သးပှၢ်မုၣ်တဂၤ လီၤဃံၤဘၣ်ဒိဘၣ်ထံးဒိၣ်ဒိၣ်ကလဲာ်, ဒီးအိၣ်သံတယူာ်လၢပှၤလဲၤတၢ်က့ၤတၢ်အကျဲလိၤ လၢတၢ်ကိၢ်ကျါန့ၣ်လီၤ. ပှၤအါဂၤ ဆိကတီၢ်အတၢ်လဲၤဒီး မၤစၢၤအီၤန့ၣ်လီၤ. ပှၤတဂၤန့ၣ် ကိးဃီၤဝဲ ၉၁၁, ဒီးပှၤအဂၤတဂၤန့ၣ် ပာ်လီၤ ဆ့ကၤဖီခိၣ်တဘ့ၣ်လၢသးပှၢ်မုၢ်အခိၣ်အဖီလာ် ကယီကယီဖိန့ၣ်လီၤ. ပှၤတနီၤန့ၣ် ပာ်ဝဲဒၣ် တၢ်ထွါမဲာ်တဖၣ်လၢအစုဒုၣ်အဖီလာ်, ဒီးမ့မ့ၢ်ပှၤတဂၤန့ၣ် ဒီတဒၢဝဲ သဒၢမုၢ်လၢ အခိၣ်အဖီလာ်တုၤလၢဂ့ၢ်ဂီၤအူ ဆူၣ်ချ့ပှၤမၤစၢၤတၢ်ဖိတဖၣ် ဟဲတုၤဝဲတစုန့ၣ်လီၤ. ပှၤလၢအဒိတီၣ်ထီၣ် တၢ်ဂီၤမူအဖုၣ်ဖိအံၤ ကွဲးပာ်ဖျါဝဲဒၣ်လၢ ပှၤအသးအနံၣ်အလါ, ဒီးကလုာ်ဒူၣ် တဒ်သိးလိာ်သးတဖၣ်ခဲလၢာ် ဆိကတီၢ်, ဒီးပာ်ဖှိၣ်မၤစၢၤ ပှၤလၢအတူၢ်ဘၣ်ခီၣ်ဘၣ်တၢ်နးနးကျံၤကျံၤတဂၤန့ၣ် မ့ၢ်တၢ်ဂ့ၢ်လီၤဆီ, လၢအလီၤသးမုာ်ဒိၣ်မးအဂ့ၢ်န့ၣ်လီၤ.

ပှၤသ့လံာ်တၢ်သိၣ်တၢ်သီတဂၤ သံကွၢ်ဝဲ ကစၢ်ယ့ၣ်ရှူး, “ပှၤလၢယဃၢၤန့ၣ် မ့ၢ်မတၤတဂၤလဲၣ်” (လူၤ ၁၀:၂၉) န့ၣ်လီၤ. အခီပညီန့ၣ် အဝဲအဲၣ်ဒိးသ့ၣ်ညါဝဲဒၣ်လၢကဘၣ်ဒုးနဲၣ်အတၢ်အဲၣ်ဆူမတၤတဂၤလဲၣ်န့ၣ်လီၤ. ကစၢ်ယ့ၣ်ရှူး တဲဖျါထီၣ် ပှၤတဂၤအဂ့ၢ်, လၢတမျိၤတမျာ်တဖၣ် ဒိတီၢ်အီၤနးနးကလဲာ် ဘူးတ့ၢ်မးလၢကသံဝဲ, ဒီးဘၣ်တၢ်စူးကွံာ်တ့ၢ်အီၤလၢ ကျဲကပၤ (:၃၀-၃၁) န့ၣ်လီၤ. ပှၤလုၢ်တၢ်အဒိၣ်တဂၤ, ဒီးလၢခံန့ၣ် ပှၤလ့ၤဝံဖိတဂၤ ဟဲထံၣ်န့ၢ်အီၤဘၣ်ဆၣ်, ခံဂၤလိာ်န့ၣ် လဲၤသဒၣ်အီၤလၢကျဲတကပၤန့ၣ်လီၤ. လၢခံကတၢၢ်န့ၣ် ပှၤရှၤမရံဖိတဂၤ ဆိကတီၢ်အတၢ်လဲၤ, ဒီးမၤစၢၤဝဲဒၣ်န့ၣ်လီၤ. တၢ်လၢအလီၤဆီဒိၣ်မးတမံၤန့ၣ် ပှၤယူဒၤဖိတဖၣ်, ဒီးပှၤရှၤမရံဖိတဖၣ် အဘၢၣ်စၢၤန့ၣ် အိၣ်ဒီးတၢ်ထံၣ်ဆိကမိၣ်ဆံးလိာ်သး အတၢ်စံၣ်စိၤတဲစိၤန့ၣ်လီၤ. ဘၣ်ဆၣ်, ပှၤလၢအဆိကတီၢ်, ဒီး “သးကညီၤတၢ်တဂၤ” န့ၣ် မ့ၢ်ဝဲဒၣ် ပှၤရှၤမရံဖိ (:၃၃) န့ၣ်လီၤ.

ကစၢ်ယ့ၣ်ရှူး စံးဘၣ်တဲဘၣ် တၢ်တဲပူဟ့ၣ်ဒိအံၤဝံၤန့ၣ်ဒီး, သံကွၢ်ဝဲဒၣ်, ပှၤလၢအဘၣ်တၢ်ဒိတီၢ်အီၤတဂၤအံၤအဂီၢ်, ပှၤလၢအဃၢၤန့ၣ် ကမ့ၢ်မတၤတဂၤလဲၣ်န့ၣ်လီၤ. ပှၤသ့လံာ်တၢ်သိၣ်တၢ်သီတဂၤန့ၣ် စံးဆၢဝဲဒၣ် “ပှၤလၢအသးကညီၤအီၤတဂၤ” (:၃၇) န့ၣ်လီၤ. ကစၢ်ယ့ၣ်ရှူးစံးဘၣ်အီၤ,ဃုာ်ဒီးပဝဲနၤယၤတဖၣ်လၢ “လဲၤမၤနဲဒ်န့ၣ်သိးတက့ၢ်” န့ၣ်လီၤ. ကယဲၢ်ပှၤကိးဂၤဒဲးလၢ ပထံၣ်လိာ်သးတဖၣ်န့ၣ် ဒ်အမ့ၢ်ပှၤကညီအဂၤတဂၤလၢ ကစၢ်ယွၤ တ့လီၤဝဲဒၣ်အသိး, မ့ၢ်ဝဲဒၣ် ပှၤလၢပဃၢၤတဖၣ်, ဒီးကြၢးဝဲလၢပတၢ်မၤစၢၤအဃိ, ဒ်သိးပကထံၣ် အဝဲသ့ၣ်အဂီၢ်, မ်ကစၢ်ယွၤ မၤစၢၤပှၤန့ၣ်တက့ၢ်.