ကီၢ်အဲကလံး အကွဲၤထံၣ်ဟူသန့တဖျၢၣ် ဒုးနဲၣ်ဝဲ “ဒီတနံၣ်အတီၢ်ပူၤ, ပှၤတ့ခဲၣ်တၢ် အဂ့ၤကတၢၢ်တဂၤ” အတၢ်ရဲၣ်တၢ်ကျဲၤအပူၤန့ၣ် ပှၤတ့ခဲၣ်မၤမုာ်သးခွံဂၤ, နုာ်လီၤပြၢ တၢ်တ့ခဲၣ်လီၢ်ကဝီၤပှၤမံၤဟူသၣ်ဖျါတဂၤ အက့ၢ်အဂီၤန့ၣ်လီၤ. တၢ်တ့ခဲၣ်သတြီၤတၢ်န့ၣ် ကဘၣ်ဝံၤဝဲဒၣ်လၢ လွံၢ်နၣ်ရံၣ်အတီၢ်ပူၤ, ဒီးဒ်သိးကဒုးနဲၣ်ဝဲ တနၣ်ရံၣ်အဂီၢ်, ပာ်ဖှိၣ်မၤဖုၣ်လီၤဝဲတၢ်ရဲၣ်တၢ်ကျဲၤန့ၣ်လီၤ. လၢတၢ်ကံးယာ်ဝါတဖၣ်အလိၤန့ၣ် ပှၤတ့ခဲၣ်တၢ်ဖိတဂၤစုာ်စုာ် အတၢ်မၤတဖၣ် ဟဲဖျါထီၣ်ဝဲဒၣ်တပတီၢ်ဘၣ်တပတီၢ်န့ၣ် မ့ၢ်လၢ ခဲမရၣ် (cameras) တဖၣ် ဒုးနဲၣ်ဝဲအဃိ, တၢ်ရဲၣ်တၢ်ကျဲၤန့ၣ် ထုးန့ၢ်ပသူၣ်ပသးဒိၣ်မးန့ၣ်လီၤ.

ဖဲလံာ် ၁ မိၤရှ့ အပူၤန့ၣ် လံာ်စီဆှံ ပာ်ဖျါဝဲဒၣ် တၢ်ဘၣ်တ့အဂ့ၢ်န့ၣ် ကစၢ်ယွၤ တ့လီၤ သးသမူတဖၣ် လၢတၢ်တအိၣ်ဒံးဘၣ်နီတမံၤ- ဒ်တၢ်ကံးယာ်အဝါလၢ ပှၤတ့ခဲၣ်တၢ်ဖိစူးကါဝဲတဖၣ်အသိးန့ၣ်လီၤ. ဒီးဖဲ လံာ် မိၤရှ့ ၂ အပူၤန့ၣ် ပကထံၣ်ဘၣ် “တၢ်ဘၣ်တ့” အတၢ်တဲပူအဂၤတယုၢ်န့ၣ် မ့ၢ်ဝဲဒၣ် စီၤမိၤရှ့ အတၢ်အိၣ်ဖျဲၣ်ထီၣ်အဂ့ၢ်န့ၣ်လီၤ. လံာ်စီဆှံ တတီၤအံၤ စူးကါဝဲဒၣ် ကျိာ်တၢ်ကတိၤလၢ စီၤမိၤရှ့ အမိၢ် “ထံၣ်ဘၣ်ဝဲလၢ အမ့ၢ်အဂ့ၤ” (၂ မိၤ ၂:၂) န့ၣ် မ့ၢ်ဝဲ ပှၤဧ့ၤဘြံၤဖိ အတၢ်ကတိၤ “tov,” ဒီးအခီပညီမ့ၢ်ဝဲ “ဂ့ၤ” န့ၣ်လီၤ. တၢ်ကတိၤအံၤ ပနၢ်ဟူသီၣ်ကဒါက့ၤ တၢ်ဘၣ်တ့အဂ့ၢ်, လၢလံာ် ၁ မိၤရှ့ အပူၤ, ဒီးဘၣ်တၢ်စူးကါအီၤ ဖဲကစၢ်ယွၤ ကွၢ်ဝဲအတၢ်ဘၣ်တ့တဖၣ်, “ဒီးယွၤထံၣ်ဝဲလၢအဂ့ၤ” (၁ မိၤ ၁:၂၅) န့ၣ်လီၤ. ဖိသၣ် စီၤမိၤရှ့ဖိ ဘၣ်တၢ်ပာ်အီၤလၢ နာ်ဖိ (basket) အပူၤ, ဒီးထီၣ်ဖီလၢထံဖံးခိၣ် ဒ်သိးကအိၣ်ဘံၣ်အိၣ်ဘၢဝဲအဂီၢ်န့ၣ်လီၤ. လံာ်မဲာ်ဖျၢၣ် “နာ်ဖိ” န့ၣ် မ့ၢ်လံာ်မဲာ်ဖျၢၣ် ဒ်သိးလိာ်အသးဒီး “ကဘီ” ဖျါဝဲဒၣ် ဖဲ စီၤနိအၤအတၢ်တဲပူအပူၤန့ၣ်လီၤ. လံာ်စီဆှံတတီၤအံၤ ပထံၣ်ဘၣ် ကစၢ်ယွၤ တ့ခဲၣ်မၤမူထီၣ် ခိၣ်နၢ်အက့ၢ်အဂီၤ, လၢအမ့ၢ်စီၤမိၤရှ့ ဒ်သိးကနဲၣ်ဆှၢ အပှၤဃုထၢ, အံၣ်စရ့လးဖိတဖၣ်န့ၣ်လီၤ.

ကစၢ်ယွၤ တ့ခဲၣ်ဝဲ နတၢ်အိၣ်မူအက့ၢ်ဂီၤဒ်လဲၣ်. ဘၣ်သ့ၣ်သ့ၣ်, နကအိၣ်ဟဲဝဲလၢ ပှၤအပတီၢ်ဖုၣ်တလုာ် လၢအဆီၣ်လီၤသးတဖၣ်န့ၣ်လီၤ. ဒ်စီၤမိၤရှ့အသိး (ကွၢ် ၂ မိၤရှ့ ၄), ဘၣ်သ့ၣ်သ့ၣ်န့ၣ် တၢ်မၤလၢအအိၣ်ခိးပာ်နၢၤအဂီၢ်, နသးကကလၢၢ်ဘၣ်နဲ, ဒ်နတလၢတပှဲၤဒံးဘၣ်န့ၣ်လီၤ. ဘၣ်ဆၣ်, နက့ၢ်နဂီၤလၢ ကစၢ်ယွၤ တ့ခဲၣ်ဝဲန့ၣ် ဟဲဖျါထီၣ်ကယီကယီ, ဒ်စီၤပီလူး ပာ်ဖျါဝဲ, “အဂ့ၢ်ဒ်အံၤ, ပမ့ၢ်အတၢ်မၤလၢအတ့လီၤဝဲလၢ ယ့ၣ်ရှူးခရံာ်အပူၤ” (အ့းဖ့း ၂:၁၀) အသိးန့ၣ်လီၤ. ဖဲ ကစၢ်ယွၤ တ့ခဲၣ်ဝဲဒၣ် နသးသမူအက့ၢ်အဂီၤအကတီၢ်, လၢနတၢ်အိၣ်မူအတၢ်ကံးယာ် အဝါအလိၤန့ၣ် ကစၢ်ယွၤ တ့ဒုးအိၣ်ထီၣ် “တၢ်အဂ့ၤ” န့ၣ် သ့ၣ်ညါနဲလီၤတံၢ်လီၤဆဲးန့ၣ်တက့ၢ်.