ခံၣ်ရံၣ်ဘၤတံး(စ), စွ့အထံကီၢ်တဘ့ၣ်န့ၣ် အိၣ်ဝဲဖဲ ပစံးဖ့း ပီၣ်လဲၣ်မိၢ်ပှၢ် (Pacific Ocean), ဒီးမ့ၢ်ဝဲဒၣ် ထံကီၢ်ထဲတဘ့ၣ်ဧိၤလၢဟီၣ်ခိၣ်အံၤ, လၢအအိၣ်ဖဲဟီၣ်ခိၣ်ဖျၢၣ် အဟီၣ်ခီလွံၢ်က့လိာ်အလိၤန့ၣ်လီၤ. ကီၢ် ခံၣ်ရံၣ်ဘၤတံး(စ) အစွ့သၢဆံသၢဖျၢၣ်တဖၣ် အိၣ်ဆိးဝဲဒၣ်လၢ အံၣ်ကွ့ၣ်တၣ်, ဒီးမၣ်ရံၣ်ဒံၣ်ယဲ(န) မုၢ်ထူၣ်ပနိ ၁၈၀ ဒံၣ်ကရံၣ် (the 180th meridian), မုၢ်ထီၣ်ဟီၣ်ကဝီၤပာ်ဃုာ်ဒီးမုၢ်နုာ်ဟီၣ်ကဝီၤ န့ၣ်လီၤ. လၢဟီၣ်ခိၣ်ဖျၢၣ်အံၤ မ့ၢ်စ့ၢ်ကီးထံကီၢ် အယံၤကတၢၢ်အကျါတဘ့ၣ်န့ၣ်လီၤ.

ပမၤကစၢ်ယွၤလၢ အကွၢ်ထွဲကဟုကယာ် တၢ်လီၢ်တၢ်ကျဲအယံၤကတၢၢ်တဖၣ်တဂၤအတၢ်မၤန့ၣ်လီၤ. ကစၢ်ယ့ၣ်ရှူး ကဘၣ်က့ၤကဒါက့ၤဆူ မူခိၣ်ဘီမုၢ်အဂီၢ်န့ၣ် ဒ်တၢ်ကတဲာ်ကတီၤန့ၢ်ဝဲ အပျဲၢ်အဘီၣ်တဖၣ်အသိး, စံးဘၣ်တဲဘၣ်အဝဲသ့ၣ်လၢ, “ဖဲသးစီဆှံဟဲလီၤလၢ သုလိၤဝံၤဒီး, သုကဒိးန့ၢ်တၢ်အစိအကမီၤ, ဒီးသုကကဲထီၣ် ယပှၤအုၣ်အသးတဖၣ်, လၢယရူၤရှလ့ၣ်ဒီး ကီၢ်ယူဒၤဒီကီၢ်ညါ, ဒီးရှၤမရံ, ဒီးပၢၢ်လၢဟီၣ်ခိၣ်အကတၢၢ်” (မၤတၢ် ၁:၈) န့ၣ်လီၤ. “ပၢၢ်လၢ ဟီၣ်ခိၣ်အကတၢၢ်” စံးတၢ်န့ၣ် မ့ၢ်တၢ်ကိးတမံၤလၢ တၢ်ကဘၣ်စိာ်ဆှၢတၢ်သးခုအကစီၣ်ဆူ ဟီၣ်ခိၣ်ချၢတၢ်လီၢ်တၢ်ကျဲအယံၤကတၢၢ်န့ၣ်လီၤ. ဘၣ်ဆၣ်, တၢ်ကိးအံၤ တၢ်တပာ်ပနီၣ်အီၤ တၢ်အဆၢထဲတၢ်လီၢ်အယံၤတဖၣ်ဧိၤဘၣ်. ပာ်ဃုာ်ဒီးအဝဲသ့ၣ်စိၤဆၢကတီၢ် အတၢ်လီၢ်တၢ်ကျဲတဖၣ် လၢအမ့ၢ်, ယရူၤရှလ့ၣ်, ဒီးအကပိာ်ကပၤ ကီၢ်ယူၤဒၤ, ဒီးရှၤမရံတဖၣ်စ့ၢ်ကီးန့ၣ်လီၤ.

ဖဲကစၢ်ယ့ၣ်ရှူး စံးကတိၤ တၢ်ဟးဖးလိာ်သး အတၢ်ကတိၤဆူ အပျဲၢ်အဘီၣ်တဖၣ်ဝံၤ,“တၢ်ဟံးထီၣ်န့ၢ်အီၤ, ဒီးတၢ်အၢၣ်ဒိးန့ၢ်အီၤလၢ အဝဲသ့ၣ်အမဲာ်ညါ” (:၉) န့ၣ်လီၤ. မူခိၣ်ကလူးခံဂၤ လီၣ်ဖျါထီၣ်အသး, ဒီးစံးဝဲဒၣ် “ယ့ၣ်ရှူးအကစၢ်ဒၣ်ဝဲလၢ တၢ်စိာ်ထီၣ်ကွံာ်အီၤလၢသုအိၣ်ဆူ မူခိၣ်န့ၣ်, ကဟဲလီၤက့ၤ ဒ်သုထံၣ်အက့ၤထီၣ်ဆူ မူခိၣ်အသိး” (:၁၁) န့ၣ်လီၤ.

တၢ်သးခုကစီၣ်, ကစၢ်ယ့ၣ်ရှူးခရံာ်အဂ့ၢ်န့ၣ် မ့ၢ်ဝဲတၢ်ကစီၣ်အကါဒိၣ်ကတၢၢ်, လၢပှၤတဂၤလၢ်လၢ် ကနၢ်ဟူဘၣ်ဝဲဒၣ်န့ၣ်လီၤ. ဒ်ပမ့ၢ်ကစၢ်ယ့ၣ်ရှူး အပှၤခၢၣ်စးတဖၣ်အသိး, တၢ်တၤလၢ ပဝဲနၤယၤအဂီၢ်န့ၣ် မ့ၢ်ဒၣ် ပကဘၣ်ဟ့ၣ်ခီရၤလီၤ တၢ်သးခုကစီၣ်န့ၣ်လီၤ. ခီဖျိလၢသးစီဆှံကစၢ်အတၢ်မၤစၢၤအပူၤန့ၣ် ပထံၣ်န့ၢ်သ့ဝဲဒၣ်လၢ ကယဲၢ်ပှၤကိးဂၤဒဲး, အိၣ်လၢလီၢ်ဘူး, ဒီးလီၢ်ယံၤခဲလၢာ်တဖၣ် ကဒိးန့ၢ်ခွဲးယာ်လၢ ကနၢ်ဟူဘၣ်ကစၢ်ခရံာ်အတၢ်သးခုကစီၣ်န့ၣ်လီၤ.