တၢ်မၤဂ့ၤမၤဘျုးတဖၣ်အဂီၢ်, ကီၢ် စ့ကဖီ (Singapore), အထံကီၢ်ပဒိၣ် ဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်လၢကဆီၣ်ထွဲမၤစၢၤတၢ် ခီဖျိ “တၢ်ဟ့ၣ်မၤဘူၣ်-ပာ်ဖှိၣ်အါထီၣ်” န့ၣ်လီၤ. တၢ်မၤအံၤ မ့ၢ် “တၢ်ဟ့ၣ်အါထီၣ် တၢ်မၤဘူၣ်” ကျိာ်စ့ပာ်ဖှိၣ်တုၤအပှဲၤထီၣ်ဘး (မ့) ဟ့ၣ်အါန့ၢ်အန့ၣ်ဆူ တၢ်ဟ့ၣ်သးကညီၤကရၢလီၤဆီတဖုဖုန့ၣ်လီၤ. ခီဖျိတၢ်ပာ်ဖှိၣ်အါထီၣ် ကမျၢၢ်အတၢ်ဟ့ၣ်မၤစၢၤတဖၣ် တုၤလီၤတီၤလီၤအံၤ, ထံကီၢ်ပဒိၣ် မုၢ်လၢ်ဝဲလၢ ကထိၣ်ဟူးထိၣ်ဂဲၤထီၣ် ပှၤဂီၢ်မုၢ်အသး, ဒ်သိးကမၤသကိးအါထီၣ်တၢ်လၢ တၢ်သးအိၣ်ဟ့ၣ်မၤဘူၣ်တၢ်အဂီၢ်န့ၣ်လီၤ.

ဒ်ပမ့ၢ် ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အသိး, ပဘၣ်တၢ်ကိးပှၤဆူ ကစၢ်ယွၤ အတၢ်စီတၢ်ဆှံ နီၣ်ထိၣ်အပတီၢ်တဖၣ် လၢပတၢ်အိၣ်မူအတၢ်လဲၤကျဲအပူၤအဂီၢ်န့ၣ် တၢ်မၤကျိၤကျဲခံကလုာ်အံၤ ဒုးသ့ၣ်နီၣ်ယၤန့ၣ်လီၤ. ပှၤဖံးလံးပံၤဖိတဖၣ်အဂီၢ်, စီၤပီလူး အလံာ်ပရၢအပူၤန့ၣ် သဆၣ်ထီၣ်အဝဲသ့ၣ်အခံလၢ “မၤသုတၢ်အုၣ်က့ၤခီၣ်က့ၤဒၣ် သုဝဲ” (၂:၁၂), ဒီး “လူၤတၢ်, ဒီးဃ့ၢ်သဘျိၣ်” (၃:၁၂,၁၄) ဆူတၢ်ပနီၣ်အအိၣ်, ဒ်သိးကန့ၢ်ဘၣ်တၢ်ဘျုးဘၣ်ဃးဒီးယွၤအတၢ်ကိးထီၣ်ထီ လၢယ့ၣ်ရှူးခရံာ်အပူၤန့ၣ်လီၤ. တကတီၢ်ဃီန့ၣ် ပာ်ဖျါမၤလီၤတံၢ်ဝဲဒၣ် “အဂ့ၢ်ဒ်အံၤ, ပှၤလၢအမၤဝဲဖဲဒၣ်အသးဂ့ၤလၢသုပူၤ, ဒ်သိးသုသးကအိၣ်, ဒီးဒ်သိးသုကမၤတၢ်န့ၣ်, မ့ၢ်ယွၤ” (၂:၁၃) န့ၣ်လီၤ.

ခီဖျိလၢတၢ်မၤဂ့ၤ (မ့) တၢ်မၤမုာ်မၤဖှံပှၤသးအဃိ, တမ့ၢ်လၢ ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ် အိၣ်ဃူအိၣ်ဖိးလိာ်သးဒီးကစၢ်ယွၤဘၣ်န့ၣ်လီၤ. ဘၣ်ဆၣ်, လၢပသူၣ်ဂ့ၢ်သးကျိၤအတၢ်ဒိၣ်ထီၣ်အဂီၢ်, တၢ်ရ့လိာ်မၤသကိးတၢ်ဒီးယွၤန့ၣ် တၢ်ကအိၣ်ဝဲတမံၤ န့ၣ်လီၤ. တၢ်လၢအလိၣ်ဝဲန့ၣ် မ့ၢ်ပတၢ်ပာ်သူၣ်ပာ်သး, ဒီးပတၢ်ထဲးဂံၢ်ထဲးဘါ, တၢ်လၢ ပကဘၣ်မၤ, ဘၣ်ဆၣ်, ပတမၤအီၤလၢ ပှၤကညီအဂံၢ်အဘါဘၣ်. ပဒိးန့ၢ်တၢ်အုၣ်က့ၤခီၣ်က့ၤ, ခီဖျိလၢအဘျုးအဖှိၣ်အဃိ, ကစၢ်ယွၤ အဲၣ်ဒိးလၢ ပကမ့ၢ် ပှၤစီဆှံ- ပကဘၣ်မ့ၢ်ထဲဒၣ်ယွၤအဂီၢ်- ဒီးပဟ့ၣ်ဆၢက့ၤအီၤ လၢတၢ်သူၣ်တီသးတီ, ဒီးလၢတၢ်သ့ၣ်ညါဆၢက့ၤ အတၢ်ဘျုးတၢ်ဖှိၣ်အပူၤန့ၣ်လီၤ. ဒ်သိးပကသ့ဃုထံၣ်န့ၢ် တၢ်ဒိကနၣ်ယွၤ, ဒီးတၢ်ဘၣ်ယွၤအသးအဂီၢ်န့ၣ် ကစၢ်ယွၤ ကမၤစၢၤပှၤန့ၣ်လီၤ. ပတၢ်လဲၤကျဲမ့ၢ်ကမၣ်န့ၣ် “ယွၤကဒုးနဲၣ်ပှၤ” (ဖံးလံး ၃:၁၅), ဒ်သိးပကတြီဆၢတၢ်လ့ပစီ (၁ ကရံၣ် ၁၀:၁၃) အဂီၢ်, ယွၤကဟ့ၣ်ပှၤ တၢ်ဂံၢ်တၢ်ဘါ, ဒီး “ဒ်သိးပကမၤတၢ်ဂ့ၤတဖၣ်” (အ့းဖ့း ၂:၁၀), လၢယွၤအမဲာ်ညါအဂီၢ်, ကစၢ်ယွၤ ကဟ့ၣ်စိဟ့ၣ်ကမီၤပှၤန့ၣ်လီၤ.