လၢကီၢ်ခၠံၣ်လံၣ်, မကၠဲလဲ(န) (Magellan) ပီၣ်လဲၣ်ဒ့စ့ၤန့ၣ် အ့ၣ်ဒြံယဲ(န) စံမါခၢး(စ) (Adrian Simancas) ဒီးအပၢ်န့ၣ် ဒိးလိာ်ကွဲ ချံခ့ယးဖိအကတီၢ်, တကီၢ်ခါန့ၣ်, ပှၤသးစၢ်ခံဆံလွံၢ်နံၣ်ဖိတဂၤအံၤ လဲၤတုၤဝဲဒၣ်ဆူ ပီၣ်လဲၣ်ညၣ်တီသွ့ဖးဒိၣ်တဘ့ၣ် အကိာ်ပူၤ န့ၣ်လီၤ. အ့ၣ်ဒြံယဲ(န) စံးဘၣ် ပှၤပာ်ဖျါတၢ်ကစီၣ်ကရၢလၢ “ယဆိကမိၣ်လၢယသံလံ,” န့ၣ်လီၤ. စဲးကီာ်တစိၤဖိဝံၤ, ပီၣ်လဲၣ်ညၣ်ဖးဒိၣ်န့ၣ် ပျဲပျၢ်ကွံာ် အ့ၣ်ဒြံယဲ(န)ဆူ ထံခုၣ်ကဖး အပူၤန့ၣ်လီၤ. ခီဖျိလၢအဆ့ကၤမူ (life vest) အဃိ, အဝဲထီၣ်ဖီလၢ ထံမဲာ်ဖံးခိၣ်, ဒီးအပၢ်မၤစၢၤအီၤဆူ တၢ်ပူၤဖျဲးအလီၢ်န့ၣ်လီၤ.
လံာ်စီဆှံ အလီၢ်လံၤအပူၤန့ၣ် ဝံယိၤနါ ဘၣ်ကွၢ်ဆၢၣ်မဲာ်ဝဲစ့ၢ်ကီးဒီး ပီၣ်လဲၣ်အညၣ်ဖးဒိၣ်တဘ့ၣ်န့ၣ်လီၤ. ကစၢ်ယွၤ နဲၣ်လီၤအီၤ, ဒ်သိးကလဲၤစံၣ်တဲၤတဲလီၤ ပှၤအံၣ်စရ့လးဖိတဖၣ် အဒုၣ်အဒါ, ပှၤဝ့ၢ်နံၤနဝ့ဖိတဖၣ်လၢ တၢ်ပီၢ်ယၢ်လီၤက့ၤသး အတၢ်ကစီၣ်အဂီၢ်န့ၣ်, စီၤယိၤနါ ပဒ့ၣ်ဟးဆှဲးဝဲ, ဒီးဒိးထီၣ် ကဘီတဘ့ၣ်, လဲၤဝဲဆူ တၢ်လီၢ်အိၣ်ယံၤဝဲဒီးဝ့ၢ်နံၤနဝ့န့ၣ်လီၤ. ကဘီလၢအလဲၤဒိးဝဲန့ၣ် ဘၣ်ကွၢ်ဆၢၣ်မဲာ်ဒီးကလံၤမုၢ်အကတီၢ်, စီၤယိၤနါ စံးဘၣ်တဲဘၣ် ပှၤကဘီဖိတဖၣ်လၢ ကတ့ၢ်လီၤကွံာ်အီၤဆူ ပီၣ်လဲၣ်ပူၤ (ယိၤနါ ၁:၁၁-၁၂,၁၅) န့ၣ်လီၤ. “ဒီးယွၤကတဲာ်ကတီၤတ့ၢ် ညၣ်ဖးဒိၣ်တဘ့ၣ်, ဒ်သိးအကယူၢ်လီၤကွံာ် စီၤယိၤနါလီၤ. စီၤယိၤနါ အိၣ်ဝဲလၢ ညၣ်ဖးဒိၣ်အဟၢဖၢပူၤန့ၣ် သၢနံၤဒီးသၢနၤ” (:၁၇) န့ၣ်လီၤ. စီၤယိၤနါ အတၢ်အိၣ်အသးလၢ တၢ်ဃ့ၢ်ပူၤဖျဲးအသးဒီးကစၢ်ယွၤအလီၢ်န့ၣ် ဆီတလဲက့ၤဝဲဆူ တၢ်ကိးသတြီထီၣ်ယွၤ, “ဒီးစီၤယိၤနါ ဘါထုကဖၣ်ယွၤလၢ ညၣ်အဟၢဖၢပူၤ” (၂:၁)
န့ၣ်လီၤ.
ကစၢ်ယွၤ နၢ်ဟူ စီၤယိၤနါ အတၢ်ထုကဖၣ်, ဒီးအုၣ်က့ၤခီၣ်က့ၤအီၤ (:၁၀) န့ၣ်လီၤ. ဝံၤန့ၣ်ဒီး, စီၤယိၤနါ လဲၤစံၣ်တဲၤတဲလီၤတၢ်လၢ ပှၤဝ့ၢ်နံနဝ့ဖိတဖၣ်အအိၣ်, ဒီးအဝဲသ့ၣ် ပီၢ်ယၢ်လီၤက့ၤအသး (၃:၈-၁၀) န့ၣ်လီၤ.
စီၤယိၤနါ ဃ့သကွံၢ်ကညးတၢ်လၢ ညၣ်ဖးဒိၣ်တဘ့ၣ် အဟၢဖၢပူၤန့ၣ် ကစၢ်ယွၤ မ့ၢ်နၢ်ဟူဝဲဒီး, ကနၢ်ဟူဝဲဒၣ် ပတၢ်ဃ့သကွံၢ်ကညး, ဒီးဖဲပအိၣ်ဝဲတပူၤလၢ်လၢ်န့ၣ် ကအုၣ်က့ၤခီၣ်က့ၤပှၤသပှၢ်တၢၢ်န့ၣ်လီၤ. လၢတၢ်ဃ့ၢ်အိၣ်ယံၤဒီးကစၢ်ယွၤအလီၢ်န့ၣ် မ်ပကဃ့ၢ်ဆူအအိၣ် လၢတၢ်ထုကဖၣ်အပူၤ, ဒီးပကသ့ၣ်ညါ ဖဲလၢပကိးထီၣ်အီၤအကတီၢ်, ကစၢ်ယွၤ ကစံးဆၢပှၤန့ၣ်လီၤ.