ယလံၤပိာ်ခွါဆံးဖိ ဟဲမံသကိးဒီးပှၤ, လၢပဟံၣ်အသီ, ဒီးတညီနုၢ်မံဝဲလၢ လီၢ်မံအသီန့ၣ်ဘၣ်. ယကတဲာ်ကတီၤန့ၢ်အီၤ ယၣ်ဒဲ လၢ ဒဲၢ်နိၣ်ဆီ (Dinosaur) အက့ၢ်အဂီၤအဖီလာ်, လၢယၣ်လုးလၢၤလၢၤဖိအလိၤန့ၣ်, ဖဲပဖးသကိးလံာ်အကတီၢ်, လၢတၢ်သူၣ်ပိၢ်သးဝးအပူၤန့ၣ် အဝဲနံၤဃိနံၤဃဲးဝဲဒၣ်န့ၣ်လီၤ. ဘၣ်ဆၣ်, တုၤလၢကဘၣ်မံအဆၢကတီၢ် န့ၣ်ဒီး, လၢတၢ်ဘၣ်ယိၣ်ဘၣ်ဘီအပူၤန့ၣ် သံကွၢ်ဝဲဒၣ် “ယမ့ၢ်လိၣ်ဘၣ်နၤန့ၣ် ယကဘၣ်ဟဲဃုနၤဒ်လဲၣ်” န့ၣ်လီၤ. ယဆိကမိၣ်ကူၣ်ထီၣ်ဖးလီၤတမံၤ, ဒီးယလဲၤဟံးန့ၢ် သတိၢ်ပျံၤအကဝီၤလၢ ပှၤဘိၣ်တၢ်ဟ့ၣ်တဖၣ် လၢပှၤပာ်တၢ်ဖိတၢ်လံၤအဒၢးပူၤန့ၣ်လီၤ. ဒီးပစၢထီၣ် သတိၢ်ပျံၤ, စးထီၣ်လၢအလီၢ်မံ, တုၤဆူ ယလီၢ်မံဒၢး, ဒ်သိးကကဲထီၣ် တၢ်နဲၣ်အီၤဆူ ယအိၣ်တၢ်အလီၢ်န့ၣ်လီၤ. ယစံးဘၣ်အီၤလၢ “ဘၣ်ယိၣ်တၢ်တဂ့ၤ. ဖဲမုၢ်နၤအကတီၢ်, နမ့ၢ်လိၣ်ဘၣ်ယၤန့ၣ်ဒီး, ဟဲလူၤပိာ် ပျံၤတဘိအံၤအခံ, ဒီးနကဃု
ထံၣ်န့ၢ်ယၤ” န့ၣ်လီၤ. ဒီးယလံၤခွါဖိန့ၣ် နံၤကမှံထီၣ်ဝဲဒၣ်န့ၣ်လီၤ.

ဖဲ လံာ်မးသဲ ၆ အပူၤန့ၣ် ပဘၣ်ဂဲၤလိာ်, ဒီးဘၣ်ယိၣ်ဘၣ်ဘီဝဲဒၣ်လၢ ပနီၢ်ခိက့ၢ်ဂီၤအဂီၢ်န့ၣ် ပကဘၣ်အိၣ်ဆိးအီၣ်အီဒ်လဲၣ်, ဒီးပကဘၣ်ကူသိးဒ်လဲၣ်အဂ့ၢ်န့ၣ် ကစၢ်ယ့ၣ်ရှူး စံးကတိၤဝဲဒၣ်လိၤလိၤ (မးသဲ ၆:၂၅) န့ၣ်လီၤ. တၢ်ကတိၤ “ဘၣ်ယိၣ်ဘၣ်ဘီ” (worry) န့ၣ် အိၣ်ဟဲဝဲဒၣ်လၢ ဟ့းလ့ၣ်ကျိာ်, ဒီးအခီပညီမ့ၢ်ဝဲဒၣ် “တၢ်ဃုထၢလဲၤသးသမူအတၢ်လဲၤကျဲခံဘိ, လၢအထီဒါလိာ်သး” လၢအမ့ၢ်, တၢ်စူၢ်တၢ်နာ်အတၢ်လဲၤကျဲ,
ဒီးတၢ်သန့ၤလီၤသးဒၣ်ဝဲအကျဲခံဘိန့ၣ်လီၤ. တၢ်ဘှါဆှဲ ပတၢ်ဘၣ်ယိၣ်ဘၣ်ဘီအဂီၢ်, ကစၢ်ယ့ၣ်ရှူး ဟ့ၣ်ထီၣ်ဝဲဒၣ်လၢ “ဃုဆိယွၤအဘီအမုၢ်, ဒီးအတၢ်တီတၢ်လိၤတက့ၢ်, ဒီးတၢ်ကပာ်ဖှိၣ် တၢ်န့ၣ်တဖၣ်ခဲလၢာ်လၢသု” (:၃၃) န့ၣ်လီၤ. တၢ်ကတိၤအံၤ, မ့ၢ်ဝဲဒၣ်တၢ်တၤလၢပဂီၢ်, ဒ်သိးပကဃုထၢလူၤပိာ် ကျဲတဘိလၢ အနဲၣ်ဆှၢပှၤလိၤလိၤဆူ ကစၢ်ယ့ၣ်ရှူးအသူၣ်ကံၢ်သးလဲအပူၤန့ၣ်လီၤ.

ဖဲပဘၣ်ဂုာ်ကျဲးစၢးဂဲၤလိာ်လၢပတၢ်ဘၣ်ယိၣ်ဘၣ်ဘီတဖၣ်အကတီၢ်, ပမ့ၢ်သ့ၣ်ညါလၢ ကစၢ်ယွၤ ကမၤလၢပှဲၤဟ့ၣ်လီၤပှၤ တၢ်လၢပလိၣ်တဖၣ်ခဲလၢာ်အဂ့ၢ်န့ၣ်ဒီး, “ပျံၤ” လၢအနဲၣ်ဆှၢပှၤဆူ ကစၢ်ယွၤ အဘီအမုၢ်, ကစၢ်ယွၤအကျိၤကျဲတဖၣ်, ဒီးယွၤအမဲာ်ညါန့ၣ် ပလူၤဃုပိာ်ထွဲ သ့ဝဲဒၣ်န့ၣ်လီၤ.