ထြံနၣ် (Trina) တဂၤ, ဒိးန့ၢ်ဝဲ လံာ်ပျဲက့ (ticket) အကလီ တဘ့ၣ်လၢ ‘တၢ်ဆါလံာ်ပျဲက့လၢာ်လံအမူး’ တမူးအဂီၢ်, ဒီးဆွံနုာ်ဃာ်ဝဲလၢ အလံာ်စီဆှံအပူၤန့ၣ်လီၤ. ဝံၤန့ၣ်ဒီး, အဖိခွါ ထံၣ်ဝဲဒၣ် လၢတၢ်သးအ့န့အပူၤန့ၣ် ထြံနၣ် လူၤကွၢ်ဃုတၢ်တမံၤမံၤ, လၢတၢ်အီၣ်တၢ်အီအတလါဆၢထၢၣ်အပူၤန့ၣ်လီၤ. ထြံနၣ် စံးဘၣ်အဖိခွါလၢ အလံာ်စီဆှံ ဟါမၢ်အဂ့ၢ်န့ၣ်ဒီး, အဖိခွါ သံကွၢ်အီၤလၢ ဘၣ်မနုၤအဃိ, နလူၤဃု နလံာ်စီဆှံလၢ တၢ်အီၣ်အပူၤလဲၣ်န့ၣ်လီၤ. အဝဲစံးဆၢဝဲဒၣ်လၢ “ယလူၤဃုယဲလၢ တၢ်လီၢ်ကိးပူၤဒဲးန့ၣ်ဝံၤလံ, ဒီးမူးန့ၣ် ကစးထီၣ်လၢ
မံးနံးသၢဆံအတီၢ်ပူၤ, ဒီးယတအဲၣ်ဒိးစဲၤခံနီတစဲးဘၣ်” န့ၣ်လီၤ. အဖိခွါ စံးဘၣ်အီၤ, လၢတၢ်နံၤတၢ်အ့အပူၤ, “မိမိၢ်ဧၢ, ထိၣ်ကဆှၣ်လီၤနသး, ယဆိကမိၣ်လၢ နအိၣ်ဒီး “ဖိၣ်မိၣ်” (FOMO), လၢတၢ်ဟါမၢ်အဃိ, နပျံၤတၢ်ဖုးတၢ်” န့ၣ်လီၤ. ထြံနၣ် နံၤထီၣ်ဝဲဒၣ်, ဒီးဖဲအဖိခွါလူၤဃုစၢၤအီၤအကတီၢ်, အဝၤဟဲနုာ်လီၤ, အစုန့ၣ်ဖီၣ်ဃာ်ဝဲ လံာ်စီဆှံ, ဒီးစံးဘၣ်အမါလၢ “နပာ်တ့ၢ် နလံာ်စီဆှံလၢသိလ့ၣ်အပူၤန့ၣ်လီၤ.”

တၢ်မုာ်လၤသးခုဝဲဒၣ် ခီဖျိတၢ်ဆိၣ်ဂ့ၤလၢ ပတဆိကမိၣ်ပာ်အီၤ, တၢ်ဒိးန့ၢ်နံၤသဘျ့အါအါကလဲာ်, (မ့) လၢသးသမူဒီတစိၤ တၢ်ဒိးန့ၢ် ခွဲးဂ့ၤယာ်ဘၣ် သ့ဝဲဒၣ်ထဲတဘျီဧိၤ အဂီၢ်န့ၣ် တမ့ၢ်တၢ်လၢအကမၣ်ဘၣ်ဆၣ်, တၢ်ဆၢမိၣ်န့ၢ် တၢ်သးခုသးမုာ်န့ၣ်ဆီတလဲ အသးသ့ဝဲဒၣ်ညီညီဖိဆူ တၢ်ကဟါမၢ် အတၢ်ပျံၤတၢ်ဘၣ်ယိာ်တမံၤန့ၣ်လီၤ. တၢ်လ့ပစီ လီၤဘၣ်ပှၤ သ့ဝဲဒၣ် ခီဖျိလၢပကဆိကမိၣ်, မ့ၢ်ကစၢ်ယွၤ လဲၤကပာ်ပှၤလံဧါ, (မ့) မ့ၢ်ယွၤ လၢတအိၣ်ခိးကွၢ်ပှၤလၢၤဘၣ်ဧါန့ၣ်လီၤ. ဘၣ်ဆၣ်, “ပှၤလၢအတ့လီၤမူခိၣ်ဒီးဟီၣ်ခိၣ်” (စံး ၁၂၁:၂) တဂၤ, အိၣ်ခိးကွၢ်ပှၤထီဘိ, ဒီးဟ့ၣ်မၤပှဲၤတၢ်လၢပဂီၢ်, ဒီးဒီတဒၢန့ၢ်ပှၤတၢ်လၢအတမံခ့နီတဘျီ (:၃-၇) ဘၣ်တဂၤန့ၣ်လီၤ. လၢတၢ်န့ၣ်အဃိ, ပတၢ်အိၣ်မူ အတၢ်လဲၤကျဲ မ့ၢ်တလိၤတဘျၢ, မ့ၢ်ကစဲၤခံ, (မ့) တၢ်ခွဲးတၢ်ယာ်တဖၣ် မ့ၢ်ကလီၤမၢ်အဂီၢ်ဒၣ်လဲာ်, တၢ်ဘၣ်ယိၣ်အလီၢ်တအိၣ်ဘၣ်န့ၣ်လီၤ. အဂ့ၢ်ဒ်အံၤ, “နဟးထီၣ်တၢ်, ဒီးနဟဲက့ၤတၢ်န့ၣ် တုၤအံၤဆူညါ ယွၤ ကအံးက့ၤကကွၢ်က့ၤဝဲလီၤထူလီၤယိာ်” (:၈) န့ၣ်လီၤ.

လၢတၢ်ကိၢ်ဂီၤနးဖှီၣ်အကတီၢ်တဖၣ်, တၢ်အိၣ်ပှဲၤလုၢ်ကွံာ်ဂီၢ်မုၢ်ဂီၢ်ပၤအကတီၢ်တဖၣ်, ဒီးလၢပတၢ်အိၣ်မူအပူၤ တၢ်တအိၣ်လီၤလီၤဆီဆီနီတမံၤအကတီၢ်တဖၣ်န့ၣ်, လၢပဂီၢ်, ကစၢ်ယွၤ အတၢ်ရဲၣ်ကျဲၤအဂ့ၤကတၢၢ်, ဒီးအနးကတၢၢ်အဘၢၣ်စၢၤန့ၣ် ကစၢ်ယွၤ အိၣ်ခိး ကွၢ်ပှၤထီဘိန့ၣ်လီၤ. ဒ်သိးပကမုာ်လၤသးခုဘၣ်အဂီၢ်, ကယဲၢ်တၢ်တမံၤလၢ်လၢ်လၢ ကစၢ်ယွၤ တိာ်ကျဲၤပာ်န့ၢ်ပှၤတဖၣ်န့ၣ် တလဲၤပူၤကွံာ်ပှၤဘၣ်န့ၣ်လီၤ.