ထံၣ်ယါနၣ် (Tiana) လၢအသးအိၣ် ဃုနံၣ်ဖိတဂၤ, ဖှိၣ်ဃာ်အစု, ဒီးဖဲဃ့ထုကဖၣ်ဝဲ အကတီၢ်, လူၤကွၢ်ဃုတၢ်လၢကမျၢၢ်အကျါ, ဒီးကွၢ်ဝဲဆူ သရိာ်အပဲတြီဖးဒိၣ်န့ၣ်လီၤ. အတံၤသကိးဖိတဖၣ် ဝံၢ်ဝၢ်အစုဆူ ပှၤတမှံၤသ့ၣ်တဖၣ် လၢအဟဲဝဲဒၣ် ပၢ်မုၢ်နံၤအမူးသးဖှံန့ၣ်လီၤ. ပၢ်သ့ၣ်တဖၣ်, ဒီးပှၤလၢအလီၤဂာ်ဒီးပၢ်သ့ၣ်တဖၣ် ဝံၢ်ဝၢ်ဆၢက့ၤအစုစ့ၢ်ကီးန့ၣ်လီၤ. ဘၣ်ဆၣ်, မ့မ့ၢ် Tiana တဂၤ, ပှၤကဝံၢ်ဝၢ်အစုဒီးအီၤန့ၣ် တအိၣ်ဝဲနီတဂၤဘၣ်. ဒ်သိး Tiana ကလဲၤသဝံၣ်သကိး ခွါယၢၣ်အဂီၢ်န့ၣ် အသရၣ်မုၣ် ဟ့ၣ်ဂံၢ်ဟ့ၣ်ဘါအီၤဘၣ်ဆၣ်, တဟူးတဝးဝဲဘၣ်. ဖဲအပၢ် ဟဲနုာ်လီၤလၢ ပဲတြီသတူၢ်ကလာ်, ဒီးဝံၢ်ဝၢ်အစုဆူ Tiana, ဒီးဆ့ၣ်နီၤဝဲဒၣ်န့ၣ်ဒီး, လၢမဲာ်ထံမဲာ်နိအပူၤန့ၣ် Tiana ဖိတဂၤ နံၤကမှံထီၣ်, ဒီးလဲၤထီၣ်ဝဲဆူ စိၤမိၤခိၣ်န့ၣ်လီၤ.

ကွၢ်ဖဲပသးအနံၣ်လါ ကမ့ၢ်ဝဲတမံၤဂ့ၤတမံၤဂ့ၤ, လၢပသးကံၢ်ပူၤန့ၣ် ဒ်ဖိသၣ်အသး ကပုာ်လုာ်ဖိလၢ အဆၢမိၣ်န့ၢ်သးလီတၢ်နးနးကျံၤကျံၤ, လၢပှၤကထံၣ်အီၤ, ကဒိကနၣ်အီၤ, ဒီးပှၤကအဲၣ်အီၤအဂီၢ်န့ၣ်လီၤ. ဘၣ်ဆၣ်, ပှၤကွဲးထါ, စီၤဒၤဝံး အုၣ်အသးလၢ ကစၢ်ယွၤအသးမုာ်သးခုဝဲလၢ ကဒုးနဲၣ်ဖျါထီၣ်အသးဆူ အဖိတဖၣ်န့ၣ်လီၤ. ပၢ်အိၣ်လၢမူခိၣ် တဂၤအတၢ်အဲၣ်န့ၣ် တလီၤတူၢ်လီၤကာ်ဘၣ်, တသးပ့ၤနီၣ်ပှၤဘၣ်, ဒီးတလဲၤကပာ်ပှၤဘၣ်အဂ့ၢ်န့ၣ် စီၤဒၤဝံး ဃ့ထုကဖၣ်ဝဲလၢ တၢ်နာ်န့ၢ်လီၤသးအပူၤန့ၣ်လီၤ. အတၢ်လီၤတူၢ်လီၤကာ်န့ၣ် အၢၣ်လီၤဝဲ, ဒီးလၢတၢ်နာ်န့ၢ် ကစၢ်ယွၤအတၢ်တီတၢ်လိၤအပူၤန့ၣ် စီၤဒၤဝံးဃ့ထုကဖၣ်ဝဲဒၣ် (စံး ၈၆:၁-၄) န့ၣ်လီၤ. အဝဲဒုးသ့ၣ်ညါပှၤလၢ “ယွၤဧၢ, နဲဒၣ်အံၤနမ့ၢ်တၢ်ဂ့ၤ, ဒီးနပျၢ်ကွံာ်တၢ်ညီ, ဒီးနဘျုးနဖှိၣ်အါဝဲ” (:၅) အဂ့ၢ်န့ၣ်လီၤ. စီၤဒၤဝံး သးဝံၣ် စံးထီၣ်ပတြၢၤယွၤ, “လၢယဘၣ်တၢ်ကိၢ်တၢ်ဂီၤ အမုၢ်တနံၤန့ၣ်, ယကကိးထီၣ်နၤလီၤ. အဂ့ၢ်ဒ်အံၤ, နကစံးဆၢယၤ” (:၇) န့ၣ်လီၤ. မ့ၢ်လၢ ကစၢ်ယွၤ အတၢ်တီတၢ်လိၤန့ၣ် ဒုးနဲၣ်တ့ၢ်လံအီၤအဃိ, လၢတၢ်မုၢ်လၢ်ဖးဒိၣ်အပူၤန့ၣ် စီၤဒၤဝံး ကိးထီၣ် (:၁၁) ယွၤန့ၣ်လီၤ.

ပပၢ်ယွၤအိၣ်လၢမူခိၣ်န့ၣ် အၢၣ်လီၤအီလီၤတ့ၢ်ပှၤလၢ ကဒုးနဲၣ်ဖျါထီၣ်အသးအဃိ, ဒ်စီၤဒၤဝံးအသိး, ပနာ်န့ၢ်အီၤသ့ဝဲဒၣ်န့ၣ်လီၤ. ပဝဲနၤယၤစ့ၢ်ကီး, ပကသးဝံၣ်ထီၣ် “ယွၤယကစၢ်ဧၢ, ယစံးထီၣ်ပတြၢၤနမံၤလၢ ယသးဒီဖျၢၣ်ညါ, ဒီးယကမၤလၤကပီၤနမံၤလီၤထူလီၤယိာ်” (:၁၂) သ့ဝဲဒၣ်န့ၣ်လီၤ. ” အဂ့ၢ်ဒ်အံၤ, လၢကစၢ်တဖၣ်အကျါန့ၣ် ပှၤဒ်နၤ (ယွၤ) အသိးတအိၣ်ဘၣ်” (:၈), ဒီး “နမ့ၢ်တၢ်အဒိၣ်, ဒီးမၤတၢ်လီၤလးလီၤ. နမ့ၢ်ယွၤ
တဂၤဃီ” (:၁၀) န့ၣ်လီၤ.