အဲလ့း(စ) (Elise) အတၢ်ပျံၤဘၣ်ယိၣ်တၢ်လၢအသးပူၤန့ၣ် ဟဲဒိၣ်ထီၣ်အါထီၣ်ဝဲဒၣ် န့ၣ်လီၤ. ကဘၣ်ထုးထီၣ်ဝဲ လံာ်အက့ၢ်ဂီၤဒိအဂီၢ်န့ၣ် တၢ်ဆၢကတီၢ်အိၣ်တ့ၢ်ဒၣ်ထဲတသီဧိၤန့ၣ်လီၤ. ဘၣ်ဆၣ်, ကဟၣ်လၢအထုးထီၣ်လံာ်, ဒီးတၢ်ဂီၤ (printer) န့ၣ် ဟးဂီၤ, ဒီးပှၤထုးထီၣ် တၢ်ဂီၤတဖၣ်တန့ၢ်ဘၣ်. တၢ်ကဘှီဂ့ၤထီၣ်က့ၤအဂီၢ်န့ၣ် ကယံာ်ဝဲဒၣ်ဒံး စှၤနံၤစှၤသီန့ၣ်လီၤ.

အဲလ့း(စ) အဝၤ, စဲ(မ) (Sam) စံးဘၣ်အီၤ, “ဘၣ်ယိၣ်တၢ်တဂ့ၤ. ပကဃ့ကစၢ်ယွၤ အတၢ်မၤစၢၤ, ဒီးပကမၤဝံၤအီၤ သီတနၤကျၢၤန့ၣ်လီၤ. ခီၣ်ဖၠူထၢၣ် အတၢ်ရဲၣ်တၢ်ကျဲၤ တထံၣ်အံၤ ကကဲထီၣ်တၢ်မၤစၢၤလၢ ပကဘှီဂ့ၤထုးထီၣ်က့ၤတၢ်ဂီၤချ့ချ့” န့ၣ်လီၤ.

ဖဲအဝဲသ့ၣ် ဃ့ထုကဖၣ်ဝဲအကတီၢ်, အဲလ့း(စ) အသးဂၢၢ်ထီၣ်မုာ်ထီၣ်ဝဲဒၣ်န့ၣ်လီၤ. အဝဲစံးလီၤက့ၤအသးလၢ “ကွၢ်ဃီၤထဲဒၣ်ဆူ ယွၤအိၣ်န့ၣ်တက့ၢ်” န့ၣ်လီၤ. ခီဖျိလၢ ယွၤအတၢ်ဟ့ၣ် သးအတၢ်ဃူတၢ်ဖိး, ဒီးအဝၤ Sam အတၢ်ဟ့ၣ်ကူၣ်အပူၤန့ၣ် အဲလ့း(စ) မၤဂ့ၤဘှီဘၣ်က့ၤတၢ်, ဒီးမၤဝံၤဝဲ အတၢ်မၤဘၣ်ဆၢဘၣ်ကတီၢ်န့ၣ်လီၤ.

ဒ်အဝဲမၤဝံၤအတၢ်မၤအသိး, အဲလ့း(စ) သ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ် အမူဒါဖးဒိၣ်လၢအမ့ၢ်, တၢ်ဘှီထီၣ်က့ၤ အဝ့ၢ်ခိၣ်ဒူ (နဃ့း ၄) အဂ့ၢ်န့ၣ်လီၤ. မူဒါတၢ်ဖံးတၢ်မၤန့ၣ် တမ့ၢ်တၢ်ဂ့ၢ်ကီဒိၣ်ဒိၣ်မုၢ်မုၢ်ဘၣ်ဆၣ်, ဒ်သိးကမၤဟးဂီၤ အဝဲသ့ၣ်အတၢ်မၤအဂီၢ်န့ၣ် ဒုၣ်ဒါတဖၣ် နံၤဘၣ်ဖၣ်လဲအဝဲသ့ၣ်, ဒီးကူၣ်အၢကူၣ်သီဝဲဒၣ်န့ၣ်လီၤ. ဘၣ်ဆၣ်, စီၤနဃ့မယၤ ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကကွၢ်ဃီၤတၢ်တဘိယူၢ်ဃီဆူ ယွၤအအိၣ်န့ၣ်လီၤ. စီၤယူဒၤ စံးဝဲဒၣ် “လၢပကစၢ်ဒၣ်ဝဲန့ၣ် ပမၤက့ၤတၢ်ခိၣ်ဒူတသ့ဘၣ်” န့ၣ်လီၤ. ဒီးစီၤနဃ့မယၤ စံးဆၢဝဲ “တၢ်ဒိၣ်, တၢ်ပျံၤတၢ်အလီၢ်, ယွၤတဂၤန့ၣ် သ့ၣ်နီၣ်ထီၣ်က့ၤအီၤ” (:၁၀,၁၄) န့ၣ်လီၤ. ဝံၤန့ၣ်ဒီး, ရဲၣ်လီၤဝဲ ပှၤလၢအကဘၣ်တ့ဘှီထီၣ် ဝ့ၢ်ခိၣ်ဒူ, ဒီးပှၤလၢကဘၣ်အိၣ်ခိးကွၢ် ဒုၣ်ဒါတဖၣ်, ဒီးပာ်ဝဲဒၣ် ခိၣ်နၢ်တဖၣ်လၢအလီၢ်ခံ (:၁၆) န့ၣ်လီၤ. ဒီးဟ့ၣ်ဂ့ၢ်ဟ့ၣ်ဘါစ့ၢ်ကီးဝဲ ပှၤဂီၢ်မုၢ်လၢ “ပကစၢ်ကဒုးတၢ်လၢပဂီၢ်” (:၂၀) န့ၣ်လီၤ.

ဖဲပဘၣ်ကွၢ်ဆၢၣ်မဲာ် တၢ်ဂ့ၢ်ကီအဒိၣ်အသွါတဖၣ်တဘျီလၢ်လၢ်, လၢတၢ်မၤစၢၤအဂီၢ်, ဒီးလၢတၢ်န့ၢ်ဂံၢ်န့ၢ်ဘါအဂီၢ်, မ်ပကကွၢ်ဃီၤတၢ်တဘိယူၢ်ဃီဆူ ကစၢ်ယွၤအအိၣ်န့ၣ်တက့ၢ်. ဒ်သိးပကဃုထံၣ်န့ၢ် တၢ်မၤအစၢနီၢ်နီၢ်အဂီၢ်, ပကထုကဖၣ် ဃ့တၢ်ကူၣ်သ့လၢကစၢ်ယွၤအအိၣ်, ဒီးခီၣ်ကါလၢအလိၣ်တဖၣ်န့ၣ် ပကကါထီၣ်အီၤ, ဒီးတၢ်အစၢကမ့ၢ်ဝဲဒၣ်တမံၤဂ့ၤတမံၤန့ၣ် နာ်သန့ၤကစၢ်ယွၤန့ၣ်တက့ၢ်.