ထံဟဲယွၤလီၤသီၣ်ဝဲဒၣ် အကလုၢ်န့ၣ် မၤလီၤတံၢ်ဝဲဒၣ် ယဟဲတုၤဆူ တၢ်သ့ၣ်နီၣ်ထီၣ် ၉/၁၁ အကမါတဖၣ် (9/11 Memorial Pools) လၢ ဝ့ၢ်နယူယီး, တၢ်လီၢ်လၢ ယပဒ့ၣ် ဟးဆှဲးတ့ၢ်ယဲတတီၤန့ၣ်လီၤ. အဂ့ၢ်ဒ်အံၤ, ယဘၣ်ယိၣ်ယဲလၢ တၢ်သူၣ်တမုာ်သးတမုာ်ဖးဒိၣ် ကလုၢ်ဘၢယၤ, ခီဖျိလၢတၢ်လီၤသးအုးအမုၢ်တနံၤ, မၤတ့ၢ်အသး ဖဲ ၂၀၀၁ နံၣ်အဃိန့ၣ်လီၤ. ယလဲၤဟးတရံး ကမါဖးလဲၢ်ခံတီၤ, တဘျီန့ၣ် တၢ်သူၣ်ထီၣ်တဃံာ်ဖးထီ ခံဖျၢၣ် (Twin Towers) အိၣ်ဆၢထၢၣ်တ့ၢ်ဝဲ အလီၢ်အကျဲန့ၣ်လီၤ. ဖဲပထံၣ်ဘၣ် ကယဲၢ် ပှၤလၢအသံတ့ၢ်တဖၣ်အမံၤခဲလၢာ်န့ၣ် ဘၣ်တၢ်ကွဲးနီၣ်ဃာ်အီၤလၢ တၢ်ဒူၣ်တဖၣ် အလိၤန့ၣ် မ့ၢ်တၢ်လၢအလီၤသးအုးဒိၣ်မးတမံၤန့ၣ်လီၤ. ပှၤအမံၤတနီၤအလိၤန့ၣ် ပှၤလၢအအဲၣ်ဘၣ်အဝဲသ့ၣ်တဖၣ် ဟဲပာ်ဃာ်ဝဲဒၣ် ဖီတၤဆှုၣ်တဖၣ်န့ၣ်လီၤ.

ဖဲလါစဲးပထ့ဘၢၣ် (၁၁) သီဂီၤခီန့ၣ်, ယအိၣ်ဝဲဒၣ် ဖဲ Manhattan ဘၣ်ဆၣ်, တမ့ၢ်လၢ တၢ်သူၣ်ထီၣ်တဃံာ်ဖးထီခံဖျၢၣ် အကပၤဘၣ်အဃိ, ယစံးဘျုးယွၤန့ၣ်လီၤ. ဘၣ်ဆၣ်, ဒ်ယမ့ၢ် ပှၤအိၣ်ဆိးလၢ ဝ့ၢ် New York တဂၤအသိး, တၢ်လီၤသူၣ်အုးသးအုး တမံၤအံၤ မၤဘၣ်ဒိဘၣ်ထံးယသးဒိၣ်မးန့ၣ်လီၤ. အကတၢၢ်န့ၣ်, ယလဲၤတုၤ တၢ်ကဲထီၣ်အသးအလီၢ် (Ground Zero), ဘၣ်ဆၣ် တၢ်သးအုးဂ့ၤ, တၢ်ပျံၤတၢ်ဖုးဂ့ၤ တဒိၣ်စိလုၢ်ဘၢယၤလၢၤဘၣ်. ဖဲယဆၢထၢၣ်ဖဲန့ၣ်အကတီၢ်, ယသးကလၢၢ်ဘၣ် သးအတၢ်ဃူတၢ်ဖိး, ဒီးသ့ၣ်နီၣ်ထီၣ် ယွၤအဘျုးအဖှိၣ်, လၢအဒုးမူယၤန့ၣ်လီၤ. တၢ်ဃူတၢ်ဖိးအံၤ မ့ၢ် ယွၤ, လၢအသ့ၣ်ညါ ကဘၣ်မၤမုာ်ထီၣ်က့ၤပှၤဒ်လဲၣ်တဂၤ, အတၢ်ဟ့ၣ်တမံၤန့ၣ်လီၤ.

ဖဲပဖးထါစံးထီၣ်ပတြၢၤအယုၢ်တဖၣ်န့ၣ်, ပကထံၣ်ဘၣ် စီၤဒၤဝံး ဘၣ်လဲၤခီဖျိဝဲ တၢ်သူၣ်အုးသးအုး, တၢ်ပျံၤတၢ်ဖုး, ဒီးတၢ်မိၣ်တၢ်မး,ဃုာ်ဒီးယွၤအတၢ်မၤမုာ်ထီၣ်က့ၤအီၤ စ့ၢ်ကီးန့ၣ်လီၤ. ထါစံးထီၣ်ပတြၢၤ ၃၀ အပူၤန့ၣ် အဝဲကွဲးဝဲဒၣ် “ယဃ့ကညးတၢ်လၢနၤ, ဒီးနမၤဘျါက့ၤလံယၤလံ” (:၂) န့ၣ်လီၤ. “မဲာ်ထံမဲာ်နိ ကအိၣ်ကဆိးတနၤ, မ့မ့ၢ်လၢ မုၢ်ဆ့ၣ်ထီၣ်န့ၣ် တၢ်သူၣ်ဖှံသးညီ အိၣ်ထီၣ်ဝဲ” (:၅) န့ၣ်လီၤ. စီၤဒၤဝံး ဟီၣ်တၢ်ယၢၤတၢ်န့ၣ် ကစၢ်ယွၤဒုးကဲထီၣ် “လၢတၢ်ဂဲၤကလံၣ်,” ဒီး “ဃ့ၣ်လီၤထၢၣ်တၢ်ကံးညာ်, ဒီးကံၢ်တူာ် (အ) ယီၢ်ဒ့ လၢတၢ်သးခု” (:၁၁) န့ၣ်လီၤ.

ဖဲတၢ်သးအုး, တၢ်လီၤမၢ်, (မ့) တၢ်သးဘၣ်ဒိဆါတဖၣ် ဒိၣ်စိလုၢ်ဘၢပှၤအကတီၢ်, မ်ပကဃၣ်တရံးဆူ ကယဲၢ်တၢ်မၤမုာ်ထီၣ်က့ၤတၢ်ခဲလၢာ်အယွၤ, လၢအအိၣ်ဘူးဒီးပှၤသူၣ်ကၢ်သးလီၤတဖၣ်, ဒီးဒ်စီၤဒၤဝံး စံးဝဲ “ယွၤ, ကစၢ်ဧၢ, ယကစံးထီၣ်ပတြၢၤနၤလီၤထူလီၤယိာ်” (စံး ၃၀:၁၂) အသိး, မ်ပကစံးဘျုးစံးဖှိၣ်ယွၤန့ၣ်တက့ၢ်.