တၢ်အီၣ်ကျးအပှၤမၤတၢ်ဖိတဂၤ ထံၣ်ဝဲဒၣ် ပိာ်ခွါလၢအသံတယူာ်, တသ့ၣ်ညါသူၣ်သ့ၣ်ညါသးတဂၤ ဖဲပှၤစူးကွံာ်တၢ်အဒၢဖးဒိၣ်အကပၤန့ၣ်လီၤ. ပှၤတဂၤအံၤ မုၢ်အတၢ်ကိၢ်အီၣ်အီၤ, တၢၢ်တဖၣ်အ့ၣ်အီၤ, ဒီးအနီၢ်ခိနီၢ်ကစၢ်န့ၣ် ဘၣ်ဒိဘၣ်ထံးနးနးကလဲာ်န့ၣ်လီၤ. အဝဲမ့ၢ်မတၤလဲၣ်န့ၣ် တသ့ၣ်ညါလီၤက့ၤအသးလၢၤဘၣ်. လၢခံသ့ၣ်ညါဝဲဒၣ် ပှၤတဂၤအံၤ အမံၤန့ၣ် “ဘဲ(န)ကၠမ့(န) ခါ(လ)” (Benjamin Kyle) ဒီးအိၣ်မူ ဒ်ပှၤတသ့ၣ်ညါသူၣ်သ့ၣ်ညါသးတဂၤအသိး, အါန့ၢ်အန့ၣ်တဆံဘျဲၣ်န့ၣ်လီၤ. အဝဲတမၤတၢ်ဘၣ်, တဒိးန့ၢ် တၢ်မၤစၢၤတဖၣ်. (မ့) အပူၤကွံာ်, တၢ်လၢအကြၢးမၤန့ၢ်ဝဲတဖၣ်လၢၤဘၣ်. ဒ်သိးကသ့ၣ်နီၣ်ထီၣ်က့ၤအသး, လၢအမ့ၢ်မတၤလဲၣ်အဂီၢ်, လီၢ်ကဝီၤပူၤ, ပှၤစီစၣ်တဖၣ် မၤစၢၤအီၤ, ခီဖျိလၢတၢ်မၤကွၢ် ဒံၣ်အဲ(န)အ့ၣ် (DNA), ဒီးလူၤဃုသ့ၣ်ညါအဂ့ၢ်အဃိ, အတၢ်အိၣ်ဆူၣ်အိၣ်ချ့ဂ့ၤထီၣ်ဝဲဒၣ်န့ၣ်လီၤ. အဝဲပာ်ဖျါထီၣ်ဝဲဒၣ် “ယအိၣ်ဒီးယဂ့ၢ်ယကျိၤ, ယတမ့ၢ်ပှၤစီစၣ်လၢ တၢ်အခီၣ်ထံးခီၣ်ဘိတအိၣ်တဂၤဘၣ်” န့ၣ်လီၤ.
လၢလံာ်စီဆှံအပူၤ, နီၢ်ရူၤသး အဂ့ၢ်စ့ၢ်ကီး, တၢ်ထံၣ်န့ၢ်အီၤသ့ဝဲဒၣ် ဒ်ပှၤလၢအဃုထံၣ်န့ၢ်က့ၤ တၢ်လၢအဘၣ်ထွဲဒီးအီၤန့ၣ်လီၤ. အဝၤသံဝံၤအလီၢ်ခံ, ဟးထီၣ်ဝဲလၢ အထံကီၢ်, ဒီးဃုထၢအိၣ်စၢဘူးလိာ်အသးဒီးအမံၤပှၢ် နီၢ်နၤဧမံ, ဒီးအမံၤပှၢ်အပှၤကလုာ်န့ၣ်လီၤ. နီၢ်ရူၤသး စံးဘၣ် နီၢ်နၤဧမံလၢ “ဖဲနလဲၤတၢ်ယကလဲၤယဲ,…. နပှၤတကလုာ်န့ၣ် ကကဲထီၣ်ယပှၤတကလုာ်, ဒီးနကစၢ်န့ၣ် ကကဲထီၣ်ယကစၢ်” (ရူၤ ၁:၁၆) န့ၣ်လီၤ. မူမ့ၢ်ဂ့ၤ, သံမ့ၢ်ဂ့ၤန့ၣ် နီၢ်ရူၤသး အတၢ်မ့ၢ်တၢ်, ဒီးအတၢ်ဟဲဝံဟဲစိာ်န့ၣ် မၤဘၣ်ထွဲဝဲဒီး နီၢ်နၤဧမံဒီးအပှၤတကလုာ်အတၢ်မ့ၢ်တၢ်န့ၣ်လီၤ. တၢ်ပာ်လုၢ်ပာ်ပှ့ၤဆိ တၢ်ဘၣ်ထွဲလိာ်သးဒီးပှၤတဝၢန့ၣ် ဂ့ၤဒိၣ်န့ၢ်ဒံး ပီးလိအတၢ်လီၤတံၢ်လီၤဆဲးအဖီခိၣ်အဃိ, နီၢ်ရူၤသး “အသးအိၣ်နီၢ်နီၢ်လၢ အကလဲၤတၢ်ဒီးအီၤ” (:၁၈) န့ၣ်လီၤ. လၢတၢ်န့ၣ်အဃိ, အဝဲခါထီၣ်ခီၣ်ကါဆူ ကစၢ်ယွၤ အတၢ်အုၣ်က့ၤခီၣ်က့ၤ အတၢ်တဲပူအပူၤ, ဒီးဘၣ်တၢ်သ့ၣ်နီၣ်အီၤထီဘိ ခီဖျိကစၢ်ခရံာ် ဟဲလီၤစၢၤတတီၤ, တပတီၢ် (၄:၁၈-၂၂, မးသဲ ၁:၃-၅) န့ၣ်လီၤ.
ဒ်ပမ့ၢ်ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, ဖဲပသးပ့ၤနီၣ် ပမ့ၢ်မတၤ တဂၤလဲၣ်အကတီၢ်, (မ့) ဖဲပသးသမူ အတၢ်နးတၢ်ဖှီၣ်အဃိ, ပကျဲလီၤမၢ်အကတီၢ်, ဒ်သိးကမၤဘၣ်ထွဲလိာ်က့ၤပှၤဒီး ပတၢ်မ့ၢ်တၢ်အမ့ၢ်အတီနီၢ်နီၢ်အဂီၢ်, ကစၢ်ယွၤ စူးကါဝဲ ပပှၤတဝၢတလီၢ်လီၢ်န့ၣ်လီၤ. ပဘၣ်တၢ်အဲၣ်ပှၤ, ပဘၣ်တၢ်ဃုထၢ, ဒီးပဘၣ်တၢ်သ့ၣ်ညါပှၤ, ခီဖျိလၢကစၢ်ယွၤန့ၣ်လီၤ.
