တဘျီန့ၣ် ရှံၣ်ရိၣ် အိၣ်ကူၣ်နံၣ် (Shiro Oguni) လဲၤဟးအိၣ်သကိး ဟံၣ်လၢပှၤပာ် ပှၤသးပှၢ် လၢအခိၣ်နုာ် အတၢ်သ့ဆိကမိၣ်, သ့ၣ်နီၣ်တၢ် အဂံၢ်စၢ်တၢ်ဆါ (dementia) တဖၣ်န့ၣ်လီၤ. ပှၤသးပှၢ်တဖၣ်န့ၣ် ဘၣ်အိၣ်ယံၤဒီးပှၤတဝၢဖိအတၢ်ဟူးတၢ်ဂဲၤတဖၣ်အဃိ, အသးဘၣ်ဒိဘၣ်ထံးဝဲဒၣ်န့ၣ်လီၤ. ဒီး Oguni အသးကလၢၢ်ဘၣ်ဝဲလၢ ကျိၤကျဲဂ့ၤန့ၢ်အန့ၣ်တဘိ ကဘၣ်အိၣ်ဝဲဒၣ်န့ၣ်လီၤ. Oguni အတၢ်ကူၣ်ဆိကမိၣ်တမံၤန့ၣ်နဲၣ်ဆှၢအီၤလၢ တၢ်ဒုးအိၣ်ထီၣ် တၢ်အီၣ်ကျး, ပှၤသ့ၣ်ညါဝဲဒၣ်လၢ “မၤလိာ်အီၣ်အီတၢ်လၢအကဲထီၣ်တၢ်အီၣ်တၢ်အီအကမၣ်အကျး” (Restaurant of Mistaken Orders), န့ၣ်လီၤ. မ့ၢ်ဝဲဒၣ် တၢ်အီၣ်ကျးနီၢ်နီၢ်တဖျၢၣ်, ဖဲပှၤခိးကွၢ်ထွဲတၢ်ဖိတဖၣ် မ့ၢ်ပှၤသ့ၣ်တဖၣ်လၢအဘၣ်ဂဲၤလိာ်အသးဒီးခိၣ်နုာ်အတၢ်သ့ၣ်နီၣ်လီၤမၢ်န့ၣ်လီၤ. ကယဲၢ်ပှၤလၢအဟံးန့ၢ် မူဒါဒ်သိးအံၤတဖၣ်န့ၣ် အခိၣ်နုာ်အတၢ်သ့ၣ်နီၣ်ကဘၣ်ဂ့ၤဘၣ်ဆၣ်, ပှၤမၤတၢ်ဖိတဖၣ် လၢတၢ်အီၣ်ကျးတဖျၢၣ်အံၤ အတၢ်ဂံၢ်စၢ်အိၣ်ဝဲဒၣ် ဖဲန့ၣ်တကပၤန့ၣ်လီၤ. ပမ့ၢ်ကွၢ်လၢ ပနံာ်ကၤအတၢ်ထံၣ်န့ၣ်ဒီး, တၢ်မၤတကဲထီၣ်ဘၣ်. ပှၤဟဲအီၣ်တၢ်ဖိတဖၣ် မၤလိာ်ဝဲတၢ်အီၣ် အဘျီ ၃၇ မျးကယၤန့ၣ် တဒိးန့ၢ်တၢ်လၢအဝဲသ့ၣ်အဲၣ်ဒိးအီၣ်ဝဲန့ၣ်ဘၣ်. ဘၣ်ဆၣ်, တၢ်ဂ့ၢ်ကီ ဒ်သိးအံၤတဖၣ်န့ၣ် ပှၤဟဲအီၣ်တၢ်ဖိတဖၣ် မုၢ်လၢ်တ့ၢ်လံဝဲအဃိ, နၢ်ပၢၢ်စၢၤဝဲဒၣ်န့ၣ်လီၤ. တၢ်လၢပှၤတဆိကမိၣ်တဖၣ် မၤအသး, တၢ်ဃ့ကညးအၢၣ်လီၤတၢ်ကမၣ်, ဒီးတၢ်နံၤတၢ်အ့ လၢသူၣ်ကံၢ်သးလဲတဖၣ် ပိာ်ထွဲထီၣ်အခံဝံၤ, ဒီးပှၤဟဲအီၣ်တၢ်ဖိတဖၣ် က့ၤဝဲဒၣ်လၢ တၢ်သးခုအပူၤန့ၣ်လီၤ.

စီၤပီလူး ကွဲးပာ်ဖျါဝဲ “အိၣ်ဒီးတၢ်ဝံသးစူၤဃဲးဃဲး” (အ့း ၄:၂) အဂ့ၢ်န့ၣ် ပစံးအီၤညီဘၣ်ဆၣ်, ပကမၤအီၤအဂီၢ်, ကီဝဲခဲဝဲန့ၣ် ပသ့ၣ်ညါလီၤ. ဘၣ်မနုၤအဃိလဲၣ်န့ၣ်, တၢ်ကတိၤ “ကီၤသုသးသကိးသကိး” န့ၣ် အခီပညီအိၣ်ဝဲအကလုာ်ကလုာ်, “တၢ်ဝံစိာ်,” “တူၢ်န့ၢ် ခီၣ်န့ၢ်တၢ်လၢတၢ်သးစွံကတုၤ,” ဒီး “တၢ်ဆီၣ်ထွဲမၤစၢၤ” န့ၣ်လီၤ. ပစံးအီၤသ့ဝဲဒၣ် အဂၤတမံၤန့ၣ် တၢ်မၤအံၤ ပာ်ဃုာ်ဒီး တၢ်ထဲးဂံၢ်ထဲးဘါန့ၣ်လီၤ. ဘၣ်ဆၣ်, တၢ်ထဲးဂံၢ်ထဲးဘါ အဂံၢ်ထံး မ့ၢ်အိၣ်ဝဲလၢ ကစၢ်ယွၤအတၢ်အဲၣ်အပူၤန့ၣ်ဒီး, ပတၢ်ဝံဃၢတဖၣ် ကဘီၣ်ကညီ, ဒီးကဆှၢပှၤဆူ တၢ်သးဖှံသးမုာ် အတၢ်အိၣ်မူ, ကအိၣ်ပှဲၤဝဲဒီးတၢ်လၢပှၤတဆိကမိၣ် တဖၣ်, တၢ်ဃ့ကညးအၢၣ်လီၤတၢ်ကမၣ်တဖၣ်, ဒီးတၢ်နံၤတၢ်အ့တဖၣ်ဒၣ်လဲာ်န့ၣ်လီၤ. ဖဲနဃ့ထီၣ် တၢ်အိၣ်မူအကျိၤကျဲတမံၤအံၤ, နမ့ၢ်တဒိးန့ၢ်အီၤဘၣ်ဆၣ်, “ဒ်သိးသုကလဲၤ ဒ်အကြၢးဒီးတၢ်ကိးလၢ တၢ်ကိးက့ၤသုအသိး” (:၁), အကတၢၢ်န့ၣ် နကဒိးန့ၢ် တၢ်အိၣ်မူလၢပဝဲကိးဂၤဒဲး ပသးအိၣ်ဒိးန့ၢ်ဘၣ်ဝဲနီၢ်နီၢ်န့ၣ်လီၤ.