ဖဲ ၁၉၁၁-၁၉၁၅ နံၣ်တဖၣ်အပူၤန့ၣ် အီး(စ)ဝဲ(လ)ဒီးဘ့းဒံၣ် ခၠ့(မ)ဘၢၣ်(စ) (Oswald and Biddy Chambers) နီၢ်ဒီမါဝၤခံဂၤ, အိးထီၣ်လံာ်စီဆှံကၠိလၢ ဝ့ၢ်လိဒိၣ် (London) န့ၣ်ဒီး, အဝဲသ့ၣ် အိၣ်မူပိာ်ထွဲ သးသမူအတၢ်သိၣ်တၢ်ဘျၢ လၢအမ့ၢ် “တလဲၤကပာ်ကွၢ်ကပာ် ပှၤလၢအလိၣ်ဘၣ်တၢ်တဖၣ်”ဘၣ်န့ၣ်လီၤ. ပှၤဝ့ၢ် လိဒိၣ်ဖိ, လၢအသူၣ်ဆးအသးဆးတဖၣ်အဂီၢ်, တၢ်မၤအသးအံၤ ကဲထီၣ်တၢ်ကမၢကမၣ်, ဒီးဆိကမိၣ်ဝဲဒၣ် ပှၤကဟံးန့ၢ်ခွဲးယာ်လၢ ကမၤလိန့ၢ်ခီလ့ၣ်ကၠိ အတၢ်ကူၣ်သ့အဂီၢ်န့ၣ်လီၤ. ကကွဲမုာ်ဝဲဒၣ် ပှၤဂုၤပှၤဂၤကလူၤပိာ်ထွဲမၤတၢ်အလီၢ်န့ၣ် အီး(စ)ဝဲ(လ)ခိးကွၢ်ဝဲဒၣ်, ဒီးစံးဆၢက့ၤဝဲဒၣ်လၢ “ယမူဒါန့ၣ် မ့ၢ်ဝဲဒၣ် ယကဘၣ်ဟ့ၣ်တၢ်န့ၣ်လီၤ.ပှၤလၢအဃ့တၢ်တဖၣ်န့ၣ် ကစၢ်ယွၤ ကအံးထွဲကွၢ်ထွဲဝဲဒၣ်” န့ၣ်လီၤ.

နီၢ်ဒီမါဝၤခံဂၤအံၤ အိၣ်မူလူၤပိာ်ထွဲ တၢ်အဒိ, ဒ်ပတၢ်ဘၣ်တ့ကစၢ်ယွၤ အသူၣ်အိၣ်အသးအိၣ်ဟ့ၣ်တၢ်အသိးန့ၣ်လီၤ. ကစၢ်ယွၤ ဟ့ၣ်လီၤ တၢ်မၤလိာ်တဖၣ် ခီဖျိလၢစီၤမိၤရှ့, ဒ်သိးအပှၤဂီၢ်မုၢ် ကအိၣ်မူအိၣ်ဂဲၤ, ဒီးမၤဂ့ၤမၤစၢၤပှၤဂုၤပှၤဂၤအဂီၢ်, ဟ့ၣ်လီၤဝဲ တၢ်အဲၣ်တၢ်သးကညီၤတၢ်အကျိၤအကျဲတဖၣ်,ဃုာ်ဒီးတၢ်ဟ့ၣ်လီၤ တၢ်အီၣ်တၢ်အီ, ဒီးတၢ်လၢ
အအိၣ်ဒီးအဝဲသ့ၣ်တဖၣ်န့ၣ်လီၤ. စီၤမိၤရှ့ စံးဘၣ်တဲဘၣ် ပှၤအံၣ်စရ့လးဖိတဖၣ်လၢ “ဒီးသၢနံၣ်အကတၢၢ်န့ၣ် နဘၣ်ဟဲစိာ် နတၢ်အါထီၣ်ဆံဆဲၣ်ပူတပူခဲလၢာ်,… ဒီးပှၤလ့ၤဝံဖိ …., ဒီးပှၤတခီဘီမုၢ်ဖိ, ဒီးပှၤဖှိၣ်ဃဲ, ဒီးပှၤမုၣ်ကမဲလၢ အအိၣ်လၢနပဲတရီအပူၤန့ၣ်ကဟဲ, ဒီးကအီၣ်တၢ်ဒီးဘျဲးအီၣ်” တၢ်အဂီၢ် (၅ မိၤ ၁၄:၂၈-၂၉) န့ၣ်လီၤ. ကစၢ်ယွၤ အံးထွဲကွၢ်ထွဲ ပှၤအဆံးကတၢၢ်တဖၣ် ခီဖျိလၢအပှၤဂီၢ်မုၢ် အတၢ်သးအိၣ်ဟ့ၣ်ညီတၢ်န့ၣ်လီၤ.

ခၠ့(မ)ဘၢၣ်(စ) အနီၢ်ဒီမါဝၤခံဂၤ, အတၢ်နာ်သန့ၤကစၢ်ယွၤန့ၣ် အဂံၢ်ဘါဆူၣ်ဒိၣ်မးအဃိ, ကဟ့ၣ်ဝဲဒၣ်လၢ တၢ်သူၣ်အိၣ်သးအိၣ်အပူၤ, လၢအတအိၣ်ဒီးတၢ်သံကွၢ်ဃုသ့ၣ်ညါတၢ်ဘၣ်န့ၣ်လီၤ. အဝဲသ့ၣ် မၤလိန့ၢ်ဝဲဒၣ် “တၢ်ပျံၤယွၤ ကိးမုၢ်နံၤမုၢ်နၤဒဲး” (:၂၃), ဒီးဒ်သိးယွၤကဆိၣ်ဂ့ၤအဝဲသ့ၣ်လၢ “ကယဲၢ်အတၢ်မၤလၢအစုမၤတၢ်” (:၂၉) န့ၣ်လီၤ.

ပမ့ၢ်သးန့ၤထီၣ်ပသးလၢ ကစၢ်ယွၤ, လၢတၢ်ကူၣ်သ့, ဒီးတၢ်သ့နီၤဖးပဲာ်ဖးတၢ်အဂီၢ်န့ၣ်ဒီး, ဒ်သိးပကသူၣ်အိၣ်သးအိၣ်ဟ့ၣ်ညီတၢ်အဂီၢ်, တၢ်ကထိၣ်ဟူးထိၣ်ဂဲၤထီၣ်ပသးန့ၣ်လီၤ. ဒ်ကစၢ်ယွၤ ကတဲာ်ကတီၤန့ၢ် ပှၤတခီဘီမုၢ်ဖိ, ပှၤဖိၣ်ဃဲ, ဒီးပှၤမုၣ်ကမဲတဖၣ်အသိး, ပသ့ၣ်ညါ လၢတၢ်အဲၣ်တၢ်သးအိၣ်အပူၤ, ကစၢ်ယွၤ ကကဲခိၣ်ကဲနၢ်, ဒီးကနဲၣ်ဆှၢပှၤလၢပသးသမူအတၢ်လဲၤကျဲန့ၣ်လီၤ.