ဖဲ ၂၀၂၁၈ နံၣ်, လၢ ဝ့ၢ်နယူယီးန့ၣ် ပှၤကညီတဂၤ လဲၤဒိးလဲအိၣ်ဆိးဝဲဒၣ် ဒၢးတဖျၢၣ်, ဒ်သိးကအိၣ်ဆိးဝဲဒၣ်ထဲတနၤဧိၤန့ၣ်လီၤ. တၢ်လၢအလီၤကမၢကမၣ်န့ၣ် အဝဲမၤတရီတပါ တၢ်ဒိးလဲဟံၣ်ဃီဒၢး အတၢ်သိၣ်တၢ်ဘျၢတဖၣ် လၢအတဘၣ်တၢ်ပာ်ဖျါဆှဲအီၤ, ဒီးလၢယဲၢ်နံၣ်အတီၢ်ပူၤ, စူးကါဝဲ ဒၢးတဖျၢၣ်န့ၣ် တဟ့ၣ်ဝဲ တၢ်ဒိးလဲအဘူးအလဲကျိၣ်စ့နီတဘ့ၣ်ဘၣ်. ဘၣ်ဆၣ်, ကဘၣ်ဟးထီၣ်ဝဲဒၣ်လၢ ဒၢးတဖျၢၣ်အံၤန့ၣ် မ့ၢ်လၢဂ့ၢ်လိာ်ဝဲအဃိ, အကတၢၢ်န့ၣ် ဘၣ်တၢ်ဆှၢအီၤဆူဃိာ်ပူၤန့ၣ်လီၤ.

ဒ်ပှၤဟဲဒိးလဲအိၣ်ဆိးဟံၣ်ဒၢး, လၢတၢ်ဆၢကတီၢ်ဖးယံာ်ဖးထီ လၢပှၤတအဲၣ်ဒိးတူၢ်လိာ်အီၤတဂၤအသိး, ပမ့ၢ်တပာ်သူၣ်ပာ်သးဘၣ်န့ၣ်ဒီး, မုၢ်ကီၤလံၢ် ကဟးဝ့ၤဝီၤဝဲဒၣ်လၢ ပတၢ်အိၣ်မူအပူၤအဂ့ၢ်န့ၣ် စီၤယၤကိာ် ဟ့ၣ်ပလီၢ်ပှၤလၢ “ထီဒါမုၣ်ကီၤလံၢ်တက့ၢ်, ဒီးကဃ့ၢ်ထီၣ်ကွံာ်လၢသုအိၣ်” (၄:၇) န့ၣ်လီၤ. ပှၤတၢ်မၢဖိ စီၤယၤကိာ် ပာ်ဖျါမၤလီၤတံၢ်ဝဲလၢ ပတၢ်ဂဲၤလိာ်တဖၣ်န့ၣ် အိၣ်ဟဲဝဲလၢ “ပတၢ်သးကွံ” လၢအတကဆှီ, ဒီးတၢ်ပာ်သူၣ်ပာ်သး လၢအတဂ့ၤတဘၣ် (:၁,၃), ဒ်အမ့ၢ်ဝဲ, တၢ်ပာ်ထီၣ်ထီသး, နီၢ်သးအတၢ်အိၣ်အသးခံထံၣ် လၢအထီဒါလိာ်သး, ဒီးပတၢ်ဆိကမိၣ်လၢအတကဆှီတဖၣ် အိၣ်ဆိးဝဲလၢ ပသးကံၢ်ပူၤန့ၣ်လီၤ. ဒ်သိးပကကွၢ်ဆၢၣ်မဲာ် တၢ်လ့ပစီတဖၣ်အံၤအဂီၢ်န့ၣ် စီၤယၤကိာ် ဟ့ၣ်လီၤဝဲ တၢ်မၤလိာ်ခံထံၣ်, လၢအမ့ၢ် “ပာ်သုသးလၢယွၤအဖီလာ်,” ဒီး “ထီဒါမုၣ်ကီၤလံၢ်တက့ၢ်” (:၇) န့ၣ်လီၤ. တၢ်ပာ်လီၤပသး စံးတၢ်န့ၣ် မ့ၢ်တၢ်ဟ့ၣ်လီၤအးလီၤပသးလၢာ်လၢာ်ဆ့ဆ့ဆူ ယွၤအစုပူၤန့ၣ်လီၤ. တၢ်ထီဒါမုၣ်ကီၤလံၢ်န့ၣ် မ့ၢ်တၢ်လၢပကဘၣ်ဂဲၤလိာ်ထီဘိ, ဒီးလိၣ်ဘၣ်ဝဲ တၢ်ဃ့ထုကဖၣ်, တၢ်ပလီၢ်ပဒီပသးဂ့ၤဂ့ၤ, ဒီးကစၢ်ယွၤ ကလုၢ်ကထါအတၢ်ကူၣ်သ့န့ၣ်လီၤ.

ဒ်ဟီၣ်ခိၣ်ကစၢ်တဂၤ နီၣ်ဟးထီၣ်ကွံာ် ပှၤကွၢ်ထွဲတၢ်ဖိလၢ တတီတလိၤတဂၤအသိး, ဒ်သိးပသုတပျဲ မုၣ်ကီၤလံၢ် အတၢ်လ့ပစီ ဟံးဃာ်ပၢၤဃာ်ပှၤအဂီၢ်, ပဂ့ၢ်လိာ်ထီဒါ ခီဖျိလၢကစၢ်ယွၤအဂံၢ်အဘါ သ့ဝဲဒၣ်န့ၣ်လီၤ. ပမ့ၢ်ထီဒါ မုၣ်ကီၤလံၢ် န့ၣ်ဒီး, ကစၢ်ယွၤ အၢၣ်လီၤအီလီၤပှၤလၢ တၢ်မၤနၢၤအဂ့ၢ်န့ၣ် စီၤယၤကိာ် ပာ်ဖျါမၤလီၤတံၢ် ဝဲဒၣ်လၢ မုၣ်ကီၤလံၢ် “ကဃ့ၣ်ထီၣ်ကွံာ်လၢသုအိၣ်” (:၇) န့ၣ်လီၤ.

ဖဲပနီၣ်ဟးထီၣ်ဆူၣ် ပတၢ်ဒဲးဘး, ဒီးမုၢ်ကီၤလံၢ် အတၢ်ဒိၣ်စိလုၣ်ဘၢပှၤ, ဒီးပမ့ၢ် “သုးဘူးပသးဆူယွၤအိၣ်” (:၈) န့ၣ်ဒီး, ကစၢ်ယွၤ ကပျဲအတၢ်ဃူတၢ်ဖိး, အတၢ်သူၣ်ခုသးခု, ဒီးအတၢ်တိာ်ကျဲၤ ကအိၣ်ဆိး, ကလၢပှဲၤအါထီၣ်လၢပပူၤန့ၣ်လီၤ. ကစၢ်ယွၤ ပၢဆှၢတၢ်အလီၢ်အကျဲန့ၣ် ဒုၣ်ဒါ မုၢ်ကီၤလံၢ် အိၣ်ဆိးဝဲတန့ၢ်တသ့ဘၣ်.