ဖဲတၢ်ဂိၢ်ထီၣ်သီအကတီၢ်န့ၣ် ယၤဒီးယမၤ, ပလဲၤဟးကသူၣ်ကသီပသး လၢသိလ့ၣ်န့ၣ်လီၤ. တချုးလၢပစးထီၣ် ပတၢ်လဲၤအမုၢ်တနံၤန့ၣ် မူခိၣ်ဖီတဖၣ်စးထီၣ်လီၤဝဲဒၣ်န့ၣ်ဒီး, သတူၢ်ကလာ်န့ၣ် ယသ့ၣ်နီၣ်ထီၣ်ဝဲဒၣ်လၢ ယတဆီတလဲဘၣ် ယသိလ့ၣ် အထါယၢၣ် (tires) လၢပှၤစူးကါအီၤလၢ မူခိၣ်ဖီတဖၣ်အကျါန့ၣ်လီၤ. မ့ၢ်လၢမူခိၣ်ဖီလီၤဝဲ, ဒီးတၢ်လဲၤတၢ်က့ၤအကျဲတဖၣ်တံာ်တာ်, သိလ့ၣ်အိၣ်ခိးတၢ်အကျိၤဖးထီအဃိ, ယဘၣ်အိၣ်ခိးဝဲဒၣ်လၢ ပှၤဆါထါယၢၣ်အကျးန့ၣ်လီၤ. ယမ့ၢ်ကတဲာ်ကတီၤဆိပာ်ဝဲန့ၣ်ဒီး, ယကဟးဆှဲး တၢ်ဂ့ၢ်ကီအံၤ, ကသ့ဝဲဒၣ်န့ၣ်လီၤ.

ပတၢ်အိၣ်မူအိၣ်ဂဲၤတဖၣ် အါတက့ၢ်န့ၣ် ပကဘၣ်အိၣ်ကတဲာ်ကတီၤဆိပာ်ပသးန့ၣ်လီၤ. တၢ်အကါဒိၣ်ဝဲလၢ ပကဘၣ်ကွၢ်စိတၢ်လၢခါဆူညါအဂီၢ်, တၢ်လၢအကဟဲကဲထီၣ်အသးသ့တဖၣ်အဂီၢ်န့ၣ် ပကဘၣ်အိၣ်ကတဲာ်ကတီၤပသး, မ့ၢ်ပအိၣ်ဒီး တၢ်ရဲၣ်တၢ်ကျဲၤအဂ့ၤအဘၣ်ဧါန့ၣ် ပကဘၣ်မၤလီၤတံၢ်ဝဲဒၣ်န့ၣ်လီၤ.

တၢ်ကတဲာ်ကတီၤဆိပာ်ပသးန့ၣ် မ့ၢ်တၢ်မ့ၢ်တၢ်တီတမံၤလၢ ပသူၣ်ဂ့ၢ်သးကျိၤ အတၢ်လဲၤအဂီၢ်န့ၣ်လီၤ. မးသဲ ၂၄ အပူၤန့ၣ် ကစၢ်ယ့ၣ်ရှူး ဒုးနဲၣ်ဝဲဒၣ်လၢ အတၢ်ဟဲက့ၤအကတီၢ်အဂီၢ်, တၢ်အိၣ်ကတဲာ်ကတီၤသးန့ၣ် မ့ၢ်တၢ်လၢအလိၣ်ဝဲသပှၢ်တၢၢ်န့ၣ်လီၤ. အဝဲစံးဘၣ်တဲဘၣ် ပှၤဒိကနၣ်တၢ်ဖိတဖၣ်လၢ “မၤသးဒ်န့ၣ်ဒီး, အိၣ်ကတဲာ်ကတီၤ စ့ၢ်ကီးသုသးတက့ၢ်. အဂ့ၢ်ဒ်အံၤ,….. ပှၤကညီဖိခွါအံၤ ကဟဲဝဲ” (:၄၄) န့ၣ်လီၤ. လၢခံန့ၣ်, စီၤပ့းတရူး ဒုးသ့ၣ်ညါဝဲ ပှၤစူၢ်က့ၤနာ်က့ၤတၢ်ဖိတဖၣ်လၢ “ဒီးကယဲၢ်ပှၤလၢအသံကွၢ် သုလၢ တၢ်မုၢ်လၢ်အိၣ်လၢသုပူၤအဂ့ၢ်အကျိၤကိးဂၤဒဲးန့ၣ် အိၣ်ကတီၤသုသးထီဘိလၢတၢ်စံးဆၢ” (၁ ပ့း ၃:၁၅), လၢသးအတၢ်ကူၣ်သ့အပူၤ, ဒီးလၢသူၣ်ဂ့ၢ်သးကျိၤအပူၤန့ၣ်လီၤ.

ပတၢ်အိၣ်မူတဖၣ် ကဘၣ်မ့ၢ်ဝဲဒၣ် တၢ်အိၣ်ကတဲာ်ကတီၤပာ်ပသးန့ၣ်လီၤ. အဆိကတၢၢ်န့ၣ်, ခီဖျိလၢပစူၢ်နာ် ကစၢ်ယ့ၣ်ရှူးအဃိ, မ့ၢ်ပအိၣ်ကတီၤပာ်ပသးလၢအတၢ်ဟဲက့ၤအဂီၢ်လံဧါန့ၣ် ပကဘၣ်မၤလီၤတံၢ်ဝဲဒၣ်န့ၣ်လီၤ. လၢခံတမံၤန့ၣ် “တၢ်နးတၢ်ဖှီၣ်လၢ ပမၤတၢ်ဂ့ၤအဃိ” (:၁၇) ဒၣ်လဲာ်, လၢကစၢ်ယွၤအတၢ်မၤအဂီၢ်, ပကဘၣ်အိၣ်ကတဲာ်ကတီၤပသးထီဘိန့ၣ်လီၤ. ခီဖျိလၢကစၢ်ယ့ၣ်ရှူး အတၢ်မၤစၢၤအပူၤန့ၣ် မ်ပကအိၣ်ကတဲာ်ကတီၤပသးန့ၣ်တက့ၢ်.