ပျံၤဖးထီ, လၢအပာ်ဃုာ်ဒီးထးနါလၢအသဟီၣ်ဆူၣ်တဘိန့ၣ် James ကွံာ်လီၤဝဲဆူ နယူယီး ကမါတဖျၢၣ်အပူၤန့ၣ်လီၤ. “ပှၤလူၤဃု တၢ်လုၢ်ဒိၣ်ပှ့ၤဒိၣ်လၢ ထးနါ” တဂၤအံၤ ထုးထီၣ်ဝဲ အပျံၤန့ၣ်ဒီး, လၢအထးနါန့ၣ် ပာ်ထွဲဒီးတလါတဖျၢၣ် လၢအဘၣ်အၢဒီး ကပံာ်, ဒီးအပူၤန့ၣ် အိၣ်ပှဲၤဝဲဒီး စ့ဒီလၣ် ၁၀၀ တဖၣ်အဃိ, ကဲထီၣ် တၢ်ကမၢကမၣ်လၢအဂီၢ်ဒိၣ်မးန့ၣ်လီၤ. မ့ၢ်လၢ စ့ဒီလၣ်တဖၣ်အံၤ တဘၣ်ထွဲဒီးတၢ်ဂ့ၢ်တၢ်ကျိၤတဖၣ်လၢအလုၣ်သ့ၣ်ခါပတာ်သဲစးအဃိ, ပၢၤကီၢ်သ့ၣ်တဖၣ် စံးဘၣ် James လၢ ကဟံးဃာ် စ့ တဖၣ် သ့ဝဲဒၣ်န့ၣ်လီၤ. စ့ တနီၤနီၤန့ၣ် အတၢ်အိၣ်သးတဂ့ၤလၢၤဘၣ်အဃိ, တၢ်ကပာ်ဂၢၢ်ပာ်ကျၢၤအီၤအဂီၢ်, တမ့ၢ်ကသ့ဘၣ်. မ့မ့ၢ်, စ့ဒီလၣ် တနီၤနီၤန့ၣ် မၤကဆှီထီၣ်ဝဲ, ဒီးမုၢ်လၢ်ဝဲဒၣ်လၢ ဘၣ်သ့ၣ်သ့ၣ်, ကပှ့ၤန့ၢ် ဟံၣ်တဖျၢၣ်န့ၣ်လီၤ.”
တၢ်ဃုထံၣ်န့ၢ် တၢ်လုၢ်ဒိၣ်ပှ့ၤဒိၣ်လၢ အအိၣ်ခူသူၣ်တမံၤန့ၣ် မ့ၢ်တၢ်လီၤသူၣ်ဟူးသးဂဲၤ, ဒီးဘၣ်ဃးဒီးပှၤဃုထံၣ်န့ၢ်တၢ်ဒ်သိးအံၤတဂၤအဂ့ၢ်န့ၣ် ကစၢ်ယ့ၣ်ရှူး ပာ်ဖျါဝဲ တၢ်ကတိၤဟ့ၣ်ဒိ, “… တၢ်လၢမူခိၣ်အဘီမုၢ်န့ၣ်, မၤသးဒ်တၢ်လုၢ်ဒိၣ်ပှ့ၤဒိၣ်အိၣ်ခူသူၣ်လၢတၢ်ပျီပူၤတပူၤအသိးန့ၣ်လီၤ. ပှၤလၢအထံၣ်န့ၢ်ဝဲတဂၤန့ၣ်, မၤဘံးမၤဘၢအီၤဝံၤဒီး, လဲၤဆါလီၤကွံာ် ဖဲဒၣ်တၢ်အိၣ်ဒီးအီၤခဲလၢာ်လၢအသးခုအဃိ, ဒီးပှ့ၤန့ၢ်တၢ်ပျီပူၤတပူၤန့ၣ်လီၤ” (မးသဲ ၁၃:၄၄). တၢ်ထူးတၢ်တီၤလၢ အဃုထံၣ်န့ၢ်ဝဲတမံၤအလုၢ်အပှ့ၤန့ၣ် ပှၤတဂၤအံၤ သ့ၣ်ညါဝဲအဃိ, အသးအိၣ် ဆါလီၤကွံာ် အစုလီၢ်ခီၣ်ခိၣ်တဖၣ်ခဲလၢာ်, ဒ်သိးကပှ့ၤန့ၢ်ဝဲတၢ်လီၢ်တၢ်ကျဲ လၢအလုၢ်ဒိၣ်ပှ့ၤဒိၣ်တတီၤအံၤအဂီၢ်န့ၣ်လီၤ.
ပမ့ၢ်ဆိကမိၣ်ထီၣ် တၢ်ကတိၤဒိအံၤန့ၣ်ဒီး, တၢ်ထူးတၢ်တီၤ (မ့) တၢ်စုလီၢ်ခီၣ်ခိၣ်တဖၣ် လၢကဟ့ၣ်တုာ်က့ၤ ပတၢ်ဒဲးဘးအဒ့ၣ်ကမၢ်အပှ့ၤကလံၤအဂီၢ်, တၢ်တအိၣ်နီတမံၤဘၣ်. ထဲ ကစၢ်ယ့ၣ်ရှူးတဂၤဧိၤ, ဟ့ၣ် တၢ်အပှ့ၤကလံၤလီၤလီၤဆီဆီ သ့ဝဲဒၣ် ဒ်သိးကပှ့ၤက့ၤပှၤ, ဒီးကမၤဂ့ၤထီၣ်က့ၤ ပတၢ်ရ့လိာ်ဘၣ်ထွဲဒီးပၢ်ကစၢ်ယွၤ, ခီဖျိလၢအတၢ်တူၢ်သံအသး, ဒီးအတၢ်ဂဲၤဆၢထၢၣ်သမူထီၣ်က့ၤအပူၤန့ၣ်လီၤ.
ဟီၣ်ခိၣ် အတၢ်လုၢ်ဒိၣ်ပှ့ၤဒိၣ်တဖၣ် မ့ၢ်ဂ့ၤဝဲဘၣ်ဆၣ်, လီၤမၢ်သ့, ပှၤဟုၣ်န့ၢ်အီၤသ့ (မ့) ဘၣ်တၢ်မၤဟးဂီၤအီၤသ့ဝဲဒၣ်န့ၣ်လီၤ. ပကစံးဘျုးစံးဖှိၣ်, ဒီးတူၢ်လိာ် ကစၢ်ယ့ၣ်ရှူး လုၢ်ထီၣ်အသးသမူအဒိၣ်အထီကတၢၢ်လၢပဂီၢ်, ဒီးတၢ်မူအထူအယိာ် လၢအဟ့ၣ်ကလီပှၤ, ဒီးပကဘၣ်သ့ၣ်ညါလၢ ပအိၣ်မူဒီးအီၤ, လၢမူခိၣ်ဘီမုၢ်န့ၣ် မ့ၢ်တၢ်ဟ့ၣ်ကနၢၤအဒိၣ် ကတၢၢ်တမံၤလၢပဂီၢ်န့ၣ်လီၤ.