လၢအတၢ်သူၣ်ထီၣ်အပူၤန့ၣ် ခဲၣ် (Ken) တဂၤ, ဟးဆှဲး ပှၤမၤတၢ်ဖိ အိၣ်ဟဲလၢထံကီၢ်အဂၤတဖၣ်န့ၣ်လီၤ. အဝဲသ့ၣ်အလုၢ်လၢ်တဖၣ်, ဒီးအတၢ်အိၣ်မူကျိၤကျဲတဖၣ်န့ၣ် လီၤဆီလိာ်သးဒီးအီၤဒိၣ်မးအဃိ, အသးတံာ်တာ်ဝဲဒၣ်န့ၣ်လီၤ. ဘၣ်ဆၣ်, ဘၣ်တနံၤန့ၣ်, ဖဲ ခဲၣ် ဃ့ဘါထုကဖၣ်ဝဲအကတီၢ်, လၢအသးပူၤန့ၣ် တၢ်ဆိကမိၣ်ဟဲန့ၣ်လီၤဝဲလၢ “အဝဲသ့ၣ်တဖၣ်န့ၣ် မ့ၢ်တ့ၢ်လံ ပှၤအိၣ်လၢနခိၣ်နဃၢၤအါနံၣ်အါလါလံဘၣ်ဆၣ်, နတဟ့ၣ်ခီဟ့ၣ်နီၤ တၢ်သးခုအကစီၣ် လၢအဝဲသ့ၣ်နီတဘျီဘၣ်. ကွၢ်ထံဆိကမိၣ်က့ၤနတၢ်ပာ်သူၣ်ပာ်သးလၢ အဝဲသ့ၣ်အလိၤတက့ၢ်” န့ၣ်လီၤ.

လံာ်စီဆှံ ပာ်ဖျါထီၣ် ကစၢ်ယွၤ ဟ့ၣ်ပလီၢ် ပှၤအံၣ်စရ့လးဖိလၢ တၢ်ဟ့ၣ်ပလီၢ် ဒ်သိးအံၤတမံၤဃီအဂ့ၢ်, “ကွၢ်ဆိကမိၣ် သုကျဲဧိၤကပူၤဧိၤတက့ၢ်” (ဃးကဲ ၁:၇) န့ၣ်လီၤ. ဖဲ ဘၤဘူၤလိၣ် တၢ်စိာ်မၢကဲကုၢ်ဝံၤန့ၣ်ဒီး, ယွၤ အပှၤဂီၢ်မုၢ်တဖၣ် ဘၣ်ဟဲက့ၤကဒါဆူ ဝ့ၢ် ယရူၤရှလ့ၣ်, အိၣ်ဒီးမူဒါလၢ ကတ့ထီၣ်က့ၤ ယွၤအတၢ်လုၢ်ဟံၣ်န့ၣ်လီၤ. ကစၢ်ယွၤ “ထိၣ်ဂဲၤပၤရၣ်အစီၤပၤကိရ့ၣ်အသး” (ဧ့စြၤ ၁:၁), ဒ်သိးကဟ့ၣ်လီၤအကလုၢ်လၢ ပှၤကဘၣ်သူၣ်ထီၣ် ယွၤအတၢ်လုၢ်ဟံၣ်, ဒီးကဟ့ၣ်လီၤကျိၣ်စ့ထူလွဲ, ဒီးတၢ်လၢအလိၣ်တဖၣ် (:၂-၄) န့ၣ်လီၤ. ဘၣ်ဆၣ်, ဖဲပှၤပာ်လီၤတၢ်သူၣ်ထီၣ် အခီၣ်ထံးဝံၤန့ၣ်ဒီး, တၢ်တြီ, တၢ်မၤတံာ်တာ်တဖၣ်အိၣ်ထီၣ်ဝဲ (၄:၁-၅) အဃိ, တၢ်တ့သူၣ်ထီၣ် ယွၤအတၢ်လုၢ်ဟံၣ် အတၢ်မၤန့ၣ် ဘၣ်တၢ်ဆိကတီၢ်အီၤ တဆံလွံၢ်နံၣ်ဒီတကတီၢ်န့ၣ်လီၤ.

ကစၢ်ယွၤ ကတိၤတၢ်ဒီးပှၤဂီၢ်မုၢ် ခီဖျိလၢ ဝံဃးကဲ, ဒီးစံးဝဲဒၣ်လၢ “ကွၢ်ဆိကမိၣ် သုကျဲဧိၤကပူၤဧိၤတက့ၢ်…. မ့ၢ်ဝဲလၢယဟံၣ်လၢအအိၣ်သယုၢ်အဃိ, ဒီးသုဃ့ၢ်တဂၤဆူ အဟံၣ်ဒၣ်ဝဲစုာ်စုာ်အဃိ” (ဃးကဲ ၁:၇,၉) န့ၣ်လီၤ. ကစၢ်ယွၤ စံးဘၣ်အဝဲသ့ၣ်လၢ “ကွၢ်ထံဆိကမိၣ် သုတၢ်အိၣ်မူအိၣ်ဂဲၤန့ၣ်တက့ၢ်. တၢ်လၢယအဲၣ်ဒိးသုကမၤတဖၣ်န့ၣ် မ့ၢ်သုမၤတ့ၢ်လံဧါ” န့ၣ်လီၤ.

ကစၢ်ယွၤ သိၣ်လိ အပှၤဂီၢ်မုၢ် (:၅-၁၁), ဒီးဖဲတၢ်စးထီၣ်က့ၤ တၢ်ဖံးတၢ်မၤအကတီၢ်န့ၣ်ဒီး, ယွၤဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်လၢ “ယအိၣ်ဒီးသု…ပျံၤတၢ်တဂ့ၤ” (၂:၄-၅) န့ၣ်လီၤ. ဒီးတၢ်ဘှီဝံၤက့ၤ ယွၤအတၢ်လုၢ်ဟံၣ်လၢ တၢ်ဆၢကတီၢ်စှၤန့ၢ် ယဲၢ်နံၣ် အတီၢ်ပူၤန့ၣ်လီၤ.

ပကဘၣ်ကွၢ်ထံဆိကမိၣ်က့ၤ ပတၢ်အိၣ်မူကျိၤကျဲ လၢပတၢ်အိၣ်မူအဘၢၣ်ကဝီၤ မနုၤတဖၣ်အပူၤန့ၣ်လဲၣ်. ဒ်သိးယွၤ ကဒုးနဲၣ်ပှၤ, ဒီးကမၤစၢၤပှၤလၢ ပကလူၤပိာ် ယွၤဘှီဘၣ်မၤလိၤက့ၤတၢ်အကျဲအဂီၢ်, မ်ပကဃ့အီၤန့ၣ်တက့ၢ်.