လ့လံၣ် ကၤန့(န) ဟါ(မ) (Lillie Cunningham) န့ၣ် အသးအိၣ် (၁၁၀) နံၣ်လံဘၣ်ဆၣ်, တသန့ၤအသးလၢ နီၣ်ထိးဘိ (မ့) ပိးလီလၢ ပှၤဖီၣ်ဒီးဟးဘၣ်န့ၣ်ဘၣ်. အဝဲသန့ၤအသးလၢ ယွၤအကလုာ်ကထါ, ဒီးဖးဝဲဒၣ် လၢမုၢ်ဂီၤ, ဒီးလၢမုၢ်ဟါ, ကိးမုၢ်နံၤ, ဒီးမုၢ်အိၣ်ဘှံးနံၤ ကိးနွံဒဲးန့ၣ် လဲၤထီၣ်ဘါယွၤလၢတၢ်ဘါသရိာ်န့ၣ်လီၤ. ဖဲအဝဲကွၢ်ထံ ဆိကမိၣ်က့ၤ အတၢ်အိၣ်မူ, ဒီးစံးဝဲဒၣ်လၢ “ထီဘိန့ၣ် ယနာ်, ဒီးယသန့ၤယသးလၢကစၢ်ယွၤ ကစိာ်ဆှၢခီဖျိပှၤ” န့ၣ်လီၤ.

Mrs. Cunningham နာ်န့ၢ်ဝဲ ကစၢ်ယွၤ, ဒီးစံးထီၣ်ပတြၢၤ ကစၢ်ယွၤ, လၢအစိာ်ဆှၢခီဖျိအီၤလၢတၢ်ကီတၢ်ခဲတဖၣ်, လၢအမ့ၢ်, တၢ်ဒုးတၢ်ယၤတဖၣ်, တၢ်ဆါသံသတြိာ်တဖၣ်, အဝၤသးဘိဒီးအဒီပုၢ်ဝဲၢ်တဖၣ် သံလဲၤပူၤကွံာ်ဟီၣ်ခိၣ်န့ၣ်လီၤ. အတၢ်အိၣ်မူန့ၣ် လီၤဂာ်ဒီးပှၤကွဲးထါတဂၤ, အတၢ်အိၣ်မူအသိး, လၢအဒုးသ့ၣ်ညါ ပှၤဂီၢ်မုၢ်တဖၣ်လၢ “နဘျုးနဖှိၣ်လၢမုၢ်ဂီၤ,” ဒီး “နတၢ်မ့ၢ်တၢ်တီလၢမုၢ်နၤ” (စံး ၉၂:၁-၂), ဒီးလၢအတၢ်နာ်န့ၢ် ကစၢ်ယွၤ စွံကတုၤန့ၣ် ဒုးနဲၣ်ဖျါထီၣ် ပှၤကွဲးထါအတၢ်ကတိၤ, “ပှၤတီပှၤလိၤဂ့ၤထီၣ် ဒ်သ့ၣ်စူၣ်ပလိၣ်အသိး,… သူၣ်အသးလၢယွၤအဟံၣ်ပူၤ ,.. ဒီးတုၤအသးပှၢ်ဒီးကသၣ်ထီၣ်ဒံးဒီး, ကအိၣ်ပှဲၤဒီးအထံဒီးသံကစဲာ်” (:၁၂-၁၄) န့ၣ်လီၤ. ဒ်ပှၤကွဲးထါတဂၤအံၤအသိး, အဝဲဟ့ၣ်ထီၣ်ဝဲဒၣ် ကယဲၢ်
တၢ်လၤတၢ်ကပီၤတဖၣ်ခဲလၢာ်ဆူ ယွၤအအိၣ် (:၁၅) န့ၣ်လီၤ.

ပှၤလၢအသးအိၣ် အနံၣ်တကယၤဘျဲၣ်တဂၤ, အတၢ်အိၣ်မူန့ၣ် ပမၤလိန့ၢ်တၢ်အါမးန့ၣ်လီၤ. ဒ် Lillie အသိး, ပကအိၣ်မူအိၣ်ဂဲၤ ပတၢ်အိၣ်မူတဖၣ်, လၢတၢ်ရ့လိာ်သးဒီးကစၢ်ယွၤ, စံးထီၣ်ပတြၢၤမၤလၤကပီၤယွၤ, ခီဖျိလၢပကစူးကါ တၢ်ဆၢကတီၢ်, လၢတၢ်ထုကဖၣ်, တၢ်ဖးလံာ်စီဆှံ, ဒီးဘူၣ်ထီၣ်ဘါထီၣ် ကစၢ်ယွၤ “လၢယွၤအဂၢၤပူၤ” (:၁၃) န့ၣ်တက့ၢ်. ကစၢ်ယွၤ တအၢၣ်လီၤအီလီၤပှၤလၢ ပကအိၣ်မူအိၣ်ဂဲၤဘၣ် ဖးယံာ်ဖးထီလၢဟီၣ်ခိၣ်ချၢန့ၣ်ဘၣ်. ဒ်သိးပကအိၣ်မူဒီးအီၤ လီၤထူလီၤယိာ်အဂီၢ်, ဒ်ကစၢ်ယွၤ ကတဲာ်ကတီၤန့ၢ်ပှၤအသိး, ခီဖျိလၢကစၢ်ယွၤန့ၣ် ပတၢ်အိၣ်မူတဖၣ် “ကအိၣ်ပှဲၤဒီးအထံဒီးသံကစဲာ်” (:၁၄) န့ၣ်လီၤ.