နမ့ၢ်နၢ်ဟူဘၣ်တ့ၢ်လံ တၢ်ပာ်ဖျါ “တၢ်လံာ်ဃာ် အဲၣ်(လ)ဘၣ်ထရီး(စ) (albatross) လၢယကိာ်လိၤ” (လံာ်ကျိၤကူာ်တထံၣ် လၢအအဲၣ်ဒိးပာ်ဖျါ တၢ်ဝံဃၢ လၢအမၤလီၤဘှံးတၢ်) န့ၣ်ဒီး, မ့ၢ်ဒၣ်နနၢ်ဟူဘၣ်လံ ထါမံၤဟူသၣ်ဖျါတယုၢ်လၢ ပှၤကိၤလၤဝါဖိ အပှၤကွဲးထါ စဲမယဲၣ် ခိလရ့း (Samuel Coleridge) အထါတယုၢ်, “Rime of the Ancient Mariner” လံန့ၣ်လီၤ. ထါတယုၢ်အံၤအပူၤန့ၣ် ပှၤကဘီဖိတဂၤမၤသံဘၣ်ဝဲ ပီၣ်လဲၣ်ထိၣ်ဘျ့ၣ်ဘျီၣ်ဝါလၢ အမၤအၢမၤသီတၢ်တသ့, ထိၣ်လၢအဘှါတဘ့ၣ်န့ၣ်လီၤ. ပှၤကဘီဖိတဖၣ် နာ်ဝဲဒၣ်လၢ ပှၤတဂၤအံၤ အတၢ်မၤအၢမၤသီတၢ်န့ၣ် ဟဲစိာ် တၢ်ဆိၣ်အၢလၢ အဝဲသ့ၣ် “ပီၣ်လဲၣ်အတၢ်လဲၤတၢ်က့ၤ” အဃိ, ဒီးမၢဆူၣ်မၤစိးအီၤ ဒ်သိးကလံာ်သိးထီၣ် ထိၣ်အသံလၢအကိာ်လိၤ, ဒ်အမ့ၢ်တၢ်စံၣ်ညီၣ်အီၤအဂီၢ်န့ၣ်လီၤ.

လၢနတၢ်အိၣ်မူအပူၤန့ၣ် တၢ်ပီၢ်ယၢ်လီၤက့ၤသး ဒ်တၢ်ဝံဃၢဖးဒိၣ်တမံၤ ကဝီၤဃာ် နကိာ်လိၤ မ့ၢ်အိၣ်တမံၤမံၤဧါ. ပဝဲခဲလၢာ်ပအိၣ်ဒီး တၢ်အကတီၢ်ဖိ, ဒ်သိးပကဒိးန့ၢ်က့ၤအီၤအဂီၢ်, အလီၢ်မ့ၢ်အိၣ်ဒီး ဖဲဒၣ်ပကဘၣ်မၤတၢ်တမံၤဂ့ၤမံၤဂ့ၤန့ၣ်လီၤ. ကမ့ၢ်ဝဲ ဒ်တၢ်ဆိၣ်အၢလၢပဘၣ်ဝံစိာ် ပတၢ်ကမၣ် အတၢ်ဝံဃၢ, ဒီးပီၢ်ယၢ်လီၤက့ၤပသးထီဘိအသိးန့ၣ်လီၤ.

ဘၣ်ဆၣ်, ကစၢ်ယွၤအဘျုးအဖှိၣ်န့ၣ် မၤပူၤမၤဖျဲး ပသူၣ်ပသးတဖၣ်လၢ တၢ်ပီၢ်ယၢ်လီၤက့ၤသးအနးကတၢၢ်တဖၣ်အပူၤသ့ဝဲဒၣ်န့ၣ်လီၤ. ပဝဲကိးဂၤဒဲး ပမၤဘၣ်တၢ်ဒဲးဘး (၁ယိၤ ၁:၈,၁၀) ဘၣ်ဆၣ်, ပမ့ၢ်အၢၣ်လီၤ ပတၢ်ဒဲးဘးတီတီလိၤလိၤဆူ ကစၢ်ယွၤန့ၣ်ဒီး, အဝဲအၢၣ်လီၤပှၤလၢ “ကပျၢ်ကွံာ် ပတၢ်ဒဲးဘး, ဒီးသ့စီကွံာ်ပှၤလၢ ပတၢ်ဒဲးဘးခဲလၢာ်” (:၉) န့ၣ်လီၤ. ကစၢ်ယွၤအဘျုးအဖှိၣ် မ့ၢ်ဟဲနုာ်လီၤန့ၣ်ဒီး, အတၢ်ကပီၤ, ဒီးအတၢ်အဲၣ်န့ၣ် ကဟဲယွၤလီၤခီဖျိလၢပှၤ (၂:၁၀), ဒီးမၤပူၤမၤဖျဲးပှၤ ဒ်သိးပကအဲၣ်ပှၤလၢပခိၣ်ပဃၢၤတဖၣ် (၃:၁၄) န့ၣ်လီၤ.

ဖဲ ခိလရ့း အထါပူၤန့ၣ်, ပှၤဒိးကဘီဖိလၢ အဘၣ်တၢ်မၤဆါအီၤနးနးကလဲာ်တဂၤစ့ၢ်ကီး, အကတၢၢ်န့ၣ် ဒိးန့ၢ်ဝဲ ကစၢ်ယွၤ အဘျုးအဖှိၣ်ဒ်သိးအံၤန့ၣ်လီၤ. တၢ်အဲၣ်ဘၣ် ယွၤအတၢ်ဘၣ်တ့န့ၣ် မ့ၢ်ဟဲဃ့ၢ်နုာ်လီၤဆူ အသးကံၢ်ပူၤန့ၣ်ဒီး, ဒ်သိးကဃ့ထုတဖၣ်တၢ်အဂီၢ်, ကထိၣ်ဟူးထိၣ်ဂဲၤထီၣ်အီၤ, ဒီးထိၣ်သံအတၢ်ဝံဃၢ ကလီၤတဲာ်လၢအကိာ်လိၤ, “ဒ်စၢၢ်သၣ် လီၤတဲာ်ဆူ ပီၣ်လဲၣ်ပူၤအသိး,” ဒီးကဟါမၢ်ကွံာ်ဝဲလီၤစိၤလီၤထီန့ၣ်လီၤ.