ဖဲအဝဲသ့ၣ် လဲၤဟးကသူၣ်ဒိးလိာ်ကွဲ ကဘီလွံၢ်ကထၢအကတီၢ်, ပၢ်တဂၤန့ၣ် သ့ၣ်ညါ ဝဲဒၣ်လၢ အဖိမုၢ်ယဲၢ်နံၣ်ဖိ လီၤတဲာ်ဆူ ပီၣ်လဲၣ်ပူၤန့ၣ်ဒီး, ဒ်သိးကအုၣ်က့ၤခီၣ်က့ၤ အဖိမုၣ်အဂီၢ်, ဖူစံၣ်လီၤဝဲဆူ ထံကျါ, ဒီးတၢ်လီၢ်အထီၣ်ထီ ကအိၣ်ဝဲဒၣ် ၄၀ ခီၣ်ယီၢ် န့ၣ်လီၤ. တချုးလၢကဘီအပှၤအုၣ်ခီၣ်တၢ်ဖိတဖၣ် ဆှၢက့ၤအဝဲသ့ၣ်ဘံၣ်ဘံၣ်ဘၢဘၢဆူ ကဘီအအိၣ်ဒံးဘၣ်န့ၣ် အဝဲဟံးဃာ်ဂၢၢ်ကျၢၤ အဖိမုၣ်ဖိ, ဒီးထိၣ်ထီၣ်ဖီအသးလၢ ထံမဲာ်ဖံးခိၣ်န့ၣ် ကယံာ်န့ၢ်ဒံး မံးနံးတဆံန့ၣ်လီၤ. ဖဲပၢ်တဂၤအံၤ နၢ်ဟူဝဲဒၣ် အဖိမုၣ်ဖိ ဘၣ်ကီဘၣ်ခဲအဂ့ၢ်န့ၣ်ဒီး, တကီၢ်ခါန့ၣ်, ဒ်သိးကမၤပူၤမၤဖျဲးအဖိမုၣ်အဂီၢ်, ကယဲၢ်တၢ်ခဲလၢာ်န့ၣ် စူးကွံာ်ညိကွံာ်ဝဲဒၣ်န့ၣ်လီၤ.
လၢလံာ်စီဆှံဒီဘ့ၣ်အပူၤန့ၣ် ပကဖးဘၣ်လၢ ပပၢ်အိၣ်လၢမူခိၣ်တဂၤ, ဒ်သိးပသုတလီၤအုးလၢ တၢ်ဒဲးဘးအပူၤအဂီၢ်, အတၢ်အဲၣ် ထိၣ်ဟူးထိၣ်ဂဲၤထီၣ်အီၤလၢ ကဟ့ၣ်လီၤဝဲဒၣ် ကယဲၢ်အတၢ်အိၣ်ဒီးအီၤခဲလၢာ်, ဒီးအုၣ်က့ၤခီၣ်က့ၤပှၤန့ၣ်လီၤ. ကစၢ်ယွၤ ဘိးဘၣ်ဒုးသ့ၣ်ညါဝဲဒၣ် အတၢ်အုၣ်က့ၤခီၣ်က့ၤ အတၢ်တိာ်ကျဲၤ အဆိကတၢၢ်, ဖဲဧ့ၤဒ့ၣ်တၤသၣ်လီၢ်န့ၣ်လီၤ. ခီဖျိလၢ ဂုၢ် အတၢ်ကူၣ်လီန့ၢ်ဝဲဒၣ် စီၤအၤဒၣ်ဒီးနီၢ်အံၣ်အု
ဒီးအဝဲသ့ၣ် မၤဘၣ်တၢ်ဒဲးဘး ဝံၤအလီၢ်ခံ, ဂုၢ်န့ၣ် ကစၢ်ယွၤ ဆိၣ်အၢဝဲ, ဒီးစံးဝဲဒၣ်လၢ “ယကဒုးထီဒုၣ်ဒါလိာ်နသးဒီးပိာ်မုၣ်, ဒီးနချံနသၣ်ဒီးပိာ်မုၣ်အချံအသၣ်န့ၣ်လီၤ. အဝဲဒၣ် ကမၤသဘှံးနခိၣ်, ဒီးနကမၤသဘှံးအခီၣ်နၢၣ်ခံ” (၁ မိၤ ၃:၁၅) န့ၣ်လီၤ. လံာ်စီဆှံတဆၢအံၤ အဲၣ်ဒိးပာ်ဖျါဝဲဒၣ် သူၣ်ဂ့ၢ်သးကျိၤအတၢ်ဒုးတၢ်ယၤအဂ့ၢ်လၢ မုၣ်ကီၤလံၢ်ဒီးယွၤအဖိအလံၤအဘၢၣ်စၢၤန့ၣ်လီၤ. ဒီးကစၢ်ယွၤ ကတဲာ်ကတီၤတ့ၢ်ဝဲဒၣ် အတၢ်ဆၢကတီၢ်လၢ ကဆှၢလီၤဝဲ အဖိခွါ, ကစၢ်ယ့ၣ်ရှူး, ဒ်သိးကအုၣ်က့ၤခီၣ်က့ၤ ပှၤဟီၣ်ခိၣ်ဖိတဖၣ် ခီဖျိအဖိခွါ အတၢ်စူးကွံာ်ညိကွံာ်အသးသမူ, ဒီးအတၢ်ဂဲၤဆၢထၢၣ်သမူထီၣ်က့ၤအဂ့ၢ်န့ၣ်လီၤ.
တချုးလၢပသ့ၣ်ညါ ပလိၣ်ဘၣ် အတၢ်မၤစၢၤလံၤလံၤန့ၣ် ကစၢ်ယွၤ အိၣ်ကတဲာ်ကတီၤပာ်အသးန့ၣ် ယံာ်တ့ၢ်မးလံန့ၣ်လီၤ. ဖဲပသးကလၢၢ်ဘၣ် ဒ်ပလီၤအုးဝဲဒၣ် လၢတၢ်ဒဲးဘး အထံယိာ်အပူၤ, တဘျီလၢ်လၢ်န့ၣ်, ကစၢ်ယ့ၣ်ရှူး မ့ၢ်ပသးသမူအပျံၤ- လၢကစၢ်ယွၤ ကတဲာ်ကတီၤန့ၢ်ပှၤ, ဒီးပဟံးန့ၢ်သးအဂံၢ်အဘါသ့ဝဲဒၣ် န့ၣ်လီၤ. ပကိးပသူထီၣ်ဆူ အအိၣ်သ့ဝဲဒၣ်န့ၣ်လီၤ. အဝဲကအုၣ်က့ၤခီၣ်က့ၤပှၤ, ဒီးကဆှၢက့ၤပှၤဆူ ပတၢ်လီၢ်တၢ်ကျဲအဘၣ်န့ၣ်လီၤ.