သးလၢအသူၣ်ကညီၤသးကညီၤတၢ်န့ၣ် ထိၣ်ဂဲၤထီၣ် မဲရံၣ် စလဲးစၣ် (Mary Slessor), ဒ်သိးကအိးထီၣ်အစုတၢ်မၤစၢၤဆူ ပှၤလၢအလိၣ်ဘၣ်တၢ်မၤစၢၤတဖၣ်န့ၣ်လီၤ. အဝဲမ့ၢ် စကီးတ့း(ရှ) (Scottish) မံးရှၢၣ်နရံၣ်တဂၤ, ဒီးအိၣ်ဖျဲၣ်ထီၣ်ဝဲဒၣ် ဖဲ ၁၈၄၈ နံၣ်, ဒီးလဲၤမၤတၢ်လၢ ပှၤအိၣ်ကိၣ်ယိၣ် (Okoyong) ဖိတဖၣ်အကျါ, လၢတၢ်လီၢ်အယံၤတတီၤန့ၣ်လီၤ. ပှၤအိၣ်ဆိးလၢ လီၢ်ကဝီၤတဖၣ် အတၢ်စူၢ်တၢ်နာ်လၢအကမၣ်တမံၤန့ၣ် ဖဲလၢဖိသၣ်အတဃံာ်ဖိ မ့ၢ်အိၣ်ဖျဲၣ်ထီၣ်ဝဲန့ၣ် တဂၤန့ၣ်ဂ့ၤဝဲ, ဒီးမ့မ့ၢ်အတဂၤန့ၣ် တၢ်ဝံတၢ်နါအဖိန့ၣ်လီၤ. လၢတၢ်န့ၣ်အဃိ, မ့ၢ်လၢတၢ်ပာ်တ့ၢ်စူးကွံာ်အီၤ, ဒီးခီဖျိလၢတၢ်သၣ်ဝံၤလီၤဒိ, ဒီးတၢ်ဂ့ၢ်ကီအဂုၤအဂၤတဖၣ်အဃိ, ပှၤအတဃံာ်ဖိခံဂၤလိာ်န့ၣ် ဘၣ်သံဝဲဒၣ်တလီၢ်လီၢ်န့ၣ်လီၤ. လၢတၢ်ဒုးနဲၣ်ဖျါထီၣ် ကစၢ်ယွၤ အတၢ်အဲၣ်အဂီၢ်, ဖိသၣ်လၢအသးသမူ တၢ်ဘၣ်ယိၣ်အိၣ်တဖၣ်, လၢအကယၤတဖၣ်န့ၣ် မဲရံၣ် မၤဂ့ၤမၤစၢၤမၤပူၤဖျဲးဝဲ, ဒီးအနီၢ်ကစၢ်ဒၣ်ဝဲန့ၣ် လုၢ်ဖိဝဲဒၣ် ဖိသၣ် (၉) ဂၤ, ဒ်အဖိသ့ၣ်တဖၣ်အသိးန့ၣ်လီၤ.
ပှၤအံၣ်စရ့လးဖိလၢ အပူၤထီၣ်တၢ်တဖၣ်အဂီၢ်, ဝံဟိၤရှ့ အတၢ်ကတိၤထိၣ်ဟူးထိၣ်ဂဲၤထီၣ်တၢ်အပူၤန့ၣ် ဝံ ဒုးထံၣ်တဖျဲးဝဲ ကစၢ်ယွၤ အတၢ်သးအိၣ်ကဟုကယာ် အဖိတဖၣ်အဂ့ၢ်န့ၣ်လီၤ. ကစၢ်ယွၤန့ၣ် ဝံပာ်ဖျါဝဲလၢ “အဂ့ၢ်ဒ်အံၤ, နသူၣ်အိၣ်သးအိၣ်ပှၤဖိၣ်ဃဲသ့ၣ်တဖၣ်” (၁၄:၃) န့ၣ်လီၤ. ဝံဟိၤရှ့ ပာ်ဖျါထီၣ်ဝဲဒၣ် ကစၢ်ယွၤ အသူၣ်အိၣ်အသးအိၣ်အပှၤဂီၢ်မုၢ်, ဒီး “ယကအဲၣ်က့ၤကွံာ်က့ၤဒၣ်အီၤ” (:၄) န့ၣ်လီၤ. ဘၣ်ဆၣ်, အဝဲသ့ၣ် ကဘၣ်ဃၣ်က့ၤအသးလၢ တၢ်ဂ့ၢ်လိာ်ခီၣ်ရီာ် ကစၢ်ယွၤ, ဒီးကဘၣ်ဟံးဃာ်တူၢ်လိာ်ယွၤအကျဲတဖၣ်န့ၣ်လီၤ. တၢ်နဲၣ်လီၤအဝဲသ့ၣ်လၢ ကဘၣ်စူးကွံာ်ညိကွံာ် တၢ်ဂီၤတၢ်ဖှီၣ် အကစၢ်တဖၣ်, ဒီးကဘၣ်က့ၤကဒါဆူ ယွၤအမ့ၢ်အတီ, ပှၤလၢအသူၣ်အိၣ်သးအိၣ်ဝဲဒၣ် ပှၤလၢအလိၣ်ဘၣ် တၢ်မၤစၢၤအဒိၣ်ကတၢၢ်, လၢအမ့ၢ်ပှၤဖိၣ်ဃဲတဖၣ် န့ၣ်လီၤ. ဒီးအဝဲသ့ၣ် မ့ၢ်ဟဲက့ၤဆူယွၤအအိၣ်န့ၣ်ဒီး, ကဃုထံၣ်န့ၢ် တၢ်ပျၢ်တၢ်ကမၣ်လၢကစၢ်ယွၤ, ပှၤလၢ “ကတူၢ်လိာ် အဝဲသ့ၣ် လၢတၢ်သူၣ်အိၣ်သးအိၣ်” (:၁-၂) န့ၣ်လီၤ.
ပမ့ၢ်အိးထီၣ် ပစုအတၢ်မၤစၢၤဆူ ပှၤအိၣ်ဆိးလၢပခိၣ်ပဃၢၤဝးဝးတဖၣ်အအိၣ်, ဃုာ်ဒီးဖိဒံဖိသၣ်တဖၣ် လၢအသးသမူ တၢ်ဘၣ်ယိၣ်အိၣ်တဖၣ်န့ၣ်ဒီး, ကမ့ၢ်ဝဲဒၣ် ပဆဲးကပီၤဖျါက့ၤ ယွၤအတၢ်အဲၣ်န့ၣ်လီၤ. မ်ပကဟံးဃာ်ဖီၣ်ဃာ် ကစၢ်ယွၤအသး, လၢအသူၣ်ကညီၤသးကညီၤတၢ်, ဒီးဒ်ယွၤမၤစၢၤပှၤအသိး, ပကမၤလဲၢ်ထီၣ်အါထီၣ် အတၢ်ကဟုကယာ်ဆူ ပှၤလၢအလိၣ်ဘၣ်တၢ်တဖၣ်အအိၣ်န့ၣ်တက့ၢ်.