ဖဲမုၢ်လ့ၤဧိၤ အမုၢ်တနံၤ, ခးဆ့ၣ်နီၤထးတဖၣ်န့ၣ် ဘၣ်တၢ်ရဲၣ်လီၤကျဲၤလီၤအီၤလၢ တၢ်အဒါဘၣ်အၢဘၣ်သီတဖၣ်အဖီခိၣ်, ဖဲတၢ်အိၣ်ဖှိၣ်အတၢ်ရ့လိာ်မုာ်လိာ်ဘျီၣ်ပူၤ, ဒီးတၢ်ကတဲာ်ကတီၤပာ်လီၤ ကိၣ်တြံာ်, ဒီးတၢ်သွဲၣ်လီၤပာ်လီၤ တဲၣ်တီသၣ်တဖၣ် ဒ်သိးပှၤဟဲသူၣ်အုးသးအုးတဖၣ် ကဆ့ၣ်နီၤ, ဒီးကအီၣ်အီဝဲအဂီၢ်န့ၣ်လီၤ. တၢ်မၤအံၤ, မ့ၢ်ဝဲဒၣ် ပှၤဟဲဆိးသီ ပှၤသံအတၢ်ဘူၣ်တၢ်ဘါ, ဒ်ညီနုၢ်အသိးဘၣ်ဆၣ်, သရၣ်လၢအစံၣ်တဲၤတဲလီၤတၢ်တဂၤအဂီၢ်န့ၣ် လီၤဆီဝဲဒၣ်န့ၣ်လီၤ. အဝဲမ့ၢ် သရၣ်ဖးဒိၣ်လၢအမံၤဟူသၣ်ဖျါတဂၤ, လၢအစံၣ်တဲၤတဲလီၤဝဲဒၣ် ပှၤဂီၢ်မုၢ်လၢ အကထိတဖၣ် လၢတၢ်လိၣ်ကွဲပျီ, ဘျီၣ်ဖးဒိၣ်တဖၣ်အပူၤန့ၣ်လီၤ. မ့မ့ၢ်ခဲကနံၣ်အံၤ, လၢတၢ်သူၣ်ဆူၣ်သးဆူၣ်ဖးဒိၣ်အပူၤန့ၣ် အဝဲစံၣ်တဲၤတဲလီၤဝဲဒၣ်ဆူ ပှၤဟဲပာ်ဖှိၣ်ထီၣ်အသးတဖၣ်အဂီၢ်, လၢနွံဖးဖီအကတီၢ်န့ၣ်လီၤ.

စီၤပီလူး အပျဲၢ် စီၤတံၤမသ့း, ပာ်ဝဲဒ်အဖိအသိးတဂၤန့ၣ် သိၣ်လိနဲၣ်လိဝဲဒၣ်လၢ “မ့မ့ၢ်နဲဒၣ်အံၤ, ခိးနသးလၢတၢ်ခဲလၢာ်အပူၤတက့ၢ်…. တၢ်အခ့အပှၤအတၢ်လၢ နမၤအီၤန့ၣ် မၤလၢလၢပှဲၤပှဲၤတက့ၢ်.” (၄:၂-၅) န့ၣ်လီၤ. ကယဲၢ်မူဒါတၢ်မၤခဲလၢာ် (all the duties) န့ၣ်လီၤ. တမ့ၢ်ထဲလၢ မူဒါတၢ်မၤဖးဒိၣ်တဖၣ် ဘၣ်တၢ်မၤအီၤ လၢတၢ်လီၢ်စိၤမိၤခိၣ်ဖးဒိၣ်တဖၣ် လၢအအိၣ်ဒီးလီမ့ၣ်အူဒၢ အတၢ်ကပီၤကပြုၢ်ကပြီၤတဖၣ်န့ၣ်ဘၣ်. ကဘၣ်မ့ၢ်စ့ၢ်ကီး, ဒ်ညီနုာ်တၢ်ဟံးန့ၢ်မူဒါ, ဖံးတၢ်မၤတၢ်တဖၣ် လၢနွံဖးဖီအကတီၢ်န့ၣ်လီၤ. တၢ်စံၣ်တဲၤတဲလီၤတဖၣ်အံၤ, တမ့ၢ်လၢတၢ်ကဖီၣ်ဟံးန့ၢ်ဃးအကလုၢ်, ဒီးကဘိးဘၣ်ရၤလီၤအီၤ, လၢစိၤစဲၤသွဲၣ်တဖၣ် လၢအကဟဲပိာ်ထွဲထီၣ်အခံတဖၣ်အဂီၢ်န့ၣ်ဘၣ်. ပှၤဒိကနၣ်တၢ်ဖိတဖၣ် ကအိၣ်ဝဲဒၣ် ပှၤစှၤဂၤဖိဘၣ်ဆၣ်, ပကဘၣ်မၤအီၤဂ့ၤဂ့ၤဘၣ်ဘၣ်န့ၣ်လီၤ.

အဂ့ၢ်ဒ်အံၤ, ပှၤခိးကွၢ်တၢ် အိၣ်ဝဲတဂၤအဃိန့ၣ်လီၤ. ဒ်သိး စီၤတံၤမသ့း ကစံၣ်တဲၤတဲလီၤတၢ်အဂီၢ်န့ၣ် စီၤပီလူး မၤလိာ်ဝဲဒၣ် “လၢယွၤဒီးယ့ၣ်ရှူးခရံာ် လၢအကစံၣ်ညီၣ် ပှၤမူဒီးပှၤသံတဖၣ်, အမဲာ်ညါ” (၄:၁) န့ၣ်လီၤ. နတၢ်လီၢ်စိၤမိၤခိၣ်န့ၣ် ကဆံးဝဲကအံၣ်ဝဲဘၣ်ဆၣ်, တၢ်အကါဒိၣ်ကတၢၢ်န့ၣ် မ့ၢ်ဝဲဒၣ် ပှၤဒိကနၣ်တၢ်ဖိတဖၣ်န့ၣ်လီၤ. ဒ်သိးနကမၤတၢ်ခ့တၢ်ပှၤအတၢ်မၤအဂီၢ်, လၢတၢ်မုၢ်လၢ်ဖးဒိၣ်အပူၤန့ၣ် ကစၢ်ယ့ၣ်ရှူး အိၣ်ခိးကွၢ်လၢ်နၤန့ၣ်လီၤ. သန့ၤနသးလၢ ကစၢ်ယ့ၣ်ရှူး အသးစီဆှံ အစိကမီၤ, ဒီးဖံးတၢ်မၤတၢ်လၢအဂီၢ်န့ၣ်တက့ၢ်. လၢတၢ်ဆီၣ်လီၤသး, ဒီးလၢတၢ်သူၣ်တီသးလိၤအပူၤ, နမ့ၢ်မၤယွၤအတၢ်မၤလၢပှၤဂၤအဂီၢ်န့ၣ်ဒီး, ကစၢ်ယ့ၣ်ရှူး ကဘၣ်တၢ်မၤလၤကပီၤအီၤန့ၣ်လီၤ.