လၢပဟံၣ်တြဲၤအမဲာ်ညါ ဒၢးခီဃီသွါ, အသနၢၣ်ဖိတတီၤန့ၣ်, ဘံၣ်ကိနံယါ (begonia) ဖီအဂီၤဆှုၣ်ဖိ လၢအသးကိၤတမုၢ် အိၣ်ဝဲဒၣ်န့ၣ်လီၤ. ပတသူၣ်လီၤအီၤဘၣ်. ကုလၢတၢ်ဘျး လီၤစဲၤသးတဖျၢၣ်အပူၤန့ၣ် တၢ်ချံဖိတဖျၢၣ် ကလီၤတဲာ်ဝဲသ့ၣ်သ့ၣ်, ဒီးကဟဲမဲထီၣ်ဝဲဒၣ်န့ၣ်လီၤ. ဘၣ်ဆၣ်, ပပျဲဖီအမုၢ်ဖိန့ၣ် ကအိၣ်ဝဲဒၣ် ဖဲအလီၢ်ဖိန့ၣ်လီၤ. တနံၣ်ဘၣ်တနံၣ်, ဖီဖိတမုၢ်အံၤ မၤဖှံသူၣ်ဖှံသး ယမါသးဘိဒီးယၤ, ဒီးဒုးသ့ၣ်နီၣ်ထီၣ်က့ၤပှၤလၢ တၢ်ပာ်သးစွံကတုၤန့ၣ် မ့ၢ်တၢ်ဃံတၢ်လၤတမံၤအဂ့ၢ်န့ၣ်လီၤ.
ဒ်သိးပကအိၣ်ဒီးတၢ်ဝံသးစူၤ, လီၤဆီဒၣ်တၢ်, ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးသ့ၣ်တဖၣ် လၢအဘၣ်ကွၢ်ဆၢၣ်မဲာ် တၢ်ထီဒါမၤအၢမၤနးတဖၣ်အဂီၢ်, စီၤယၤကိာ် ဟ့ၣ်ထီၣ်ဝဲ တၢ်ကတိၤဟ့ၣ်ဂံၢ်ဟ့ၣ်ဘါအဃံအလၤဒိၣ်န့ၢ်အန့ၣ်တထံၣ်, “တုၤသုလီၤလၢ တၢ်လ့ပစီအကလုၢ်ကလုာ်အပူၤဒီး, ပာ်အီၤလၢ တၢ်သူၣ်ခုသးခုခဲလၢာ်တက့ၢ်. အဂ့ၢ်ဒ်အံၤ, သုသ့ၣ်ညါလၢ တၢ်မၤကွၢ်သုတၢ်နာ်န့ၣ်, ဒုးအိၣ်ထီၣ် တၢ်ဝံသးစူၤ” (ယၤကိာ် ၁:၂-၃) န့ၣ်လီၤ.
ပကတူၢ်လိာ် တၢ်ကတိၤ “တၢ်သူၣ်ခုသးခု” အဂီၢ်န့ၣ် ပသးတဆူၣ်ဘၣ်ဆၣ်, ပှၤတၢ်မၢဖိ ကွၢ်စိဝဲဒၣ် တၢ်မ့ၢ်တၢ်တီတမံၤန့ၣ်, ယွၤအစိကမီၤအိၣ်ဝဲလၢ တၢ်ခဲလၢာ်အဖီခိၣ်, ဒီးလၢတၢ်အိၣ်အသးမၤအသးအကီအခဲတဖၣ်အပူၤဒၣ်လဲာ်, ဒုးအိၣ်ထီၣ် တၢ်ဂ့ၤတၢ်ဝါသ့ဝဲဒၣ်န့ၣ်လီၤ. စီၤယၤကိာ် မၤကတၢၢ်ဝဲ အတၢ်ဆိကမိၣ်, ဒီးစံးဝဲဒၣ် “ပှၤလၢအဒိးဘၣ်တၢ်လ့ပစီန့ၣ်, ဘၣ်ဆိၣ်ဂ့ၤဝဲလီၤ. အဂ့ၢ်ဒ်အံၤ…. ကန့ၢ်ဘၣ်တၢ်မူအခိၣ်သလုးလၢ ကစၢ်စံးပာ်လၢ ပှၤလၢအအဲၣ်အီၤတဖၣ်အဂီၢ်” (:၁၂) န့ၣ်လီၤ. တၢ်ကတိၤအဖျၢၣ် “ဘၣ်ဆိၣ်ဂ့ၤ” စံးတၢ်န့ၣ် မ့ၢ်တၢ်ကတိၤတဖျၢၣ်ဃီလၢ ကစၢ်ယ့ၣ်ရှူး စူးကါဝဲဒၣ် ဖဲအစံၣ်တဲၤတဲလီၤတၢ်လၢကစၢၢ်ဒီခိၣ် (မး ၅:၄-၁၂) အကတီၢ်, ဒီးအခီပညီအဂၤတဖၣ်အကျါတမံၤန့ၣ် မ့ၢ်ဝဲဒၣ် “တၢ်သူၣ်ခုသးခု” န့ၣ်လီၤ.
တၢ်လၢပဘၣ်ကွၢ်ဆၢၣ်မဲာ်တမံၤဂ့ၤတမံၤဂ့ၤ, ပာ်ဃုာ်ဒီးနီၢ်သး အတၢ်ဒုးတၢ်ယၤ, ဒီးလၢပတၢ်အိၣ်မူအတၢ်တၤအကီအခဲတဖၣ်အပူၤန့ၣ်, ကစၢ်ယွၤ ကဟံးဃာ်ပှၤဂၢၢ်ဂၢၢ်ကျၢၤကျၢၤ, လၢအတၢ်အဲၣ်အပူၤ, ဒီးမုၢ်တနံၤန့ၣ် ကစၢ်ယွၤ ကမၤလၤကပီၤပှၤလၢအတၢ်သူၣ်ခုသးခုအဃံအလၤ, လၢအတၢ်သးကညီၤအပူၤန့ၣ်လီၤ.
