ခွါဂဲၤဒိ, ဒဲ(န)စၢၣ် ဝၣ်ရှ့(န)တၢၣ် (Denzel Washington) လၢအဒိးန့ၢ် အီးစကၣ်တၢ်ဟ့ၣ်လၤကပီၤတဂၤ, ဟ့ၣ်ဂံၢ်ဟ့ၣ်ဘါ ခွါဂဲၤဒိသးစၢ်တဖၣ် ဒ်သိးကစးထီၣ်အမုၢ်နံၤတဖၣ်လၢတၢ်ထုကဖၣ်န့ၣ်လီၤ. အတၢ်ဟ့ၣ်ကူၣ်န့ၣ် မ့ၢ်ဝဲဒၣ် “ပာ်သုခီၣ်ဖံးရှူတဖၣ်ဖဲလီၢ်မံခးအဖီလာ် ဖဲမုၢ်နၤခီအကတီၢ်,” ဒ်သိးအဝဲသ့ၣ် ကမၤလီၤတံၢ်ဝဲ “လၢဂီၤခီအဆၢကတီၢ် တၢ်ချံးလီၤခီၣ်လ့ၢ်ခိၣ်အဂီၢ်” န့ၣ်လီၤ.

တၢ်ဒုးအိၣ်ထီၣ် လုၢ်လၢ်လၢ အညီနုၢ်ဃ့ထုကဖၣ်တၢ်, ဘၣ်သ့ၣ်သ့ၣ်န့ၣ် ကလိၣ်ဝဲ တၢ်ကူၣ်ဆိကမိၣ်, ဒီးတၢ်ရဲၣ်ကျဲၤမၤလီၤဆီအီၤဒၣ်လဲာ်, လၢတၢ်စံၣ်စိၤတဲစိၤအပူၤန့ၣ် မ့ၢ်ဝဲဒၣ် တၢ်မၤလုၢ်လၢ်အဂ့ၤတမံၤ, လၢအဒုးအိၣ်ဂၢၢ်ဆိးကျၢၤတ့ၢ်ဝဲ ယွၤအပှၤဂီၢ်မုၢ်တဖၣ်, လီၤဆီဒၣ်တၢ်, ဖဲတၢ်ကီတၢ်ခဲအကတီၢ်န့ၣ်လီၤ. ဖဲ စီၤပၤဒၤရယါဝ့ၣ် ပၢဆှၢတၢ်အစိၤန့ၣ် ပကထံၣ်ဘၣ် တၢ်ဂ့ၢ်အံၤ, လၢစီၤဒၤနံးယ့လး အတၢ်အိၣ်မူအပူၤန့ၣ်လီၤ.လၢဘီမုၢ်တၢ်ပၢတၢ်ပြးအပူၤန့ၣ် အဝဲအိၣ်ဖျါလီၤဆီဝဲဒၣ် ဒ်ပှၤဟ့ၣ်ကူၣ်တၢ်အထီကတၢၢ်တဂၤအဃိ, ထံကီၢ်ပဒိၣ်, အပှၤဘၣ်မူဘၣ်ဒါတဖၣ် အသးဒိၣ်အသးက့ၣ်အီၤ (ဒၤ ၆:၃) န့ၣ်လီၤ. လၢတၢ်သူၣ်က့ၣ်သးကါအပူၤန့ၣ် ဒ်သိးကနီၣ်ဖျိးကွံာ် စီၤဒၤနံးယ့လးအဂီၢ်, အဝဲသ့ၣ်ကူၣ်ထီၣ်ဖးလီၤဝဲ, ဒီးဒ်သိးကထီဒါအီၤအဂီၢ်, ဃုထံၣ်န့ၢ် တၢ်အိၣ်ဝဲဒၣ်ထဲတမံၤဧိၤန့ၣ် မ့ၢ် စီၤဒၤနံးယ့လး အတၢ်ဘူၣ်တၢ်ဘါ, “အကစၢ်အတၢ်သိၣ်တၢ်သီ” (:၅) န့ၣ်လီၤ. စီၤဒၤနံးယ့လး ဃ့ထုကဖၣ် ကစၢ်ယွၤန့ၣ် ဒ်သိးတဖိးမံတၢ်ဘျၢသဲစးအဂီၢ်န့ၣ် ထံကီၢ်ပဒိၣ်ခိၣ်နၢ်တဖၣ် ကူၣ်ကဘျံးကဘျၣ်တၢ်, ဒီးဟ့ၣ်ကူၣ်ဝဲဒၣ် စီၤပၤ, ဒ်သိးကပာ်လီၤအတၢ်သိၣ်တၢ်သီဒၣ်လဲာ်, “စီၤဒၤနံးယ့လးချံးလီၤအခီၣ်…., ဃ့ဘါထုကဖၣ်တၢ်… ဒ်အမၤဝဲလၢအခီၣ်ထံးအသိး” (:၁၀) န့ၣ်လီၤ.

တၢ်အိၣ်မူ လၢအဃ့ထုကဖၣ်တၢ် ထီဘိတဘိယူၢ်ဃီန့ၣ် မ့ၢ်တၢ်အကါဒိၣ်တမံၤ, ဒ်သိးစီၤဒၤနံးယ့လး ကလဲၤခီဖျိကလၢၢ်ဘၣ် ကစၢ်ယွၤ ကတဲာ်ကတီၤန့ၢ်အီၤ တၢ်ဂံၢ်တၢ်ဘါ, ဒီးသးအတၢ်ဃူတၢ်ဖိးအဂီၢ် (စံး ၂၉:၁၁) န့ၣ်လီၤ. တၢ်ထုကဖၣ်န့ၣ် မၤစၢၤအီၤ, ဒ်သိးကမၤနၢၤဝဲ တၢ်စိတၢ်ကမီၤတဖၣ် လၢအဃုမၤဟးဂီၤအီၤန့ၣ်လီၤ. ဒ်န့ၣ်အသိး, တၢ်ဒုးအိၣ်ထီၣ် တၢ်ညီနုၢ်ထံၣ်လိာ်ရ့လိာ်သးဒီးကစၢ်ယွၤ ဘၣ်ဆၢဘၣ်ကတီၢ်, ခီဖျိလၢတၢ်ထုကဖၣ်, ဒီးထီဘိတၢ်ဟံးန့ၢ်ဆိ တၢ်ဆၢကတီၢ်ဒီးကစၢ်ယွၤန့ၣ် ကမၤစၢၤပှၤလၢတၢ်ဒုးဒိၣ်ထီၣ် ပတၢ်ရ့လိာ်ဘၣ်ထွဲလိာ်သးဒီးယွၤန့ၣ်လီၤ. ဖဲပဘၣ်ကွၢ်ဆၢၣ်မဲာ်တၢ်ဂ့ၢ်ကီတဘျီလၢ်လၢ်, ကစၢ်ယွၤ အဂံၢ်အဘါ ကဒုးအိၣ်ဂၢၢ်ဆိးကျၢၤပှၤန့ၣ်လီၤ.