စတဲလ့ၣ် (Stanley) အတၢ်သးအိၣ်ဟ့ၣ်တၢ်ညီန့ၣ် ကဲထီၣ်တၢ်ကမၢကမၣ် လၢယဂီၢ်ထီဘိန့ၣ်လီၤ. လၢတၢ်အိၣ်ဖှိၣ်အပူၤ, ပှၤသူၣ်က့သးပှၢ်တဖၣ်, ပှၤမၤကဆှဲကဆှီတၢ်လၢအဟံၣ်ခိၣ်ဟံၣ်ဃၢၤတဖၣ်, (မ့) ပှၤလၢအလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါအီၤတဖၣ် အဂီၢ်န့ၣ် အဝဲပှ့ၤန့ၢ်ဝဲ တၢ်အီၣ်တၢ်အီတဖၣ်, ဒီးတၢ်ဟ့ၣ်ကနၢၤတဖၣ်တလီၢ်လီၢ်န့ၣ်လီၤ.

တၢ်တမံၤဃီ, လၢအလီၤကမၢကမၣ်ဝဲဒၣ်န့ၣ် စတဲလ့ၣ် န့ၣ် တမ့ၢ်ပှၤကဲဒိၣ်ကဲပှၢ်, (မ့) တမ့ၢ်ပှၤလၢအသ့ဃုကျိာ်ဃုစ့ ခီဖျိလၢအပှ့ၤဆါတၢ်တမံၤမံၤဘၣ်ဆၣ်, အတၢ်ဖံးတၢ်မၤဆံးဆံးဖိလၢ အမၤဝဲန့ၣ် ကဲဘျုးကဲဖှိၣ်ဝဲဂ့ၤဂ့ၤဘၣ်ဘၣ်အဃိ, ဒ်သိးဒီးကဟ့ၣ်ခီဟ့ၣ်နီၤတၢ်ဆူညါအဂီၢ်န့ၣ် မၤစၢၤအီၤန့ၣ်လီၤ. ဖဲလၢပှၤတဂၤဂၤ မ့ၢ်စံးဘျုးစံးဖှိၣ်အီၤ, တဘျီလၢ်လၢ်န့ၣ် နဲၣ်ဝဲဒၣ်အစုဆူ မူခိၣ်, ဒီးနံၤဝဲဒၣ်, ဖျါလၢအဲၣ်ဒိးစံးဝဲဒၣ်, “တၢ်အံၤန့ၣ် အိၣ်ဟဲဝဲလၢကစၢ်ယွၤအအိၣ်, ဒီးတမ့ၢ်လၢယၤဘၣ်” န့ၣ်လီၤ. အဝဲစံးကတိၤပာ်ဖျါဝဲဒၣ်တလီၢ်လီၢ်လၢ ကစၢ်ယွၤ မၤစၢၤအီၤ ဒ်သိးကမၤစၢၤဝဲ ပှၤဂုၤပှၤဂၤတဖၣ်အဂီၢ်န့ၣ်လီၤ.

တၢ်ဂ့ၢ်အံၤ မ့ၢ်တၢ်လၢ စီၤပီလူး အဲၣ်ဒိးစံးကတိၤဝဲ, ဒီးဖဲ ၂ ကရံၣ် အဆၢဒိၣ် ၉ န့ၣ် ကွဲးပာ်ဖျါ တၢ်နီၤဟ့ၣ်ခီတၢ်အဂ့ၢ်န့ၣ်လီၤ. အဝဲပာ်အသးကဖၢလၢ ဘၣ်ဃးဒီး ပှၤကရံၣ်သူးဖိတဖၣ် အိၣ်ကတဲာ်ကတီၤပာ်အသး ဒ်သိးကမၤစၢၤပှၤစူၢ်က့ၤနာ်က့ၤတၢ်ဖိကဒဲကဒဲ (:၂), ဒီးမုၢ်လၢ်ဝဲလၢ ကလူၤထၢဖှိၣ်ပာ်ဖှိၣ် တၢ်မၤဘူၣ်တဖၣ်လၢ အဝဲသ့ၣ်စးထီၣ်မၤတ့ၢ်လံ တဖၣ် (:၃) န့ၣ်လီၤ. လၢတၢ်သူၣ်အိၣ်သးအိၣ်, ဒီးလၢတၢ်သူၣ်ခုသးခုအပူၤ, ဒ်သိးအဝဲသ့ၣ် ကဟ့ၣ်ခီနီၤလီၤတၢ်အဂီၢ်န့ၣ်, စီၤပီလူး သကွံၢ်ကညးဝဲဒၣ်, ဒီး ကွဲးပာ်ပနီၣ်ဝဲဒၣ် တမ့ၢ်လၢ ကစၢ်ယွၤ ကဟ့ၣ်မၤလၤကပီၤ ထဲဒၣ်ပှၤလၢအဟ့ၣ်ညီတၢ်တဖၣ် (:၆-၇) န့ၣ်ဘၣ်. မ့မ့ၢ် ဒ်သိးအဝဲသ့ၣ်ကဟ့ၣ်အါထီၣ်တၢ် (:၈) ကသ့ဝဲအဂီၢ်, ကဆိၣ်ဂ့ၤစ့ၢ်ကီးဝဲဒၣ်န့ၣ်လီၤ.

ကစၢ်ယွၤ တအဲၣ်ဒိးဝဲလၢ ပကဟ့ၣ်လီၤ တၢ်လၢပဟ့ၣ်တန့ၢ်တသ့တဖၣ်န့ၣ်ဘၣ် (၂ ကရံၣ် ၈:၁၂). မ့မ့ၢ်, ဒ်သိး “သုကအါထီၣ်လၢ တၢ်မၤဂ့ၤကိးမံၤဒဲး” (၉:၈) အဂီၢ်, ယွၤနာ်န့ၢ်အးလီၤပှၤလၢ ကျိၣ်စ့, တၢ်ဆၢကတီၢ်, (မ့) တၤလၣ်, ဒီးကယဲၢ်တၢ်လၢပလိၣ်ဘၣ်န့ၣ် ယွၤကမၤထူးထီၣ်တီၤထီၣ်တၢ်ခဲလၢာ် “လၢကယဲၢ်တၢ်ဟ့ၣ်ညီတၢ်” (:၁၁) အဂီၢ်န့ၣ်လီၤ. လၢတၢ်န့ၣ်အဃိ, ဖဲပသ့ၣ်ညါ ပဟ့ၣ်လီၤတၢ်တဖၣ်န့ၣ် မ့ၢ်ဒၣ်တၢ်လၢပဒိးန့ၢ်ဘၣ်လၢ ကစၢ်ယွၤအအိၣ်အဃိ, ပဟ့ၣ်တၢ်လၢ တၢ်စူၢ်တၢ်နာ်အပူၤ အိၣ်ဒီးတၢ်သးခု (:၇) သ့ဝဲဒၣ်န့ၣ်လီၤ. ပဟ့ၣ်ထီၣ် တၢ်စံးထီၣ်ပတြၢၤဆူ ယွၤအမံၤ, ခီဖျိလၢတၢ်ဟ့ၣ်သ့ၣ်တဖၣ်အံၤ (:၁၃) န့ၣ်လီၤ.