လ့လယၢၣ် ခိလိၣ် (Lillian Colon) တဂၤ, ဘၣ်တၢ်လုၢ်ဒိၣ်ထီၣ်အီၤလၢ ဖိၣ်ဃဲကၠိတဖျၢၣ်, ဒီးဒ်သိးကနုာ်လီၤဘၣ်ဝဲဆူ ပှၤဂဲၤကလံၣ်တဖု, လၢအမံၤဟူသၣ်ဖျါလၢဟီၣ်ခိၣ်ဒီဘ့ၣ်တဖုအဂီၢ်, မၤနၢၤဝဲဒၣ် ပှၤဂဲၤကလံၣ်တၢ်ဖိအဂၤ လွံၢ်ကယၤန့ၣ်လီၤ.အဝဲဂဲၤကလံၣ်မၤသကိးတၢ်ဒီးတၢ်ဂဲၤကလံၣ်တၢ်တဖုအံၤ, လၢအအိၣ်ဒီးတၢ်ဂဲၤဒိမၤလိတၢ်လၢအဃံး, တၢ်သ့ဂဲၤကလံၣ်လၢ အဘၣ်လိာ်ဖိးဒ့, ဘၣ်ဆၢဘၣ်ကတီၢ်, တုၤအသးအနံၣ်အလါ လွံၢ်ဆံဘျဲၣ်တစုန့ၣ်လီၤ. ခဲကနံၣ်အံၤ, အသးပှၢ်တ့ၢ်လံ နွံဆံ နံၣ်ဒၣ်လဲာ်, သိၣ်လိနဲၣ်လိ ပှၤမၤလိတၢ်ဖိတဖၣ်, တၢ်လၢအမၤလိန့ၢ်ဝဲဒၣ် တၢ်ဂဲၤကလံၣ် အကျိၤကျဲအဒိၣ်အထီကတၢၢ်မံၤ, လၢအမ့ၢ် “တၢ်ဖံးသကိးမၤသကိးတၢ်” န့ၣ်လီၤ. အဝဲပာ်ဖျါဝဲဒၣ်“လၢပျဲၢ်စီၢ်ခိၣ်လိၤမ့ၢ်ဂ့ၤ, လၢတၢ်ချၢမ့ၢ်ဂ့ၤ, ပတၢ်အိၣ်မူတဖၣ် ဘံပကံးဘၣ်ထွဲလိာ်အသး,ဒီးပဝဲတဂၤဒီးတဂၤ ပမ့ၢ်မၤစၢၤဆီၣ်ထွဲလိာ်သး, ဒီးကွၢ်ထွဲကဟုကယာ်လိာ်သးန့ၣ်ဒီး,ပတၢ်ဖံးသကိးမၤသကိးတၢ်တဖၣ် ကလဲၤထီၣ်လဲၤထီဝဲဒၣ်” န့ၣ်လီၤ.
တၢ်သိၣ်တၢ်ဘျၢအံၤ အကါဒိၣ်ဝဲဒၣ်အဂ့ၢ်န့ၣ် ပှၤတၢ်မၢဖိ စီၤပီလူး သ့ၣ်ညါဝဲဒၣ်န့ၣ်လီၤ. တၢ်အိၣ်ဃူအိၣ်ဖိးလိာ်သးဒီးကစၢ်ခရံာ်န့ၣ် ဒုးနဲၣ်ဝဲဒၣ် တၢ်စံးထီၣ်ပတြၢၤယွၤ အတၢ်ပညိၣ်အမ့ၢ်အတီ, တၢ်မၤလၤကပီၤ ကစၢ်ယွၤန့ၣ်လီၤ. လၢတၢ်သိၣ်လိနဲၣ်လိပှၤစူၢ်က့ၤနာ်က့ၤတၢ်တဖၣ် လၢ ဝ့ၢ် ရိမ့ၤအပူၤ, ပှၤယူဒၤဖိမ့ၢ်ဂ့ၤ, ပှၤတခီဘီမုၢ်ဖိမ့ၢ်ဂ့ၤ,ဒ်သိးကဟ့ၣ်ဂံၢ်ဟ့ၣ်ဘါ အဝဲသ့ၣ်အတၢ်ဃူတၢ်ဖိးအဂီၢ်, စီၤပီလူး ကွဲးပာ်ဖျါဝဲဒၣ်လၢ“ဒီးတၢ်ဝံသးစူၤ, ဒီးတၢ်မၤမုာ်အကစၢ် မ်အဟ့ၣ်သုသးဆိကမိၣ်တၢ်တမံၤဃီသကိးသကိး, ဒ်ယ့ၣ်ရှူးခရံာ်အသိး, ဒ်သိးသုကမၤလၤမၤကပီၤယွၤ ပကစၢ်ယ့ၣ်ရှူးခရံာ်အပၢ်, လၢသုသးတဖျၢၣ်ဃီ, ဒီးလၢသုထးခိၣ်တပူၤဃီန့ၣ်တက့ၢ်” (ရိမ့ၤ ၁၅:၅-၆) န့ၣ်လီၤ.
တၢ်ကလုၢ် လၢအသီၣ်အကလုာ်ကလုာ်န့ၣ် တဟ့ၣ်ထီၣ်တၢ်အစၢဒ်သိးအံၤဘၣ်. ပှၤတဂၤ, (မ့) ပှၤတဖု တစံးကတိၤအၢသီလိာ်သး, ဒီးပာ်ဖှိၣ်ထီၣ်အသး, အိၣ်ဃူအိၣ်ဖိးလိာ်သးလၢ ကစၢ်ခရံာ်အပူၤ, ဒ်သိးကစံးထီၣ်ပတြၢၤယွၤန့ၣ် မ့ၢ်အတၢ်ပညိၣ်အမ့ၢ်အတီန့ၣ်လီၤ. စီၤပီလူး ကွဲးပာ်ဖျါဝဲလၢ “တူၢ်လိာ်လိာ်သုသး ဒ်ခရံာ်တူၢ်လိာ်သုလၢ ယွၤအလၤကပီၤအဂီၢ်အသိးန့ၣ်တက့ၢ်” (:၇). ပကမၤတၢ်ဒ်သိးအံၤအဂီၢ်, ဖဲပဃုထံၣ်န့ၢ် ကစၢ်ယွၤအတၢ်မၤစၢၤန့ၣ်ဒီး, အဝဲကထိၣ်ဟူးထိၣ်ဂဲၤထီၣ်ဝဲဒၣ် ပကလုၢ်လၢအသီၣ်တဖၣ်န့ၣ် ဒ်သိးပကပာ်ဖှိၣ်ထီၣ်တပူၤဃီ, လၢတၢ်မၤလၤကပီၤယွၤအဂီၢ်န့ၣ်လီၤ.