ပှၤတသ့ၣ်ညါ အဲး(ဒ)လ့ၤ ဖိလး(ဒ) (Adelaide Pollard) အဂ့ၢ်အါအါဘၣ်န့ၣ် အိၣ်ဒီးအတၢ်ဂ့ၢ်တၢ်ကျိၤန့ၣ်လီၤ. အဝဲမ့ၢ် ကစၢ်ယွၤ အခ့အပှၤတဂၤ, လၢအဆီၣ်လီၤအသး, ဒီးတအဲၣ်ဒိးဝဲလၢ ပှၤသ့ၣ်ညါပာ်ပနီၣ်အီၤဘၣ်န့ၣ်လီၤ. ဖဲအသးအိၣ်လွံၢ်ဆံန့ၣ် အသးကလၢၢ်ဘၣ်နးနးကလဲာ်, ဒ်သိးကကဲထီၣ် ပှၤစိာ်တၢ်သးခုကစီၣ်တဂၤဆူ ကီၢ်အၤဖြံၤကၤ (Africa) ဘၣ်ဆၣ်, တဒိးန့ၢ်ဝဲဒၣ် ခွဲးယာ်အံၤအဃိ, အသူၣ်ဟးဂီၤအသးဟးဂီၤဒိၣ်မးန့ၣ်လီၤ. ဘၣ်ဆၣ်, အဲး(ဒ)လ့ၤ သ့ၣ်နီၣ်ထီၣ်က့ၤဝဲဒၣ် လံာ်စီဆှံတဆၢ, “ယမၤသုဒ်ပှၤတ့သပၢၤတဂၤအံၤအသိးန့ၣ် တသ့ဘၣ်ဧါ, ယွၤစံးဝဲဒၣ်” (ယံး ၁၈:၆) န့ၣ်လီၤ. လၢခံန့ၣ်ဒီး, ကွဲးထုးထီၣ် ထါတၢ်သးဝံၣ်တယုၢ်, အိၣ်ဒီးထါအဖျၢၣ်တဖၣ်, လၢအမ့ၢ် “နမ့ၢ်ပှၤတ့သပၢၤ, ယမ့ၢ်ကပံာ်” န့ၣ်လီၤ.
က့ၢ်ဂီၤဟ့ၣ်ဒိလၢ လံာ်ယံးရမံယၤအပူၤန့ၣ် အိၣ်ဒီးတၢ်စံးကတိၤပာ်ဖျါထီၣ် ခ့ခါ ပတၢ်အိၣ်မူအဂီၢ်အါမး “သပၢၤလၢ အတ့ဝဲလၢ ကပံာ်န့ၢ်ဟးဂီၤဝဲ လၢပှၤတ့သပၢၤအစုပူၤ, ဒီးမၤကဒီးသပၢၤတဖျၢၣ်ဒ်အဘၣ် ပှၤတ့သပၢၤအသးလၢ အကမၤဝဲအသိး” (ယံး ၁၈:၄) န့ၣ်လီၤ. တၢ်ဂ့ၢ်အံၤ မ့ၢ်တၢ်ဂီၤ, ဘၣ်ဃးဒီးကစၢ်ယွၤ ဘှီဂ့ၤထီၣ်က့ၤပှၤဆူ အတၢ်တိာ်ကျဲၤ လၢအဂ့ၤဒိၣ်န့ၢ်ဒံး ပတၢ်အိၣ်မူလၢအပူၤကွံာ်အဂ့ၢ်န့ၣ်လီၤ. ဖဲပဆိကမိၣ်ထီၣ် တၢ်လၢ
ပကြၢးမၤ,ဒီးတၢ်လၢပကြၢးမ့ၢ်တၢ် ဒ်လဲၣ်ဂ့ၤဒ်လဲၣ်ဂ့ၤန့ၣ် လၢပတၢ်အိၣ်မူအဂီၢ်, ကစၢ်ယွၤ အိၣ်ဒီးက့ၢ်ဂီၤအဂၤ, “ဒ်ကပံာ်အိၣ်လၢ ပှၤတ့သပၢၤအစုပူၤအသိး, နဲစ့ၢ်ကီးနအိၣ်လၢ ယစုပူၤ” (:၆) န့ၣ်လီၤ.
လၢခံအကတၢၢ်န့ၣ် အဲး(ဒ)လ့ၤ လဲၤဝဲဒၣ်ဆူ ကီၢ်အၤဖြံကၤ, ဘၣ်ဆၣ်, ကစၢ်ယွၤ အတၢ်တ့ဒုးအိၣ်ထီၣ်က့ၤ အတၢ်အိၣ်မူန့ၣ် ကမ့ၢ်လၢ အကဘၣ်မၤ တၢ်မၤအဂၤတဖၣ်, ဘၣ်သ့ၣ်သ့ၣ်, ကဘၣ်ကွဲးထုးထီၣ် ထါတၢ်သးဝံၣ်, “ဖဲဒၣ်နသးန့ၣ်ဘှီယၤ,” ဒီးစးထီၣ်ဖဲန့ၣ်, ထါတၢ်သးဝံၣ်တယုၢ်အံၤ ထိၣ်ဟူးထိၣ်ဂဲၤဝဲဒၣ် ပှၤလၢအကလီၢ်တဖၣ်အသး အါမးန့ၣ်လီၤ. ဖဲပသးကလၢၢ်ဘၣ်လၢ “ပကဘၣ်အိၣ်ဃိကလာ်” န့ၣ်ဒီး, အကတီၢ်ဖဲန့ၣ် ပဂ့ၤဆိကမိၣ်ထီၣ်လၢ မ့ၢ် ကစၢ်ယွၤ ကဘှီဂ့ၤထီၣ်က့ၤပှၤဒ်လဲၣ်အဂ့ၢ်န့ၣ်လီၤ. ပကမၤတၢ်ဂ့ၤဂ့ၤ, ခီဖျိပကပျဲ ကစၢ်ယွၤ မၤတၢ် ဒ်အကျိၤအကျဲဒၣ်ဝဲအသိး, ဒီးအိၣ်ခိးကွၢ် ကစၢ်ယွၤ အတၢ်တိာ်ကျဲၤ လၢအဒိၣ်န့ၢ်ဒံး နတၢ်အိၣ်မူအပူၤကွံာ် “လၢတၢ်ဆီၣ်လီၤသး, ဒီးအိၣ်ဃိကလာ်” န့ၣ်တက့ၢ်.