လၢအပူၤကွံာ်အါနံၣ်အါလါ, ပှၤလူၤကွၢ်ဃုဝဲ တၢ်ကတိၤ “တၢ်မုၢ်လၢ်” န့ၣ် အအါကတၢၢ်လၢ အ့ထၢၣ်နဲး ပှာ်ဘျးစဲ (internet) အပူၤန့ၣ်လီၤ. တၢ်လၢအလီၤကမၢကမၣ်န့ၣ်, တၢ်လူၤကွၢ်ဃု တၢ်ကတိၤ “တၢ်မုၢ်လၢ်” န့ၣ် အါနံၢ်ဒံး, ထံရူၢ်ကီၢ်သဲး အတၢ်ဂ့ၢ်ကီတဖၣ်, ဒီးတၢ်ဃုန့ၢ် ကျိာ်စ့လၢအ့ထၢၣ်နဲးန့ၣ်လီၤ. ပှၤကညီတဖၣ် လူၤဃုထံၣ်န့ၢ်အါထီၣ် တၢ်အိၣ်မူ အခီပညီဒိၣ်ဒိၣ်ယိာ်ယိာ်န့ၣ်လီၤ. လၢအပူၤကွံာ်နံၣ်တဖၣ်န့ၣ် တၢ်ထံၣ်လၢအဂ့ၤတကပၤတဖၣ် လီၤမၢ်ကွံာ်ဝဲဒၣ် ဒီးလၢအလီၢ်န့ၣ် တၢ်မၤအသး, ဒ်ပှၤကညီတဖၣ် ဘၣ်လဲၤခီဖျိဝဲ တၢ်နးတၢ်ဖှီၣ်တဖၣ် တပတီၢ်ဘၣ်တပတီၢ်ထီဘိန့ၣ်လီၤ. န့ဆၢၣ် အတၢ်မၤပျံၤတၢ်တဖၣ်, မုၢ်ကျိၤဝဲၤကွာ်အတၢ်မၤတဖၣ် တဂၢၢ်တကျၢၤ, ဒီးဒံၣ်ကၠ့းတဲၣ် (digital) စိၤဆၢကတီၢ်,
အတၢ်ဘၣ်ယိၣ်ဘၣ်ဘီတဖၣ်န့ၣ် ဒိၣ်စိလုၣ်ဘၢဝဲဒၣ် တၢ်ကစီၣ်အခိၣ်တီတဖၣ် ဒီးလၢ ပသူၣ်ကံၢ်သးလဲပူၤန့ၣ်လီၤ. လၢတၢ်ဂဲၤလိာ်ဒ်သိးအံၤတဖၣ်အပူၤန့ၣ် ပှၤကညီလၢအကကွဲၢ်တဖၣ် လူၤဃုကွၢ်ဝဲ တၢ်ကတိၤ “တၢ်မုၢ်လၢ်” လၢပှာ်ဘျးစဲအပူၤ, ဒ်သိးကဃုထံၣ်န့ၢ်ဝဲ တၢ်မုၢ်လၢ်လၢအလဲၤတလၢကွံာ် တၢ်သဘံၣ်ဘုၣ်တဖၣ်န့ၣ်လီၤ.
ယွၤမ့ၢ် ကစၢ်တဂၤလၢ အဒိၣ်န့ၢ်ထီန့ၢ် တၢ်သဘံၣ်ဘုၣ်တဖၣ်န့ၣ် စီၤပီလူး သ့ၣ်ညါနၢ်ပၢၢ်ဝဲဒၣ်န့ၣ်လီၤ. စီၤပီလူး အဲၣ်ဒိးဝဲလၢ ပှၤဝ့ၢ် ရိမ့ၤဖိ လၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ် ကသ့ၣ်ညါနၢ်ပၢၢ်ဝဲဒၣ် ကစၢ်ယွၤ မ့ၢ်တၢ်မုၢ်လၢ် အခီၣ်ထံး, ဒီးအနီၢ်ကစၢ်ဒၣ်ဝဲ မ့ၢ်တၢ်မုၢ်လၢ်, လၢအဝဲသ့ၣ်အဂီၢ်န့ၣ် ပှၤတၢ်မၤဖိ ကွဲးပာ်ဖျါဝဲလၢ “တၢ်မုၢ်လၢ်အကစၢ်” (ရိမ့ၤ ၁၅:၁၃) န့ၣ်လီၤ. စီၤပီလူး ဒုးသ့ၣ်နီၣ်ပှၤလၢ တၢ်မုၢ်လၢ်အမ့ၢ်အတီန့ၣ် တမ့ၢ်ဝဲဒၣ်တၢ်ထံၣ်ဆိကမိၣ်မှံတၢ်တမံၤ, (မ့) တမ့ၢ်တၢ်ထံၣ်လၢအဂ့ၤ တစိၤတလီၢ်ဖိဒီးဒံကွံာ် ဝဲဒၣ်ဘၣ်. မ့မ့ၢ်, တၢ်ပာ်လီၤနီၣ်သက့ၤလၢ ကစၢ်ယွၤ အသူးသ့ၣ်ကံၢ်စီ, ဒီးအတၢ်တီတၢ်လိၤအဖီခိၣ်န့ၣ်လီၤ. ဒီးအဝဲမၤလီၤတံၢ် ပတၢ်စူၢ်တၢ်နာ် ခီဖျိလၢအတၢ်အၢၣ်လီၤတဖၣ်န့ၣ်လီၤ. အဝဲမ့ၢ်စ့ၢ်ကီး, ပှၤလၢအကတဲာ်ကတီၤန့ၢ်ပှၤ “တၢ်ဝံသးစူၤ, ဒီးတၢ်မၤမုာ်” (:၅), ခီဖျိလၢအသးမုၢ်စီဆှံအစိကမီၤန့ၣ်လီၤ. လၢကစၢ်ခရံာ်အပူၤ, ကစၢ်ယွၤ တူၢ်လိာ်ပှၤန့ၣ် (:၇), ဒ်ပသ့ၣ်ညါနီၣ်ဝဲအသိး, ကယဲၢ်တၢ်အိၣ်အသးတဖၣ်အပူၤန့ၣ် တၢ်မုၢ်လၢ်အံၤ, ကအိၣ်စံာ်အိၣ်ကျၢၤဝဲ, ဒီးကမၤပှဲၤပသးလၢ တၢ်သးခု, ဒီးသးအတၢ်ဃူတၢ်မုာ်န့ၣ်လီၤ.
နမ့ၢ်လူၤကွၢ်ဃု တၢ်မုၢ်လၢ်န့ၣ်ဒီး, ဃာ်လိၤက့ၤနသးဆူ ယွၤအအိၣ်န့ၣ်တက့ၢ်. ဒ်နနာ်သန့ၤ အတၢ်အၢၣ်လီၤတဖၣ်, ဒီးဟံးဃာ် အတၢ်တီတၢ်လိၤအသိး, နကထံၣ်န့ၢ် တၢ်မုၢ်လၢ်အထူအယိာ်, တၢ်လၢပဃုထံၣ်န့ၢ် သ့ဝဲထဲ ကစၢ်ယွၤအအိၣ်န့ၣ်လီၤ.