ဖဲယလဲၤဒုးမံ ယလံၤခွါဖိလၢ အဟဲမံသကိးဒီးပှၤအကတီၢ်, လံာ်စီဆှံလၢ အဖးဝဲ, ဒီးတိၢ်နီၣ်ဃးဝဲလံာ်က့ဖိန့ၣ် အိၣ်ဝဲဒၣ် ဖဲထါစံးထီၣ်ပတြၢၤအယုၢ် ၂၃, အဝဲစံးဘၣ်ယၤလၢ “ပဖးလံာ်စီဆှံတတီၤအံၤဝံၤလံ” န့ၣ်လီၤ. ယဟ့ၣ်ကူၣ်အီၤလၢ မ့ၢ်ပကမၤလိန့ၢ် တၢ်အသီတမံၤမံၤဧါန့ၣ်ဒီး, ယလံၤခွါဖိန့ၣ် ဖးဝဲဒၣ် လၢအကလုၢ်ဖးဒိၣ် “ယွၤမ့ၢ်ယပှၤကွၢ်သိတၢ်တမိၢ်န့ၢ်ဘၣ်ယသးလၢ တၢ်နီတမံၤဘၣ်. ဒုးကိာ်လီၤယၤလၢ ကိၣ်ဘၢလါလါတဖၣ်” န့ၣ်လီၤ. တမ့ၢ်ကိၣ်ဘၢလါလါတဖၣ်ဘၣ်. ယတဲနၢ်ပၢၢ်အီၤလၢ လံာ်ဖျၢၣ်န့ၣ် မ့ၢ်အီၣ်ဆၣ်အလီၢ်, ဒီးတမ့ၢ် ကိၣ်ဘၢ (pastry) ဘၣ်န့ၣ်လီၤ. လၢအပူၤကွံာ်, နၣ်ရံၣ်အါမး အဆၢကတီၢ်န့ၣ် အဝဲအိၣ်ဂဲၤဆၢထၢၣ်ဝဲဒၣ်လၢ တၢ်ကုၢ်ကိၣ်ဒီးတၢ်ဆါကိၣ် အစိၤပီာ်ခိၣ်အမဲာ်ညါ, ဒီးလူၤကွၢ်ဃုထၢ ကိၣ်တဖၣ်ဒံးန့ၣ်လီၤ. လံာ်စီဆှံတတီၤအံၤ ယလံၤခွါဖိ ထုးထီၣ်အခီပညီ, ဒီးပညိၣ်ပာ်ဖှိၣ်ဝဲဒၣ်, လၢအဂီၢ်န့ၣ် တၢ်ကုၢ်ကိၣ်ဒီးတၢ်ဆါကိၣ် အလီၢ်တတီၤန့ၣ် မ့ၢ်တၢ်အိၣ်ဘှံးလီၢ်, ဒီးတၢ်လီၢ်လၢအမၤမုာ်လၤသးခုအီၤန့ၣ်လီၤ.

ထါစံးထီၣ်ပတြၢၤ ၂၃ တယုၢ်အံၤ ညီနုၢ်ဒီးပှၤတုၤဒၣ်လဲာ်, တၢ်အခီပညီအဒိၣ်အယိာ်, လၢအပာ်ဖျါထီၣ်ဝဲန့ၣ် ပကပျဲလဲၤပူၤကွံာ်အီၤသ့ၣ်သ့ၣ်န့ၣ်လီၤ. တၢ်အံးထွဲကွၢ်ထွဲသိအဂ့ၢ်န့ၣ် စီၤပၤ စီၤဒၤဝံး သ့ၣ်ညါနၢ်ပၢၢ်ဝဲ ဂ့ၤဂ့ၤဘၣ်ဘၣ်, ဒီးလၢတၢ်အိၣ်မူဒီစိၤအဂီၢ်, ကစၢ်ယွၤ အတၢ်ကတဲာ်ကတီၤဟ့ၣ်မၤစၢၤတၢ်တဖၣ်န့ၣ် ပာ်ဖျါထီၣ်ဝဲဒၣ် တၢ်မုာ်တၢ်ခုၣ်, တၢ်ဃံတၢ်လၤ, တၢ်လၢတၢ်ပှဲၤ (:၅-၆),ဃုာ်ဒီးတၢ်ဂ့ၢ်ကီတဖၣ်န့ၣ်လီၤ. စီၤဒၤဝံး ဒုးနဲၣ်ပာ်ဖျါဝဲ ပကစၢ်ယွၤ, အဂ့ၤအဝါတဂၤန့ၣ် နဲၣ်ဆှၢပှၤဆူ တၢ်လီၢ်တၢ်ကျဲတဖၣ်လၢ ပကအိၣ်ဘၣ်ဒီးအီၤ, ပကမၤဂ့ၤမၤသီထီၣ် ပနီၢ်ခိနီၢ်သးအဂံၢ်အဘါ, ဒီးကတဲာ်ကတီၤန့ၢ် တၢ်လၢအကဟဲတဖၣ်အဂီၢ်န့ၣ်လီၤ. “အီၣ်ဆၣ်အလီၢ်လါဟ့,” ဒီး “ထံဂၢၢ်အနံၤ” (:၁-၂) တဖၣ်န့ၣ် မ့ၢ်တၢ်လီၢ်တၢ်ကျဲလၢ သိတဖၣ်အဂီၢ်, ဒီးပမ့ၢ်ယွၤအသိတဖၣ် (:၁) န့ၣ်လီၤ.

ဒ်ဖိသၣ်ဆံးအတၢ်ထံၣ်အသိး, ယလံၤခွါဖိ ထုးထီၣ်အခီပညီ လံာ်စီဆှံတတီၤအံၤ, ဒုးထံၣ်ယၤ “အီၣ်ဆၣ်လီၢ်လါဟ့” လၢကစၢ်ယွၤ ကတဲာ်ကတီၤန့ၢ်ယၤ လၢယတၢ်အိၣ်မူ ကိးမုၢ်နံၤဒဲးအဂီၢ်, တၢ်လီၢ်လၢ ယကအိၣ်ဘှံးအိၣ်သါ, ဒီးယကမုာ်လၤသးခုယဲ, ဒီးကမၤဂ့ၤမၤသီထီၣ်က့ၤယၤန့ၣ်လီၤ. မုၢ်အဧူၢ်ယဲၤအိၣ်ဒီးထူအလွဲၢ်တဖၣ်လၢ မုၢ်လီၤနုာ်အကတီၢ်,
စံာ်ပျီလါဟ့တကဝီၤ, ဒီးတၢ်ဘှ့ၣ်တၢ်ဘှီၣ် အသနၢၣ်ဖိတတီၤန့ၣ်လီၤ. တၢ်တ့ဆါကိၣ်ဘၢလါလါတဖၣ် အစိနၢမူလၢကလံၤကျါန့ၣ် မၤဖှံသူၣ်ဖှံသးပှၤလီၤ. စံးထီၣ်ပတြၢၤအယုၢ် ၂၃ န့ၣ် မ့ၢ်လၢပဖးက့ၤအီၤ လၢခံတဘျီအဃိ, ယသးခုယဲဒိၣ်မးန့ၣ်လီၤ.