲဒၣ်ထဲ နွံဆံဂၤ (၄၆:၂၇) န့ၣ်လီၤ. (အနံၣ် ၄၀၀ လဲၤပူၤကွံာ်ဝံၤ), တုၤလီၤလၢ
စီၤမိၤရှ့ အစိၤအဆၢကတီၢ်န့ၣ်မး, ၦၤအံၣ်စရ့လးဖိတဖၣ်ကဲထီၣ် ၦၤတကလုၥ်ဖးဒိၣ်န့ၣ်လီၤ.

ဒ်သိး စီၤအံၤစဲး ကဒိးန့ၢ်ဝဲ အဖိအဂီၢ်န့ၣ် အဝဲ “ဃ့ကညးယွၤ” (၂၅:၂၁), တၢ်လၢ ကစၢ်ယွၤ အဲၣ်ဒိး ပဝဲကိးဂၤဒဲးမၤဝဲဒၣ်န့ၣ်လီၤ. နတၢ်မုၢ်လၢ်တဖၣ်, ဒီးနတၢ်ဂဲၤလိၥ်တဖၣ်န့ၣ် ဟဲစိၥ်ဆူ ကစၢ်ယွၤအအိၣ်န့ၣ်တက့ၢ်. ဖဲနအိၣ်ခိးတၢ်အကတီၢ်, ကစၢ်ယွၤ ကမၤမုၥ်ထီၣ်က့ၤနၤ, ကနဲၣ်ဆှၢနၤ, ကဟ့ၣ်ဂံၢ်ဟ့ၣ်ဘါနၤ, ဒီးကဆိၣ်ဂ့ၤနၤန့ၣ်လီၤ.