သ့ၣ်အမုၢ်တဖၣ် မဲထီၣ်ဝဲလၢတၢ်ခုၣ်အလီၢ်အကျဲတဖၣ်န့ၣ် ဘၣ်ကတဲာ်ကတီၤအသးလၢတၢ်ဂိၢ်ခါအကတီၢ်အဂီၢ်, ခီဖျိလၢ “တၢ်မၤကိၤထီၣ်အသး” အကျိၤကျဲတမံၤန့ၣ်လီၤ. ဒ်သိးသ့ၣ်အမုၢ်တဖၣ် အသုတလီၤသကၤ, ယူာ်ထီၣ်အသး, ဒီးအသုတသ့ၣ်ဖးအဂီၢ်, ဒုးဟးထီၣ်ဝဲဒၣ်ထံလၢ ချံဆးမူ (cells) တဖၣ်န့ၣ်လီၤ. ထံအိၣ်တ့ၢ်လၢချံဆးမူတဖၣ် အကဆူးန့ၣ် ဆှံဂ့ၤဒိၣ်မးအဃိ, ထံလီၤသကၤသံးကာ်ကိၢ်လိၣ်တဖၣ်န့ၣ် စဲဘူးထီဃာ် အသးတန့ၢ်ဘၣ်. တၢ်ခုၣ်အပတီၢ် မ့ၢ်လီၤဝဲဆူ သိၣ်ပၤအဖီလာ် ဒံၢ်ကရံၣ်လွံၢ်ဆံ (40 degrees below zero) ဒၣ်လဲာ်, သ့ၣ်အမုၢ်န့ၣ် တတဲၤသ့ၣ်ဖးလၢၤဘၣ်. မ့ၢ်လၢသ့ၣ်အမုၢ်တဖၣ် ဟံးန့ၢ်အပနီၣ် လၢမုၢ်နံၤအဖုၣ်စှၤလီၤ, လၢအတဆီတလဲအသးတဖၣ်အအိၣ်အဃိ, ကိးနံၣ်ဒဲးန့ၣ် အဝဲသ့ၣ်ကိၤထီၣ်ဝဲ တၢ်ဆၢကတီၢ်တကတီၢ်ဃီန့ၣ်လီၤ. အဝဲသ့ၣ် တသန့ၤသးလၢ မူခိၣ်ကလံၤသီၣ်ဂီၤအခုၣ်အကိၢ်တဘၣ်ဆၢဘၣ်ကတီၢ်အဖီခိၣ်ဘၣ်. မ့မ့ၢ်သန့ၤအသးလၢမုၢ်, တၢ်လၢအလီၢ်တံၢ်တမံၤ, လၢအဝဲသ့ၣ်အဂီၢ်န့ၣ်လီၤ.

ယွၤအဖိခွါ, လၢအတ့လီၤမုၢ်န့ၣ် မ့ၢ်စ့ၢ်ကီးပှၤလၢအလီၤတံၢ်လီၤဆဲးတဂၤန့ၣ်လီၤ. “အဝဲဒၣ်န့ၣ်မ့ၢ်ယွၤ, လၢပှၤထံၣ်အီၤတသ့ဘၣ်တဂၤအက့ၢ်အဂီၤ, တၢ်ဘၣ်တ့ခဲလၢာ်အပှၤဝဲၢ်ကိလီၤ. အဂ့ၢ်ဒ်အံၤ, တၢ်ခဲလၢာ်ဘၣ်တ့အသးလၢအစုပူၤ,………. ဒီးတၢ်ခဲလၢာ်အိၣ်ဝဲဆိးဝဲလၢအီၤ” (ကလီး ၁:၁၅-၁၇) န့ၣ်လီၤ. မ့ၢ်မတၤတဂၤ, စံးဘၣ် သ့ၣ်ထူၣ်တဖၣ်လၢကထိၣ်ကိၤထီၣ်အသး ကိးနံၣ်ဒဲးန့ၣ်လဲၣ်. မ့ၢ်ဒၣ်ယွၤအဖိခွါတဂၤဃီအံၤ, လၢအမၢလီၤမုၢ်ကဟဲထီၣ်ကိးဂီၤဒဲး, ဒီးက့ၤမံဝဲလၢမုၢ်နၤ, ပီၣ်လဲၣ် ထံထီၣ်ထံလီၤန့ၣ် ထုးဝဲလၢလါ, ဒုးတရံးတၢ်ဖိတၢ်လံၤအဆံးကတၢၢ်တဖၣ် (electrons) လၢချံဆးမူကိးမံၤဒဲးအပူၤ, ဖှိးဝဲ နသးဖျၢၣ်, ဒီးမၤပှဲၤနပသိၣ်ဒီးကလံၤ, ဒီးနမ့ၢ်သူၣ်ကၢ်သးလီၤန့ၣ်, ဟံးဃာ်နၤန့ၣ်လီၤ.

တၢ်လၢအဟံးဃာ်ဂၢၢ်ကျၢၤဟီၣ်ခိၣ်န့ၣ် တမ့ၢ်န့ဆၢၣ်အဂံၢ်သဟီၣ်ဘၣ်, မ့မ့ၢ်ပှၤအိၣ်ဆိးလၢ န့ဆၢၣ်အချၢတဂၤန့ၣ်လီၤ. အဝဲဟဲနုာ်လီၤဆူဟီၣ်ခိၣ်, လၢအတ့လီၤဝဲ, “ဒီးလၢအဝဲဒၣ်အဃိ, ကမၤဖိးလိာ်တၢ်ခဲလၢာ်ဒီးအကစၢ်ဒၣ်ဝဲ” (:၂၀), ပၣ်ဃုာ်ဒီးနၤန့ၣ်လီၤ. ဟီၣ်ခိၣ်လၢ တၢ်တယာ်ဆိပာ်စၢၤအီၤတသ့ဘၣ်အံၤအပူၤန့ၣ် တၢ်လၢအလီၤတံၢ်တမံၤ, အိၣ်ဒီးနၤန့ၣ်လီၤ. ကစၢ်ယ့ၣ်ရှူး “ကကိးက့ၤသုဆူအအိၣ်, ဒီးလၢ အဝဲအမဲာ်ညါန့ၣ် သုကစီဆှံ, တအိၣ်ဘၣ်ဒီးတၢ်ကမၣ်ဘၣ်, ဒီးတၢ်ပာ်ဒ့ၣ်ပာ်ကမၣ် တသ့ဘၣ်အဂီၢ်န့ၣ်လီၤ” (:၂၂, ခ့ခါ).