ပှၤမုၣ်လိၣ်ဘိ သးစၢ်မုၣ်ဖိန့ၣ် ဟံးဃာ်ဂၢၢ်ကျၢၤအတၢ်စူၢ်တၢ်နာ်န့ၣ်လီၤ. ဖဲအဝဲသ့ၣ် တီၤထီကၠိအကရူၢ်ဖိတဖၣ် လဲၤဟးအိၣ်သကိး ပှၤအိၣ်ဆိးလၢ “တၢ်ယါဘျါ ပှၤသးစဲထီ ကသံၣ်မူၤဘှိးအဟံၣ်” အကတီၢ်, ဘၣ်ဃးဒီး တၢ်စူၢ်တၢ်နာ်အဂ့ၢ်န့ၣ် ခလဲ(ရ) (Claire) စံးကတိၤလိာ်သကိးတၢ်ဒီးပိာ်ခွါ, အသးကအိၣ်ဝဲဒၣ် ခံဆံဘျဲၣ်ဘျဲၣ်, ဒီးအနီၢ်ကစၢ်ထီန့ၢ်အီၤတဂၤန့ၣ်လီၤ.
ခလဲ(ရ) ဒုးသ့ၣ်ညါအီၤ ကစၢ်ယ့ၣ်ရှူး အတၢ်သးခုကစီၣ်ဆှဲဆှဲပျီပျီန့ၣ်လီၤ. ပိာ်ခွါန့ၣ် ဂ့ၢ်လိာ်စံးဆၢဝဲလၢ အသူၣ်ဂ့ၢ်သးကျိၤအတၢ်ထံၣ်, လၢအတဒ်သိးလိာ်အသးဒီးခလဲ(ရ) အတၢ်ထံၣ်ဘၣ်. အဝဲသ့ၣ် ဂ့ၢ်လိာ်စံးကတိၤသကိးတၢ်ကဒဲကဒဲ ဒ်တၢ်ဒီတံၤဒီသကိးအသိးန့ၣ်လီၤ. အကတၢၢ်န့ၣ်, ပိာ်ခွါသးစၢ်န့ၣ် ကွၢ်ဃီၤဝဲ ခလဲ(ရ), ဒီးစံးဝဲဒၣ်လၢ, “နကတိၤနၢၤယၤလံ. တၢ်လၢနတဲတဖၣ်န့ၣ် ယဂ့ၢ်လိာ်စံးကတိၤဆၢက့ၤနၤတန့ၢ်လၢၤဘၣ်” န့ၣ်လီၤ.
ကစူၢ်က့ၤနာ်က့ၤ ကစၢ်ယ့ၣ်ရှူးန့ၣ် ပှၤသးစၢ်တဂၤအံၤ မ့ၢ်တတူၢ်လိာ်ဝဲဘၣ်ဆၣ်, တၢ်သူၣ်လီၤန့ၢ် တၢ်သးခုကစီၣ်အချံဖိတဖျၢၣ်လံန့ၣ်လီၤ. ခလဲ(ရ) အဲၣ်ဒိးဝဲလၢ ပှၤသးစၢ်တဂၤအံၤ, ကတူၢ်လိာ်ကစၢ်ခရံာ်အဃိ, အသးဟးဂီၤဝဲဒၣ်န့ၣ်လီၤ. ဘၣ်ဆၣ်, ကစၢ်ယွၤ မၢအီၤလၢ “အိၣ်ကတီၤသုသးထီဘိ လၢတၢ်စံးဆၢ” (၁ ပ့း ၃:၁၅) အဂီၢ်, တၢ်လၢအကဘၣ်မၤဝဲန့ၣ် မၤဘၣ်ဝဲဖဲ မုၢ်တနံၤအံၤန့ၣ်အဃိ, ခလဲ(ရ) ပာ်ဝဲဒၣ်အသးမုာ်မုာ်န့ၣ်လီၤ. လၢတၢ်အဲၣ်အပူၤန့ၣ် အဝဲနီၤဟ့ၣ်ခီဘၣ် ကစၢ်ယွၤ အတၢ်တိာ်ကျဲၤ, ဘၣ်ဃးဒီးတၢ်အုၣ်က့ၤခီၣ်က့ၤအဂ့ၢ်န့ၣ်လီၤ.
လၢခရံာ်အတၢ်သးခုကစီၣ်အဂီၢ်န့ၣ် ခလဲ(ရ) အမဲာ်တဆှးဝဲ (ရိမ့ၤ ၁:၁၆) ဘၣ်န့ၣ်လီၤ. ဒ်သိးကဟ့ၣ်တၢ်စံးဆၢဆူ “ကယဲၢ်ပှၤလၢအသံကွၢ်သုလၢ တၢ်မုၢ်လၢ်အိၣ်လၢသုပူၤအဂ့ၢ်အကျိၤကိးဂၤဒဲး” (၁ ပ့း ၃:၁၅) အဂီၢ်, အဝဲအိၣ်ကတီၤပာ်အသးန့ၣ်လီၤ. လၢတၢ်ပာ်သးအမ့ၢ်အတီအပူၤ, ကစံးဆၢ ပိာ်ခွါသးစၢ်လၢ အတၢ်ကတိၤ “အိၣ်ဒီးတၢ်ဘျုးတၢ်ဖှိၣ်,” ဒီး “ကသ့ၣ်ညါစံးဆၢတၢ်ဒ်လဲၣ်ဒ်လဲၣ်” (ကလီး ၄:၆) အဂီၢ်, ခလဲ(ရ) သ့ၣ်ညါဝဲဒၣ်န့ၣ်လီၤ.
ဒ်သိးပကဒုးသ့ၣ်ညါ ပှၤဂုၤပှၤဂၤလၢ ကစၢ်ခရံာ်အဂီၢ်, မ့ၢ်ဝဲခွဲးယာ်လီၤဆီလၢ ကစၢ်ယွၤ ဟ့ၣ်လီၤပှၤအဃိ, တၢ်လၢပလိၣ်ဘၣ်တဖၣ်န့ၣ် ဒ်ယွၤဟ့ၣ်လီၤပှၤအသိး, မ်ပကအိၣ်ကတီၤပာ်သးလၢ တၢ်နီၤဟ့ၣ်ခီပှၤဂုၤပှၤဂၤန့ၣ်တက့ၢ်.
