လံာ်လၢ အဘၣ်ယသးအဒိၣ်ကတၢၢ်အကျါတဘ့ၣ်န့ၣ် မ့ၢ်ဝဲဒၣ် “လံာ်တၢ်လီန့ၢ် မဲာ်ချံအတၢ်ထံၣ်,” မ့ၢ်လၢတၢ်ဂီၤတဖၣ် လီန့ၢ်ယမဲာ်ချံအတၢ်ထံၣ်အဃိ, ကဲထီၣ်တၢ်ကမၢကမၣ် လၢယဂီၢ်ထီဘိန့ၣ်လီၤ. အဒိ, ပနိကျိၤခံဘိန့ၣ် တုၤသိးလိာ်အသးဘၣ်ဆၣ်, လၢပမဲာ်ချံ အတၢ်ထံၣ်န့ၣ် ဖျါဝဲဒၣ် ဒ်တတုၤသိးလိာ်အသးအသိး, (မ့) ဃီသွါ လွံၢ်ဆိ, ဘၣ်ထွဲ ဘျးစဲလိာ်သးအက့ၢ်ဂီၤ, ဒီးဖျါဝဲဒၣ်ဒ်အကတၢၢ်တအိၣ်, (impossible staircase) န့ၣ်မ့ၢ်တၢ်လၢအမၤကဒံကဒါ ပမဲာ်ချံအတၢ်ထံၣ်န့ၣ်လီၤ. တၢ်မၤအသးဒ်သိးအံၤတဖၣ်န့ၣ် ဒုးသ့ၣ်ညါပှၤလၢ ပထံၣ်တၢ်တဖၣ်န့ၣ် တမ့ၢ်အတၢ်မ့ၢ်တၢ်နီၢ်နီၢ်ဘၣ်န့ၣ်လီၤ.

တၢ်မၤအသးဒ်သိးအံၤတဖၣ်န့ၣ် တမ့ၢ်ထဲ လီန့ၢ်ဝဲဒၣ် ပမဲာ်ချံအတၢ်ထံၣ်တဖၣ် န့ၣ်ဘၣ်. ဖဲပဘၣ်ကွၢ်ဆၢၣ်မဲာ် တနံၤဘၣ်တနံၤ ဟီၣ်ခိၣ်အတၢ်လီၤတၢ်ဝ့ၤတဖၣ်အဃိ, ပတၢ်မ့ၢ်တၢ်န့ၣ် မ့ၢ်ဝဲဒၣ် ဒ်ကစၢ်ယွၤအဖိအလံၤတဖၣ်န့ၣ် ပထံၣ်ကမၣ်နာ်ကမၣ် သ့ဝဲဒၣ်တလီၢ်လီၢ်န့ၣ်လီၤ. ပှၤကွဲးလံာ် ဟဲ(န)နရံၣ် နိၣ်ဝဲ(န) (Henri Nouwen) ကွဲးပာ်ဖျါ ဝဲဒၣ်လၢ “ကစၢ်ယ့ၣ်ရှူး ဟဲဝဲဒၣ် ဒ်သိးကဘိးဘၣ်သ့ၣ်ညါပှၤလၢ တၢ်တ့သူၣ်ထီၣ်
ပတၢ်မ့ၢ်တၢ်တမံၤ, လၢတၢ်မၤန့ၢ်မၤနၢၤ, တၢ်မံၤဟူသၣ်ဖျါ, ဒီးတၢ်စိကမီၤအဖီခိၣ်န့ၣ် မ့ၢ်ပတၢ်မ့ၢ်တၢ် လၢအကမၣ်, မ့ၢ်တၢ်လၢအလီန့ၢ် ပမဲာ်ချံအတၢ်ထံၣ်န့ၣ်လီၤ.”

မ့ၢ်လၢ ကစၢ်ယွၤ အတၢ်အဲၣ်ဘၣ်ပှၤဒိၣ်ဒိၣ်မုၢ်မုၢ်အဃိ, ဖဲပတူၢ်လိာ် ကစၢ်ယ့ၣ်ရှူး ဒ်ပတၢ်အုၣ်က့ၤခီၣ်က့ၤကစၢ်တဂၤအသိးန့ၣ် ပကဲထီၣ်ဝဲဒၣ် “ကစၢ်ယွၤအဖိတဖၣ်” (၁ ယိၤ ၃:၁) အဂ့ၢ်န့ၣ် ပစံးအီၤလၢ ပတၢ်မ့ၢ်တၢ်အမ့ၢ်အတီ, သ့ဝဲဒၣ်န့ၣ်လီၤ. ဒ်ပှၤတၢ်မၢဖိ စီၤယိၤဟၣ် သ့ၣ်ညါနီၣ်ဝဲအသိး, တလီၢ်လီၢ်န့ၣ် “ပသးပာ်တၢ်ကမၣ် လၢပလိၤ” (:၂၀), ဒီးပသးဒ့ဒီ ကစၢ်ယွၤ အတၢ်အဲၣ်, (မ့) မ့ၢ်မးပဘၣ်ထွဲဒီး ကစၢ်ယွၤ နီၢ်နီၢ်စ့ၢ်ကီးဧါအဂ့ၢ်န့ၣ် ပစးထီၣ် သံကွၢ်ဝဲဒၣ်န့ၣ်လီၤ. ဘၣ်ဆၣ်, “ယွၤန့ၣ် ဒိၣ်န့ၢ်ပသး, ဒီးသ့ၣ်ညါ တၢ်ခဲလၢာ်” (:၂၀) န့ၣ်လီၤ. တၢ်ထံၣ်ကမၣ် လၢအကမၤဘၣ်ဒိပှၤတဖၣ်, ကလီန့ၢ်ပှၤအလီၢ်န့ၣ် ပကနာ် တၢ်မ့ၢ်တၢ်တီလၢ ပမ့ၢ်ကစၢ်ယွၤ အဖိအလံၤ, လၢအအဲၣ်ဘၣ်ဝဲဒိၣ်မးတဖၣ် သ့ဝဲဒၣ်န့ၣ်လီၤ.

မုၢ်တနံၤအံၤ, ဖဲနဘၣ်ကွၢ်ဆၢၣ်မဲာ်ဒီးတၢ်ထံၣ်ကမၣ် နတၢ်မ့ၢ်တၢ်တမံၤဂ့ၤတမံၤဂ့ၤ, ဟံးဃာ်ဂၢၢ်ကျၢၤနဲ တၢ်မ့ၢ်တၢ်တီလၢ နမ့ၢ်ကစၢ်ယွၤအဖိ, လၢအအဲၣ်ဘၣ်နၤဒိၣ်ဒိၣ်ကလဲာ်န့ၣ်တက့ၢ်.