ဖဲယသိၣ်လိတၢ်လၢ တၢ်မၤလိလံာ်ဒၢးပူၤအကတီၢ်, တၢ်ဟဲဘၣ်ဒိအကလုၢ်ဖးဒိၣ်တထံၣ် သီၣ်ထီၣ်ဝဲဒၣ်လၢ ပဲတြီဖိတဘ့ၣ်န့ၣ်ဒီး, ကၠိဖိတဖၣ် ဖုးသံပျီၢ်သံဘၣ်အသးန့ၣ်လီၤ. တၢ်ဟဲဘၣ်ဒိ ပဲတြီဖိအကလုၢ်န့ၣ် သီၣ်ထီၣ်ဝဲဒၣ်လၢခံတဘျီန့ၣ်လီၤ. ထိၣ်ဖိတဘ့ၣ် ယူၤနုာ်လီၤဘျၢၣ်ဝဲဒၣ် ပဲတြီဖိအယွၤခၣ်စိး, ဒီးဖျိးကွံာ်ဝဲဒၣ်, ဒီးဟဲက့ၤယူၤကဒါက့ၤဝဲ, ဒီးဘၣ်ဒိဘၣ်ထံးကဒီးလၢခံတဘျီန့ၣ်လီၤ. လၢခံန့ၣ်, ယဖးဘၣ်လၢ ထဲကီၢ်အမဲရကၤ တဘ့ၣ်ဧိၤအပူၤန့ၣ် ထိၣ်အဘ့ၣ်အါန့ၢ်အကကွဲၢ် တကထိတဖၣ်သံဝဲဒၣ်ကိးနံၣ်ဒဲး, ခီဖျိလၢအဟဲနုာ်လီၤဘျၢၣ် ပဲတြီဖိတဖၣ်အဃိန့ၣ်လီၤ. ဖဲ ထိၣ်ဖိသ့ၣ်တဖၣ်, ထံၣ်ဝဲ တၢ်မုၢ်တၢ်ဘိအက့ၢ်ဂီၤတဖၣ် ဆဲးကပီၤဖျါကဒါက့ၤလၢ ပဲတြီဖိတဖၣ် အလိၤ, ဒီးအဝဲသ့ၣ် ဆိကမိၣ်ဝဲဒၣ်လၢ အဝဲသ့ၣ် ထံၣ် တၢ်အီၣ် (မ့) တၢ်ဖိတၢ်လံၤ ပိးလီလၢ အကတ့အသွံအဂီၢ်အဃိ, ဟဲယူၤနုာ်လီၤဝဲဒၣ်, ဒီးတၢ်ဘၣ်ဒိဘၣ်ထံးတဖၣ် ကဲထီၣ်အသးန့ၣ်လီၤ. ဘၣ်တဘျီဘျီန့ၣ် ထိၣ်ဖိတဖၣ် ထံၣ်လီၤက့ၤ အနီၢ်ကစၢ်ဒၣ်ဝဲ, ဒီးဆိကမိၣ်ဝဲဒၣ်လၢ ထိၣ်အဂၤတဘ့ၣ် လၢအကဘၣ်တြီဆၢကွံာ်ဝဲဒၣ်န့ၣ်လီၤ. ထိၣ်ဖိတဖၣ် ထံၣ်တၢ်လီၤတံၢ်လီၤဆဲးဘၣ်ဆၣ်, လၢအဝဲသ့ၣ်အသးပူၤန့ၣ်တၢ်သးသဘံၣ်ဘုၣ်အိၣ်ဝဲဒၣ် လၢအတၢ်ထံၣ်အဖီခိၣ်န့ၣ်လီၤ.

တၢ်လၢပထံၣ်တဖၣ်န့ၣ် ပမ့ၢ်ဆိကမိၣ်လၢ မ့ၢ်ဝဲတီဝဲဒၣ်ထီဘိ, ဒီးလၢပသးပူၤန့ၣ် ပအိၣ်ဒီးတၢ်ထံၣ်ဆှံထီဘိ လၢပတၢ်အိၣ်မူအဂီၢ်န့ၣ်ဒီး, တၢ်ဘၣ်ယိၣ်အလီၢ်အိၣ်ဝဲဒၣ်န့ၣ်လီၤ. ဘၣ်ဆၣ်, ပတူၢ်ဘၣ်ခီၣ်ဘၣ် သးအတၢ်သဘံၣ်ဘုၣ်လၢ အလီၤဘၣ်ယိၣ်တဖၣ်, ဒီးပသးအတၢ်သဘံၣ်ဘုၣ်တဖၣ်န့ၣ် ပမ့ၢ်ဘှါဆှဲအီၤထဲဒၣ်လၢ ပတၢ်ကူၣ်သ့ အဂ့ၤကတၢၢ်ဒၣ်လဲာ်, အကတၢၢ်န့ၣ် ကဒုးအိၣ်ထီၣ် တၢ်ဂ့ၢ်ကီဒိၣ်ဒိၣ်ကလဲာ်န့ၣ်လီၤ. လံာ်တၢ်ကတိၤဒိ စံးဘၣ်ပှၤ, “ကျဲလၢအလိၤဝဲလၢ ပှၤကညီအမဲာ်ညါ, ဒီးအကတၢၢ်မ့ၢ် တၢ်သံအကျဲန့ၣ် အိၣ်ဝဲတဘိ” (၁၆:၂၅) န့ၣ်လီၤ. ပဆိကမိၣ်လၢ ပထံၣ်သ့ၣ်ညါ တၢ်အမ့ၢ်အတီနီၢ်နီၢ်ဘၣ်ဆၣ်, အါစုအါဘျီန့ၣ် ပအိၣ်ဒီးသးအတၢ်သဘံၣ်ဘုၣ်တဖၣ် န့ၣ်လီၤ. ပသးအတၢ်ထံၣ်ဆိကမိၣ် အဒိၣ်အထီကတၢၢ်ဒၣ်လဲာ်, အိၣ်ပှဲၤဒီးတၢ်နၢ်ပၢၢ် လၢအကမၣ်တဖၣ်န့ၣ်လီၤ. ပတၢ်ထံၣ်စိအဆှံကတၢၢ်ဒၣ်လဲာ်, တဖျါဆှံ, တၢ်လီၤတုာ်
လီၤကာ်အိၣ်ဒံးဝဲအဖၢမုၢ်, ဒီးဒုးအိၣ်ထီၣ် တၢ်ဟးဂုာ်ဟးဂီၤတလီၢ်လီၢ်န့ၣ်လီၤ.

လၢတၢ်န့ၣ်အဃိ, ပလိၣ်ဘၣ်ယွၤအတၢ်ကူၣ်သ့ (:၂၀-၂၁) န့ၣ်လီၤ. ဒ်သိးကစၢ်ယွၤ ကလ့ကပီၤထီၣ် တၢ်မ့ၢ်တၢ်တီ, ဒီးကနဲၣ်ဆှၢပှၤဆူ တၢ်အမ့ၢ်အတီနီၢ်နီၢ်အဂီၢ်န့ၣ် ပလိၣ်ဘၣ်ယွၤန့ၣ်လီၤ. ပလိၣ်ဘၣ်ယွၤ ဒ်သိးကထုးထီၣ်ပှၤ လၢပသးအတၢ်သဘံၣ်ဘုၣ် လၢအလီၤဘၣ်ယိၣ်, ဒီးနဲၣ်ဆှၢပှၤဆူ တၢ်လၢတၢ်ပှဲၤ, ဒီးတၢ်မူအဂီၢ်န့ၣ်လီၤ.