ဖဲတၢ်သ့ၣ်နီၣ် ယတံဒိၣ်တၢ်ဘါအကတီၢ်န့ၣ် လၢတၢ်မၤလၤကပီၤအီၤဒီးအမါသးဘိအတၢ်အဲၣ် တူၢ်တံၤတူၢ်တမှံၤ လၢအိၣ်မူမၤထွဲတ့ၢ်ဝဲဒၣ် အါနံၣ်အါလါအဂီၢ်, ပှၤကတဲာ်ကတီၤ တၢ်အီၣ်တၢ်အီ လၢအမ့ၢ်, ကျီၢ်ညၣ်ကၣ်, ဘုခ့, ဒီးသဘ့ချံတဖၣ်န့ၣ်လီၤ. မုၢ်နံၤဒိၣ်ကိးဂီၤဒဲး, တချုးအဝဲသ့ၣ်လဲၤဆူတၢ်ဘါယွၤသရိာ်န့ၣ် အဝဲသ့ၣ်ပၢနုာ်တၢ်ညၣ်ကၣ်ဖးဒိၣ်တလိၣ်, ဒီးတၢ်ဒိးတၢ်လၣ်တဖၣ် လၢသပၢၤဖီမံတၢ်ကယီကယီအပူၤန့ၣ်လီၤ. တၢ်ဘါမ့ၢ်ဝံၤဒီး, အဝဲသ့ၣ် လူၤဃုပှၤတဂၤဂၤ, ဒ်သိးကကွဲမုာ်ဝဲလၢ မုၢ်ထူၣ်တၢ်အီၣ်အဂီၢ်န့ၣ်လီၤ. ဘၣ်တဘျီဘျီ, ကွဲမုာ်ဝဲ တံၤသကိးဂ့ၤတဂၤ, ဒီးဘၣ်တဘျီဘျီန့ၣ် ပှၤစီစၣ်တဂၤဂၤန့ၣ်လီၤ. မတၤဂ့ၤမတၤဂ့ၤ, အဝဲသ့ၣ်မၤလီၤတံၢ်ဝဲလၢ တၢ်အီၣ်တၢ်အီကအိၣ်လၢလၢပှဲၤပှဲၤလၢဟံၣ်, ဒီးမုၢ်ဃ့ၢ်လီၤအကတီၢ်တဖၣ်န့ၣ် ပာ်လီၤဆီဝဲဒၣ်လၢ တၢ်တူၢ်တံၤတူၢ်တမှံၤအဂီၢ်န့ၣ်လီၤ.

လုၢ်လၢ်လၢ အဝဲသ့ၣ်မၤဝဲလၢ မုၢ်နံၤဒိၣ်န့ၣ် အိၣ်ဝဲဒီးတၢ်ပညိၣ်လၢ ကအိၣ်ကတဲာ်ကတီၤသး, လၢတၢ်ဟ့ၣ်ညီတၢ်အဂီၢ်န့ၣ်လီၤ. လုၢ်လၢ်ဒ်သိးအံၤန့ၣ် ပှၤအံၣ်စရ့လးဖိတဖၣ် လူၤပိာ်ထွဲမၤဝဲဒၣ်န့ၣ်လီၤ. ခီဖျိ စီၤမိၤရှ့န့ၣ်, ယွၤမၤလိာ်အဝဲသ့ၣ်လၢ ကပာ်လီၤတဲာ်တ့ၢ် အတၢ်အီၣ်တနီၤလၢ “ပှၤဖှီၣ်ဖီယာ်ဖိ, ဒီးပှၤတခီဘီမုၢ်ဖိအဂီၢ်” (၃ မိၤ ၁၉:၁၀) န့ၣ်လီၤ. ဖဲကူးဘုအကတီၢ်န့ၣ်, အဝဲသ့ၣ်တဘၣ်ကူးတၢ်လၢအစံာ်အသနၢၣ်တုၤအလၢာ်ဘၣ်. တဘၣ်ထၢထီၣ်တၢ်လီၤတဲာ် လၢအကူးတၢ်အပူၤဘၣ်. ဒီးတဘၣ်ထၢဖှိၣ်စပံးသၣ်ခဲလၢာ်လၢအစပံးအလီၢ်ပူၤဘၣ် (:၉-၁၀) န့ၣ်လီၤ. လၢတၢ်အုၣ်က့ၤခီၣ်က့ၤအကျိၤကျဲဒ်သိးအံၤအပူၤန့ၣ် ပှၤလၢအစံာ်ဖျီဟီၣ်ကဝီၤတအိၣ်ဘၣ်တဖၣ်န့ၣ် မၤတၢ်သ့ဒံးဝဲလၢ ကထၢပာ်ဖှိၣ်န့ၢ် တၢ်အီၣ်တၢ်အီန့ၣ်လီၤ. မ့မ့ၢ်ယွၤအပှၤဂီၢ်မုၢ်တဖၣ်အဂီၢ်န့ၣ် တၢ်မၤအံၤ ကမ့ၢ်တၢ်လၢအဟဲစိာ်န့ၢ် တၢ်ဆိၣ်ဂ့ၤ အဃံအလၤသ့ဝဲဒၣ်အဃိ, တမ့ၢ်လၢ အကဘၣ်မၤဝဲဒၣ်ထဲတဘျီဧိၤဘၣ်. အဝဲသ့ၣ် ကဘၣ်မူထွဲမၤထွဲ တနံၣ်ဘၣ်တနံၣ်, တပယုၢ်ဃီန့ၣ်လီၤ.

ဒ်သိးပကဒုးနဲၣ် ကစၢ်ယ့ၣ်ရှူး အတၢ်အဲၣ်တူၢ်တံၤတူၢ်တမှံၤန့ၣ်ဆူ ပှၤအိၣ်ဆိးလၢ ပခိၣ်ပဃၢၤဝးဝးတဖၣ်အဂီၢ်န့ၣ် ခွဲးယာ်တဖၣ်အိၣ်ဝဲဒၣ်န့ၣ်လီၤ. ခွဲးယာ်တနီၤန့ၣ် ပကတဲာ်ကတီၤ ဆိပာ်အီၤတသ့ဘၣ်ဆၣ်, မ့မ့ၢ်တနီၤနီၤန့ၣ် ပကတဲာ်ကတီၤဆိပာ်အီၤသ့ဝဲဒၣ်န့ၣ်လီၤ. ဒ်ယွၤမၤစၢၤပှၤအသိး, တနံၤအံၤ, မ့ၢ်ပကမၤဂ့ၤမၤစၢၤ ပှၤဂုၤပှၤဂၤလၢ တၢ်အဲၣ်, တၢ်သးကညီၤအပူၤ ကသ့ဝဲဒ်လဲၣ်န့ၣ် မ်ပကဆိကမိၣ်သကိးန့ၣ်တက့ၢ်.