တနံၣ်န့ၣ်တဘျီ, ဖဲ ပဆၣ်ဖိကီၢ်ဖိ ကသံၣ်သရၣ်မုၣ် ကွၢ်ထံသမံသမိး ပထွံၣ်ဖိတဒု အတၢ်အိၣ်ဆူၣ်အိၣ်ချ့အကတီၢ်န့ၣ် စံးဝဲဒၣ်လၢ “အဝဲအိၣ်ဒီးအံသၣ်ဆၢအမဲာ်သၣ်ဖိ” န့ၣ်လီၤ. ယသံကွၢ်အီၤ, “အံသၣ်ဆၢအမဲာ်ဧါ” န့ၣ်ဒီး, စံးဆၢဝဲဒၣ်လၢ တၢ်နံၤကမှံအပူၤ, “အံသၣ်ဆၢအမဲာ်သၣ်စံးတၢ်န့ၣ် မ့ၢ်တၢ်စူးကါအီၤလၢ ထွံၣ်လူၤပှၢ် (retrievers) ဒ်သိးအံၤတကလုာ်, လၢအမဲာ်သၣ်ထီၣ်ဝါဆိန့ၢ် အကတီၢ်ဘၣ်ဝဲန့ၣ်လီၤ. ဒ်အမ့ၢ် တၢ်အဆၢအိၣ်လၢအပူၤ, အတၢ်ပနီၣ်” န့ၣ်လီၤ.
လၢခံန့ၣ်, ဖဲယဆိကမိၣ်ထံက့ၤ တၢ်အကတီၢ်ဖိအံၤအဂ့ၢ်န့ၣ်ဒီး, တၢ်ဆိကမိၣ် ဟဲထီၣ်လၢယသးပူၤတမံၤန့ၣ် ဖဲပှၤဂုၤပှၤဂၤတဖၣ် မ့ၢ်ထံၣ်ယၤန့ၣ်ဒီး, ယမဲာ်သၣ်န့ၣ် ကအိၣ်ဖျါဝဲဒ်လဲၣ်အဂ့ၢ်န့ၣ်လီၤ. မ့ၢ်အဝဲသ့ၣ်ထံၣ်တဖျဲး “တၢ်အဆၢလၢယပူၤ,” တၢ်ဆၢလၢအမ့ၢ်, ကစၢ်ယ့ၣ်ရှူး အတၢ်အဲၣ် လၢအဆီတလဲတၢ် အစိအကမီၤန့ၣ် မ့ၢ်ပှၤဂုၤပှၤဂၤထံၣ်ဝဲဒၣ် လၢယသးကံၢ်ပူၤ, ဒီးလၢယတၢ်အိၣ်မူအပူၤဧါန့ၣ်လီၤ. လံာ်စီဆှံ ပာ်ဖျါထီၣ်ဝဲဒၣ် တၢ်လီၤသးကတုၤအကတီၢ်ဖိ, ဖဲစီၤမိၤရှ့ အိၣ်ဆိးဝဲဒၣ်လၢကစၢ်ယွၤ အမဲာ်ညါအါနံၤအါသီဝံၤ, ဟဲလီၤဝဲလၢ ကစၢ်စံၤနါအကတီၢ်န့ၣ်လီၤ. စီၤမိၤရှ့ “တသ့ၣ်ညါဘၣ်လၢ အကတိၤတၢ်ဒီးအီၤ(ယွၤ)အဖၢမုၢ်ဒီး, အမဲာ်ဖံး ကပီၤကပြုၢ်ကပြီၤဘၣ်န့ၣ်လီၤ.” စီၤမိၤရှ့ အမဲာ်သၣ် ကပီၤကပြုၢ်ကပြီၤတုၤဒၣ်လဲာ်, ပှၤဂီၢ်မုၢ်တဖၣ် “သုးဘူးအသးဆူအအိၣ်တဘူၣ်ဘၣ်” (၂ မိၤ ၃၄:၂၉-၃၀) န့ၣ်လီၤ. ဒ်သိးအဝဲသ့ၣ် အသုတပျံၤအါထီၣ်တၢ်အဂီၢ်, စီၤမိၤရှ့ “ပာ်နီၣ်ကျၢၢ်ဘၢလၢအမဲာ်လိၤ,” ဒီးသုးကွံာ်ဝဲဒၣ် ဖဲ “အလဲၤနုာ်ကတိၤတၢ်ဒီးအီၤ(ယွၤ)” (:၃၃,၃၅) န့ၣ်လီၤ.
စီၤမိၤရှ့ ကတိၤတၢ်ဒီးယွၤ “မဲာ်သကိးမဲာ်” (၃၃:၁၁) န့ၣ် မ့ၢ်အကတီၢ်လီၤဆီဖိ, လၢလံာ်စီဆှံအပူၤန့ၣ်လီၤ. ဘၣ်ဆၣ်, လံာ်စီဆှံ ဒုးသ့ၣ်နီၣ်ပှၤစ့ၢ်ကီးလၢ, ပဝဲနၤယၤလၢအသ့ၣ်ညါကစၢ်ယွၤ, ခီဖျိကစၢ်ခရံာ်တဖၣ်န့ၣ် “ပဘၣ်တၢ်လဲလိာ်ပသးဆူ တၢ်အက့ၢ်အဂီၤတမံၤဃီအံၤ, လၢတၢ်လၤကပီၤဆူတၢ်လၤကပီၤ, ဒ်လၢကစၢ်အသးအသိး” (၂ ကရံၣ် ၃:၁၈) န့ၣ်လီၤ. ကစၢ်ယွၤ အိၣ်ဆိးလၢပပူၤန့ၣ် မ့ၢ်မၤမုာ်မၤသးခုပှၤဂုၤပှၤဂၤအသးန့ၣ်ဒီး, ကမ့ၢ်ဝဲဒၣ် ယွၤအတၢ်အဲၣ်အတၢ်မၤန့ၣ်လီၤ. ပမဲာ်သၣ်တဖၣ် မ့ၢ်တကပီၤကပြုၢ်ကပြီၤဝဲ ဒ်စီၤမိၤရှ့ အမဲာ်အသိးဘၣ်ဆၣ်, ပမ့ၢ်ဟံးန့ၢ် တၢ်ဆၢကတီၢ်, လၢယွၤအမဲာ်ညါန့ၣ်ဒီး, ကစၢ်ယွၤ ကလီၣ်ဖျါအါထီၣ်အသးလၢ ပပူၤန့ၣ်လီၤ.