ကီၢ် အဲကလံး ပီၣ်လဲၣ်ကၢၢ်နံၤ ကလံၤထံးတကပၤန့ၣ်, ပိာ်မုၣ်အိၣ်ဝဲ ခံဂၤ, ဒီးခံဂၤလိာ်အမံၤန့ၣ် မ့ၢ်ဝဲဒၣ် က့း (Kate), ဒီးအဝဲသ့ၣ်ပှ့ၤဆါဝဲဒၣ် ပှၤသံစိၣ်အတလါ (Coffin Club) န့ၣ်လီၤ. အဝဲသ့ၣ်ပညိၣ်ဒုးအိၣ်ထီၣ်ဝဲ တၢ်မၤအံၤန့ၣ် ဒ်သိးပှၤအိၣ်ဆိးလၢ လီၢ်ကဝီၤပူၤတဖၣ် လၢခံ အဝဲသ့ၣ်မ့ၢ်သံန့ၣ်ဒီး, ကရဲၣ်ကျဲၤဆိ, ဒီးဃုထၢမၤဃံမၤလၤ ပှၤသံစိၣ်အတလါ အဂီၢ်န့ၣ်လီၤ. ဖဲ Kate အပၢ်သံ အဆၢကတီၢ်, အသးအိၣ်ဒံးဒၣ် တဆံသၢနံၣ်, ဒီးအဝဲ ပာ်ဖျါဝဲဒၣ်လၢ “အကတီၢ်ဖဲန့ၣ် တၢ်လီၤပျံၤလီၤဖုးဒိၣ်မးန့ၣ်လီၤ. ပှၤတအဲၣ်ဒိးစံးကတိၤ တၢ်သံတၢ်ပှၢ်အဂ့ၢ်ဘၣ်” န့ၣ်လီၤ. ပှၤသံစိၣ်အတလါအကျးဖိအံၤ မ့ၢ်ကျိၤကျဲတထံၣ်, လၢတၢ်မၤညီနုၢ် တၢ်လဲၤခီဖျိတမံၤလၢ မုၢ်တနံၤ, ကယဲၢ်ပှၤကိးဂၤဒဲးကဘၣ်ကွၢ်ဆၢၣ်မဲာ်ဝဲဒၣ်န့ၣ်လီၤ.
တၢ်သံတၢ်ပှၢ်န့ၣ် ကယဲၢ်ပှၤကိးဂၤဒဲးကဘၣ်ကွၢ်ဆၢၣ်မဲာ်ဝဲဒၣ်အဃိ, ကမ့ၢ်ဝဲဒၣ် “တၢ်ညီနုၢ်မၤအသး” တမံၤန့ၣ်လီၤ. ဘၣ်ဆၣ်, ဖဲပထံၣ်ဘၣ် ကစၢ်ယ့ၣ်ရှူး စံးကတိၤတၢ်ဒီးနီၢ်မၢ်သၤ, အတံၤသကိးလၢ အအဲၣ်ဘၣ်ဝဲတဂၤ, ဖဲ အဒီပုၢ်ဝဲၢ်ခွါ သံဝံၤအလီၢ်ခံအဂ့ၢ်န့ၣ်ဒီး, ပှၤသ့ၣ်တဖၣ်လၢ အအဲၣ်ဘၣ် ကစၢ်ယ့ၣ်ရှူး, ဒီးမၤဝဲဒၣ် ကစၢ်အတၢ်မၤတဖၣ်န့ၣ် လၢတၢ်သံအဂီၢ်, ကတဲာ်ကတီၤဆိအသးသ့ဝဲဒၣ်ဒီး, တၢ်ပျံၤအလီၢ်တအိၣ်ဘၣ်န့ၣ်လီၤ. ကစၢ်ယ့ၣ်ရှူး အၢၣ်လီၤဝဲဒၣ် နီၢ်မၢ်သးလၢ စီၤလါစရူး “ကဂဲၤဆၢထၢၣ်က့ၤ” အဂ့ၢ် (ယိၤ၁၁:၂၃) န့ၣ်လီၤ. ကစၢ်ယ့ၣ်ရှူး စံးဘၣ် နီၢ်မၢ်သၤလၢ “ယဲဒၣ်အံၤယမ့ၢ်တၢ်ဂဲၤဆၢထၢၣ်က့ၤဒီးတၢ်မူလီၤ. ပှၤလၢအစူၢ်က့ၤနာ်က့ၤယၤန့ၣ်, မ့ၢ်သံဘၣ်ဆၣ်ဒီး, ကမူထီၣ်ဝဲလီၤ. ဒီးကယဲၢ်ပှၤလၢအမူဝဲ, ဒီးစူၢ်က့ၤနာ်က့ၤယၤတဂၤလၢ်လၢ်န့ၣ် တသံဘၣ်ဝဲနီတခီၣ်ဘၣ်” (:၂၅-၂၆) န့ၣ်လီၤ. နီၢ်မၢ်သၤ စံးဆၢက့ၤဝဲလၢ “ယနာ်လီၤ, ကစၢ်ဧၢ. ယနာ်လၢနမ့ၢ် ပှၤဟဲလီၤဆူဟီၣ်ခိၣ်ချၢ, ယွၤအဖိခွါ, ခရံာ်” (:၂၇) န့ၣ်လီၤ.
ပဝဲကိးဂၤဒဲး, တၢ်ကယၢကယဲ ပနီၢ်ကစၢ် အတၢ်သံစိၣ်တလါန့ၣ် ပအဲၣ်ဒိးမၤမ့ၢ်ဂ့ၤ, ပတအဲၣ်ဒိးမၤမ့ၢ်ဂ့ၤန့ၣ် လၢပတၢ်သံအဂီၢ်, ပအိၣ်ကတဲာ်ကတီၤဆိပသးသ့ဝဲဒၣ် ခီဖျိပမုၢ်လၢ်တၢ်လၢ ကစၢ်ယွၤအပူၤ, ဒီးနာ်သန့ၤ တၢ်အုၣ်က့ၤခီၣ်က့ၤလၢ ကစၢ်ယ့ၣ်ရှူး ဟ့ၣ်လီၤပှၤန့ၣ်လီၤ. ဖဲပသ့ၣ်ညါ ပသံဝံၤအလီၢ်ခံ ပကအိၣ်မူအိၣ်ဂဲၤဒံးဆူညါအဂ့ၢ်န့ၣ် ဟ့ၣ်ပှၤ တၢ်မၤမုာ်ထီၣ်က့ၤပသး, တၢ်မုၢ်လၢ်, ဒီးသးအတၢ်ဃူတၢ်ဖိးအမ့ၢ်အတီန့ၣ်လီၤ. ဒ် နီၢ်မၢ်သၤ အသိး, ပမ့ၢ်စူၢ်က့ၤနာ်က့ၤလၢ ကစၢ်ယ့ၣ်ရှူး န့ၣ် မ့ၢ်ဝဲဒၣ် မ့ၤရှံအၤ, ကစၢ်လၢ အအုၣ်က့ၤခီၣ်က့ၤတၢ်တဂၤန့ၣ်လီၤ.