မး(ခ) (Mark), မ့ၢ် ပှၤဃ့ၢ်မၣ်ရသိၣ်, ဒီးတၢ်အိၣ်ဖှိၣ်သရၣ်တဂၤ, လၢအကွၢ်ထွဲဝဲဒၣ်တၢ်အိၣ်ဖှိၣ် ခံဖှိၣ်လၢ သၢဆံယဲၢ် နံၣ်အတီၢ်ပူၤ, ဒီးအိၣ်ဘှံးဝဲဒၣ်လၢ အတၢ်မၤန့ၣ် တယံာ်ဒံးဘၣ်န့ၣ်လီၤ. ပှၤဟ့ၣ်အီၤ တၢ်ဟ့ၣ်ဖိန့ၣ် မ့ၢ်ဝဲဒၣ်ထဲ တၢ်ဃ့ၢ်အခီၣ်ဖံးဖိ တစူၣ်န့ၣ်လီၤ. လၢအပူၤကွံာ် အနံၣ်ခံဆံန့ၣ် ယဃ့ၢ်ဃုာ်ဒီးမး(ခ) တဘျီဘၣ်ဆၣ်, လၢအသးသမူဒီစိၤန့ၣ် မး(ခ) ဃ့ၢ်ဝဲဒၣ် မံးလာ် ၂၆.၂ အတၢ်ဃ့ၢ်ပြၢတဖၣ်လၢ ထံလီၢ်ကီၢ်ပူၤ, လၢဝ့ၢ်အါဖျၢၣ်န့ၣ်လီၤ. ဖဲပှၤမၤ မး(ခ) အတၢ်အိၣ်ဘှံးက့ၤ အမူးအရၤအကတီၢ်, ပှၤအိၣ်ဆိးလၢ လီၢ်ကဝီၤပူၤတဖၣ်, ဒီးတၢ်အိၣ်ဖှိၣ်လၢ အကွၢ်ထွဲတ့ၢ်ဝဲတဖၣ် ဟဲပာ်ဖျါထီၣ် အတၢ်စံးဘျုးမၤလၤကပီၤ မး(ခ) အတၢ်အိၣ်တီအိၣ်လိၤဒီး ကစၢ်ယွၤအတၢ်ဖံးတၢ်မၤန့ၣ်လီၤ. မ့ၢ်လၢယွၤအစိကမီၤ, ဒီးအဘျုးအဖှိၣ်အဃိ, မး(ခ) မၤဝံၤဝဲဒၣ်ဂ့ၤဂ့ၤဘၣ်ဘၣ်န့ၣ်လီၤ.
သးသမူအတၢ်အိၣ်မူအိၣ်ဂဲၤစံးတၢ်န့ၣ် လၢတၢ်ဃ့ၢ်သဖှိချ့ချ့, တၢ်ဃ့ၢ်အဖုၣ် အလီၢ်န့ၣ်လီၤဂာ်အါဒိၣ်ဝဲလၢ တၢ်ဃ့ၢ်မၣ်ရသိၣ်န့ၣ်လီၤ. ပကဘၣ်လဲၤခီဖျိကွၢ်ဆၢၣ် နီၢ်ခိနီၢ်သးအတၢ်လီၤဘှံးလီၤတီၤ, ဒီးပအဲၣ်ဒိးပျၢ်စုပျၢ်ခီၣ်အကတီၢ်တဖၣ် ကအိၣ်ဝဲဒၣ်န့ၣ်လီၤ. ဘၣ်ဆၣ်, ပှၤလၢအနာ်သန့ၤ ကစၢ်ယွၤတဖၣ်အဂီၢ်, ယွၤအဘျုးအဖှိၣ်, ဒီး အဂံၢ်အဘါန့ၣ် အကတၢၢ်တအိၣ်ဝဲဒၣ်ဘၣ်.ပှၤတၢ်မၢဖိ စီၤပီလူး ဖဲအဘၣ်တၢ်စၢဃာ်အီၤလၢဃိာ်ပူၤ, ဒီးဘူးထီၣ်လၢအသးသမူ ကကတၢၢ်ဝဲအကတီၢ် (၂ တံၤ ၄:၆), ဟ့ၣ်ဂံၢ်ဟ့ၣ်ဘါ စီၤတံၤမသ့း, ပှၤသးစၢ်လၢ အသိၣ်လိနဲၣ်ယူၤဝဲတဂၤ, ဒီးစံးဝဲဒၣ်လၢ “တၢ်ဒုးလၢ အဂ့ၤန့ၣ်, ယဒုးလံ, တၢ်ဃ့ၢ်န့ၣ် ယဃ့ၢ်လံ, ယပၢၤဃာ် တၢ်နာ်န့ၢ်လံ” (:၇) န့ၣ်လီၤ. သးသမူအတၢ်အိၣ်မူအိၣ်ဂဲၤ အကျဲဖိတဖၣ်န့ၣ် ကဆှၢပှၤဆူတၢ်လီၢ် အကလုာ်ကလုာ်န့ၣ်လီၤ. ဘၣ်ဆၣ်, သးသမူအတၢ်အိၣ်မူအိၣ်ဂဲၤ အတၢ်လဲၤန့ၣ် ပကအိၣ်ဒၣ်ဝဲ ဖဲတၢ်လီၢ်တပူၤဂ့ၤတပူၤဂ့ၤ, ထီဘိန့ၣ် ဂ့ၤဝဲဒၣ်လၢ ပကသ့ၣ်နီၣ်ထီၣ် တၢ်တူၢ်န့ၢ်ခီၣ်န့ၢ်တၢ် လၢအိၣ်ပှဲၤဒီးတၢ်စူၢ်တၢ်နာ်န့ၣ် မ့ၢ်တၢ်အကါဒိၣ်ကတကၢ်, ဒီး မ့ၢ်တၢ်လၤကပီၤအခိၣ်ဖး (:၈), ဒီးကစၢ်ယွၤ မ့ၢ်ပှၤလၢ ကဒုးဆူၣ်ထီၣ်ပဂံၢ်ပဘါ,(:၁၇), ဒီးခီဖျိလၢအဘျုးအဖှိၣ်အပူၤန့ၣ်, ကစၢ်ယွၤ ကထုးထီၣ်န့ၢ်ပှၤ လၢကယဲၢ်တၢ်မၤလၢအအၢ, ဒီးကအုၢ်က့ၤခီၣ်က့ၤပှၤဆူ အဘီအမုၢ်လၢမူခိၣ်” (:၁၈) န့ၣ်လီၤ.