ဖဲ ထီမၢး(စ) (Tomas) ဒိးန့ၢ် တၢ်ဆၢကတီၢ်လုၢ်ဒိၣ်ပှ့ၤဒိၣ် လၢအစံးကတိၤဘၣ်တၢ်ဒီး ပှၤသးပှၢ် ဟ့ၣ်ကူၣ်ဟ့ၣ်ဖးတၢ်တဂၤ, ဒီးပှၤသးပှၢ်တဂၤအံၤ ညီနုၢ်ဒိကနၣ်ဝဲ အတၢ်ဂ့ၢ်ကီ တဖၣ်အဃိ, အဝဲပာ်ဖျါဝဲဒၣ်လၢ “ပှၤသးပှၢ်တဂၤအံၤ မ့ၢ်ယဟီလိ ဝ့လိၣ်” (hollow willow) န့ၣ်လီၤ. မ့ၢ်လၢယတနၢ်ပၢၢ်အဃိ, ယကွၢ်အီၤန့ၣ်ဒီး, ထီမၢး(စ) တဲနၢ်ပၢၢ်ယၤလၢ တၢ်ကတိၤ ဟီလိ ဝ့လိၣ် မ့ၢ် ပှၤစလိၣ်ဘဲးဖိ (Slovak) အတၢ်ကတိၤ, ဒီးအခီပညီမ့ၢ် ပှၤလၢအဟံးဃာ်ပၢၤဃာ် နတၢ်ဂ့ၢ်ခူသူၣ်တဖၣ်န့ၣ်လီၤ. တၢ်ဂ့ၢ်မိၢ်ပှၢ်န့ၣ်, ပှၤတဂၤအံၤ လီၤဂာ်ဒီးသ့ၣ်ပံၢ်သလီအမုၢ်, လၢအပၢၤဃာ် တၢ်ကစီၣ်ခူသူၣ်ဘံၣ်ဘံၣ်ဘၢဘၢ လၢအထူၣ်မိၢ်ပှၢ်အပူၤန့ၣ်လီၤ.

ပမ့ၢ်အိၣ်ဒီးပှၤတဂၤဂၤ, လၢပနာ်အီၤန့ၢ်သ့, ဒီးတဲတၢ်ခူသူၣ်အီၤလၢ ပတၢ်ပျံၤတၢ်ဖုး, ဒီးပသးဆၢမိၣ်န့ၢ်တၢ်ဖးဒိၣ်တဖၣ် သ့ဝဲအဃိ, ပှၤတဂၤအံၤ မ့ၢ်တၢ်လုၢ်ဒိၣ်ပှ့ၤဒိၣ်တမံၤ န့ၣ်လီၤ. လၢလံာ်တၢ်ကတိၤဒိအပူၤ, တၢ်ပာ်ဖျါလီၤဆီ လၢအမ့ၢ် တၢ်စံးတၢ်ကတိၤတဖၣ် အဂံၢ်သဟီၣ်န့ၣ်, ကမ့ၢ်သ့ၣ်သ့ၣ်, စီၤပၤရှလိၤမိၤ စံးကတိၤဝဲလၢ အနီၢ်ကစၢ် အတၢ်လဲၤခီဖျိ, ဖဲအစံးထီၣ်ပတြၢၤ ပှၤလၢအပာ်ဖျါထီၣ် တၢ်ပလီၢ်သူၣ်ပလီၢ်သးတဂၤစုာ်စုာ် (မ့) မ့ၢ်လၢ “ပၢၤဃာ်အပျ့ၤန့ၢ်” အဃိ (ကတိၤ ၁၁:၁၂) န့ၣ်လီၤ.အဝဲထိၣ်သတြီၤစ့ၢ်ကီးပှၤအိၣ်ဝဲဒၣ် ခံကလုာ်အဂ့ၢ်, “ပှၤလၢအကတိၤခဲၣ်တၢ်န့ၣ်လီၣ်ဖျါထီၣ် တၢ်ခူသူၣ်လီၤ. မ့မ့ၢ် ပှၤလၢအသးတီန့ၣ် ပာ်တဒၢတၢ်” (:၁၃) န့ၣ်လီၤ. လၢပှၤတဂၤဂၤ အတၢ်ဘံၣ်တၢ်ဘၢအဂီၢ်, ပမ့ၢ်သးအိၣ်နီၢ်နီၢ်န့ၣ် ပတကြၢးအိၣ်ဃိကလာ်ဘၣ်ဒၣ်လဲာ်, ဒ်သိးပကပာ်သူၣ်ပာ်သး ပှၤဂၤအတၢ်ဂ့ၢ်ခူသူၣ်, ဒီးပကဟံးဃာ်ပၢၤဃာ် ပနီၢ်ကစၢ် အတၢ်ကတိၤတဖၣ်အဂီၢ်န့ၣ် တၢ်ထိၣ်သတြီၤအံၤ မ့ၢ်တၢ်ဟ့ၣ်ပလီၢ်လၢအကဲထီၣ် တၢ်မၤစၢၤတမံၤန့ၣ်လီၤ.

ပဟီၣ်ခိၣ်ဖျၢၣ်လၢ ဒံၣ်ကၠ့းတၢၣ် (digital) အတၢ်လဲၤထီၣ်လဲၤထီအကတီၢ်, ပရၤလီၤ တၢ်ကစီၣ်န့ၢ်ဝဲ ချ့သဒံးအလီၢ်အံၤ, တၢ်လ့ပစီကလီၤဘၣ်ပှၤ, ဒ်သိးပကနီၤဟ့ၣ်ဟံးန့ၢ် သကိးတၢ်ဂ့ၢ်ခဲလၢာ်လီၤတံၢ်လီၤဆဲး, လၢကဒုးအိၣ်ထီၣ် တၢ်စံးဆၢမၤဆၢကဒါက့ၤတၢ် သ့ဝဲန့ၣ်လီၤ. ဘၣ်ဆၣ်, တၢ်ကတိၤသီၣ်ဝံသဲကလၤန့ၣ် တမ့ၢ်ထဲ အမၤဘၣ်ဒိဆါ ပှၤတဂၤစုာ်စုာ်, လၢအနာ်န့ၢ်နၤ, ဒီးဒုးသ့ၣ်ညါနၤလၢ အတၢ်ဂ့ၢ်ခူသူၣ်န့ၣ်ဘၣ်. ဖဲတၢ်နာ်န့ၢ်လီၤသးတဖၣ် မ့ၢ်တအိၣ်လၢၤဘၣ်န့ၣ်ဒီး, ကမၤဟးဂီၤ တၢ်ရ့လိာ်ဘၣ်ထွဲသးတဖၣ် ဒိၣ်ဒိၣ်ကလဲာ်န့ၣ်လီၤ. ဒ်သိးပကမ့ၢ် ပှၤသ့ၣ်တဖၣ်လၢ “ဟံးဃာ်ပၢၤဃာ် ပှၤဂၤအတၢ်ဂ့ၢ်ခူသူၣ်,” ပှၤလၢအိၣ်မူအိၣ်ဂဲၤတီတီလိၤလိၤ, လၢပှၤနာ်န့ၢ်အီၤသ့တဂၤန့ၣ် ပဝဲနၤယၤကိးဒံကိးဂၤဒဲး, ပဆၢမုၢ်လၢ်ကဲထီၣ်သ့ဝဲဒၣ်န့ၣ်လီၤ.