တချုးလၢခံအကတၢၢ်တဘျီ, တီၤထီကၠိ တၢ်လိာ်ကွဲသတြီၤ တၢ်ကနိလိာ်သးအကတီၢ်, ဒ့း (Dave) အဂုၢ်ဃံလၢ အစုထွဲတဘိ ကၢ်ကွံာ်ဝဲဒၣ်န့ၣ်လီၤ. တၢ်လိာ်ကွဲသတြီၤန့ၣ် ဒ့း မၤနၢၤဝဲဘၣ်ဆၣ်, လၢအဂုၢ်ဃံကၢ်အပူၤန့ၣ် မ့ၢ်အမၤနၢၤတၢ်, ဒီးတုၤဃီၤဝဲဆူ တၢ်လိာ်ကွဲသတြီၤအကတၢၢ်တဘျီဒ်လဲၣ်န့ၣ် ကဲထီၣ် တၢ်ကမၢကမၣ်လၢအဂီၢ်န့ၣ်လီၤ. တၢ်လိာ်ကွဲသတြီၤအကတၢၢ်တဘျီန့ၣ် ဒ့း ဟဲၤဟးဝဲဆူ တၢ်ဒါအလိၤကယီကယီ, ဃၣ်အသးလၢအစုစ့ၣ် တကပၤ, လၢအဂုၢ်ဃံတဘၣ်ဒိဘၣ်ထံးတခီန့ၣ်လီၤ. လၢတၢ်န့ၣ်အဃိ, လၢတၢ်လိာ်ကွဲသတြီၤဒီတကတီၢ်, ပှၤလၢလိာ်ကွဲသတြီၤတၢ်ဒီးဒ့းန့ၣ် ပညိၣ်ဝဲဒၣ်ထဲအနီၢ်ကစၢ်လၢအစ့ၣ်တခီန့ၣ်လီၤ. တၢ်အံၤ, မ့ၢ် ဒ့း ဒီတဒၢ အဂုၢ်ဃံလၢအထွဲတခီ, တုၤအမၤနၢၤတၢ်တစုန့ၣ်လီၤ.

ပှၤအဂၤ, လၢအမံၤ မ့ၢ်ဝဲဒၣ် “စီၤဒၤဝံး” န့ၣ် ဒ်သိးကပူၤဖျဲးဝဲလၢ တၢ်ကီတၢ်ခဲအဂီၢ်, စူးကါဝဲ ကျဲကူၣ်တရံးတမံၤန့ၣ်လီၤ. စီၤဒၤဝံး ဘၣ်ဃ့ၢ်ပူၤဖျဲးအသးလၢ စီၤပၤစီၤစီလူး အတၢ်လူၤဃုမၤသံအီၤန့ၣ်လီၤ. အဝဲဃုထံၣ်န့ၢ် တၢ်အိၣ်တဒၢလီၢ် လၢအံၣ်စရ့လးဖိ အဒုၣ်အဒါတဖၣ်အအိၣ်န့ၣ်လီၤ. တယံာ်ဘၣ်, စီၤဒၤဝံး မ့ၢ်ပှၤဧ့ၤဘြံၤဖိ အပှၤသုးဖိအဒူအဃိၤတဂၤအဂ့ၢ်န့ၣ် ဟူထီၣ်သါလီၤဝဲဆူ ဒူၣ်ဒါ အစီၤပၤအအိၣ် (၁ ရှမူၤ ၂၁:၁၁) န့ၣ်လီၤ. လၢအသးသမူအဂီၢ်, စီၤဒၤစံး ပျံၤတၢ်ဘၣ်ယိၣ်တၢ်အဃိ, “ပာ်ပျုၢ်အသး……, ဒီးကွဲး တၢ်ကလီကလီလၢ ပဲတရီအတြဲၤလိၤ, ဒီးအထူးပျ့ၤထံ ယွၤလီၤလၢ အခၣ်ဆူၣ်အလိၤ” (:၁၃) န့ၣ်လီၤ. အတၢ်ကူၣ်န့ၣ် တၢ်မၤကဲထီၣ်ဝဲဒၣ် (:၁၄-၁၅) န့ၣ်လီၤ.

ပှၤဂ့ၤပှၤဝါတဖၣ် ကဂ့ၢ်လိာ်စံးကတိၤလိာ်သး ကျဲကူၣ်တရံး ဒ်သိးအံၤတဖၣ်, ဒီးတၢ်အစၢတဖၣ် ကဟဲထီၣ်အကလုာ်ကလုာ်န့ၣ်လီၤ. ဘၣ်ဆၣ်, ထါစံးထီၣ်ပတြၢၤ ၃၄ ဒုးနၢ်ပၢၢ်ပှၤလၢ စီၤဒၤဝံး အတၢ်လဲၤခီဖျိန့ၣ်လီၤ. လၢထါအပူၤန့ၣ် စီၤဒၤဝံး တကတိၤဒိၣ်ဝဲဒၣ် အကျဲကူၣ်တရံးအဂ့ၢ်ဘၣ်, မ့မ့ၢ်, ပာ်ဖျါထီၣ် ကစၢ်ယွၤ, လၢအအုၣ်က့ၤခီၣ်က့ၤအီၤတဂၤန့ၣ်လီၤ. စီၤဒၤဝံး သးဝံၣ်စံးထီၣ်ပတြၢၤဝဲ “ယဃုယွၤ, … ဒီးမၤပူၤမၤဖျဲးယၤလၢ ကယဲၢ်ယတၢ်ဘၣ်ယိၣ်ခဲလၢာ်အပူၤ” (:၄) န့ၣ်လီၤ. ဒီးစံးကဒီးဝဲဒၣ်လၢ “ပှၤဘၣ်ဖှီၣ် ဘၣ်ယာ်တဂၤအံၤ ကိးထီၣ်ဝဲ, ဒီးယွၤကနၣ်ဝဲ, ဒီးအုၣ်က့ၤခီၣ်က့ၤအီၤလၢ အတၢ်ကိၢ် တၢ်ဂီၤအပူၤခဲလၢာ်” (:၆) န့ၣ်လီၤ. စီၤဒၤဝံး ဃုဝဲ တၢ်ဘံၣ်တၢ်ဘၢလၢ ပှၤဖလ့ရှသးဖိတဖၣ်အအိၣ်ဘၣ်ဆၣ်, ထံၣ်န့ၢ်ဝဲ တၢ်အိၣ်တဒၢလီၢ်ထဲတတီၤဧိၤ, လၢအနာ်သန့ၤဝဲသ့န့ၣ် မ့ၢ်ဝဲဒၣ် ဖဲအဃၣ်တရံးအသးဆူ ကစၢ်ယွၤ အကတီၢ် (:၈,၂၂) န့ၣ်လီၤ.