မိၢ်တဂၤ, လဲၤနီၣ်ဆှၢဝဲ အဖိခွါ အသးအိၣ် ၉ နံၣ်တဂၤဆူ သးစၢ်တၢ်မၤလိ (camp) အကတီၢ်, အတၢ်လဲၤကျဲကမၣ်, ဖဲ စံၣ်အဲရၤ နံၣ်ဘါဒါ (Sierra Nevada) အကစၢၢ်, ခိခိၣ်ပှၢ်လၢ်ကျါအကျဲတဖၣ် လၢ ကီၢ်စဲၣ် California, ဒီးကလဲၤနီၣ်သိလ့ၣ်ဆူညါ အဂီၢ်န့ၣ် ဃုထံၣ်က့ၤကျဲတဘၣ်လၢၤဘၣ်န့ၣ်လီၤ. မ့ၢ်လၢတၢ်လီၢ်အိၣ်စီၤစုၤအဃိ, အ GPS, ဒီးအလီတဲစိတဖၣ် တမၤတၢ်လၢၤဘၣ်. တၢ်ဆၢကတီၢ်ယံာ်တ့ၢ်ဝဲအါန့ၢ် (၂၄) နၣ်ရံၣ် လံဘၣ်ဆၣ်, အဝဲသ့ၣ် ဟးထီၣ်လၢ တၢ်လီၢ်အံၤတသ့ဘၣ်အဃိ, လၢတၢ်မုၢ်လၢ်တအိၣ်လၢၤဘၣ်အပူၤန့ၣ် ဘၣ်မံဝဲဒၣ် လၢအသိလ့ၣ်ပူၤတနၤ, ဒီးအဝဲသ့ၣ် စးထီၣ်လဲၤတၢ် လၢအခီၣ်န့ၣ်လီၤ. အတၢ်လဲၤကျဲဒီဘိန့ၣ် အဝဲသ့ၣ် ပာ်တ့ၢ်ဝဲဒၣ် တၢ်ကွဲးဖုၣ်ဖိတဖၣ် လၢအစံး, “ပလိၣ်ဘၣ်တၢ်မၤစၢၤလီၤ. ယၤဒီးယဖိခွါ ပကျဲလီၤမၢ်, ဒီးပစူးကါ လီတဲစိ တန့ၢ်ဘၣ်အဃိ, ပကိးဃ့ (၉၁၁) ဂ့ၢ်ဂီၤအူတၢ်မၤစၢၤတန့ၢ်ဘၣ်” န့ၣ်လီၤ. မ့ၢ်လၢအဝဲသ့ၣ် တလဲၤတုၤဝဲဒၣ်ဆူ တၢ်မၤလိအလီၢ် ဘၣ်ဆၢဘၣ်ကတီၢ်အဃိ, ပှၤလူၤဃု-မၤစၢၤတၢ် အကရူၢ်ဖိတဖၣ် လူၤဃုထံၣ်န့ၢ်က့ၤအဝဲသ့ၣ်န့ၣ်လီၤ. ပှၤဃုထံၣ်န့ၢ် သိလ့ၣ်, လံာ်ဖုၣ်ဖိတဖၣ်ဝံၤ, တယံာ်ဘၣ်, အမိၢ်ဒီးအဖိခံဂၤန့ၣ် ပှၤဃုထံၣ်န့ၢ်က့ၤဝဲဒၣ်န့ၣ်လီၤ.
ပှၤအဲၤကူပတူးဖိတဖၣ် အတၢ်မၢကဲကုၢ် ပှၤအံၣ်စရ့လးဖိတဖၣ် အၢအၢသီသီအဃိ, လၢတၢ်မုၢ်လၢ်တအိၣ်လၢၤဘၣ်အပူၤန့ၣ် ပှၤအံၣ်စရ့လးဖိတဖၣ် ကိးပသူထီၣ်ဝဲဒၣ် ကစၢ်ယွၤ (၂ မိၤ ၁:၁၁-၁၂) လၢတၢ်မၤစၢၤအဂီၢ်န့ၣ်လီၤ. “ပှၤအဲၤကူပတူးဖိတဖၣ် မၤနးမၤဖှီၣ် ပှၤအံၣ်စရ့လးဖိတဖၣ် ခီဖျိတၢ်မၤဆူၣ်မၤနၢၤလၢ တၢ်ကဲကုၢ်အတၢ်ကီတၢ်ခဲအပူၤ… တသးကညီၤဘၣ်ဝဲနီတစဲးဘၣ်” (:၁၃-၁၄, ခ့ခါ) န့ၣ်လီၤ. ဘၣ်သ့ၣ်သ့ၣ်, ပှၤအံၣ်စရ့လးဖိတဖၣ် ကဆိကမိၣ်ဝဲဒၣ်လၢ တၢ်မၤအၢမၤသီအဝဲသ့ၣ်တဖၣ်န့ၣ် တူၢ်ဝဲ ခီၣ်ဝဲ တမ့ၢ်ကန့ၢ်လၢၤဘၣ်န့ၣ်လီၤ. ဘၣ်ဆၣ်, အပှၤဂီၢ်မုၢ် ကိးပသူထီၣ်ဆူအအိၣ်န့ၣ် ကစၢ်ယွၤ နၢ်ဟူဝဲဒၣ်, ဒီးဒ်သိးကမၤပူၤဖျဲး အပှၤဂီၢ်မုၢ်အဂီၢ်, ဃုထၢထီၣ်ဝဲဒၣ် စီၤမိၤရှ့ (၃:၄-၁၀) န့ၣ်လီၤ. အကတၢၢ်န့ၣ် ကစၢ်ယွၤ စူးကါဝဲဒၣ် စီၤမိၤရှ့ ဒီးအုၣ်က့ၤခီၣ်က့ၤ အပှၤဂီၢ်မုၢ်, ဒီးဒုးဟးထီၣ်ဝဲလၢ ကီၢ်အဲၤကူပတူးအပူၤန့ၣ်လီၤ. (ကွၢ်ဖဲ ၂ မိၤ ၁၄-၁၅).
ဖဲပသးကလၢၢ်ဘၣ်လၢ ပကျဲလီၤမၢ်, (မ့) လၢတၢ်တတီတလိၤအပူၤ, ပဘၣ်တၢ်မၤအၢ မၤနးပှၤအကတီၢ်, ထီဘိန့ၣ် ကစၢ်ယွၤ အိၣ်ဘူးဒီးပှၤ, ဒီးဒိကနၣ်ဝဲ ပတၢ်ကိးပသူထီၣ်ဆူအအိၣ်န့ၣ်လီၤ. ကစၢ်ယွၤ လၢအဆၢကတီၢ်, ဒီးလၢအကျိၤကျဲဒၣ်ဝဲန့ၣ်, ကဆှၢလီၤဝဲဒၣ် တၢ်မၤစၢၤ, လၢပလိၣ်ဘၣ်န့ၣ်လီၤ.