အဲ(န)နၣ် (Anna), ဒီးအဝၤ,ဃုာ်ဒီးအဖိခံဂၤန့ၣ် အိၣ်ဆိးဝဲလၢ ကီၢ်အၤကၠၢၢ်ထံနၤ (Argentina) န့ၣ်လီၤ. အဝဲသ့ၣ် အိၣ်ဒၣ်အကစၢ်ဒၣ်ဝဲ, ဒီးစံးကတိၤ စပ့ၣ်(န) အကျိာ် (Spanish) တၢ်ကတိၤသ့ဝဲဒၣ် ဂ့ၤဂ့ၤဘၣ်ဘၣ်ဘၣ်ဆၣ်, အဝဲသ့ၣ်တမ့ၢ်ဝဲ အၤကၠၢၢ်ထံနၤ အထံဖိကီၢ်ဖိဘၣ်. အဝဲသ့ၣ် မ့ၢ်ပှၤအိၣ်ဟဲလၢထံကီၢ်အဂၤတဘ့ၣ်, ဒီးလဲၤနုာ်လီၤအိၣ်ဆိးလၢ ထံကီၢ်အပူၤ, ဒ်သိးကလဲၤကွၢ်ဟုၣ်ကွၢ်စုးတၢ်အဂီၢ် (Sleeper agents)န့ၣ်လီၤ. အဝဲသ့ၣ် အိၣ်ဆိးဃါဃုာ်လိာ်အသးဒီး အၤကၠၢၢ်ထံနၤ အထံကီၢ် အတၢ်ဆဲးတၢ်လၤသ့ဝဲဂ့ၤဒိၣ်မးန့ၣ်လီၤ. ဘၣ်ဆၣ်, ပှၤဘၣ်မူဘၣ်ဒါတဖၣ် ပာ်သူၣ်ပာ်သးဝဲလၢ အဝဲသ့ၣ်ထံဖိကီၢ်ဖိအလံာ်ကွဲးနီၣ်ပာ်ဖှိၣ်အပူၤ, တၢ်ဆီတလဲတမံၤန့ၣ် ဖျါလၢတပူၤဒီးတၢ်ဘျၢသဲစးအဃိ, အကတၢၢ်န့ၣ် နီၢ်ဒီမါဝၤခံဂၤအံၤ ဘၣ်တၢ်ဖီၣ်အီၤန့ၣ်လီၤ. ဖဲအဝဲသ့ၣ်အဟံၣ်ဖိဃီဖိတဖၣ် ဘၣ်တၢ်ဆှၢက့ၤဆူ အထံကီၢ်နီၢ်နီၢ်, လၢကဘီယူၤန့ၣ်ဒီး, အဲ(န)နၣ် ကွၢ်ဝဲ အဖိမုၣ်လၢ အသးအိၣ် (၁၁) နံၣ်တဂၤ, ဒီးဆိကမိၣ်ဝဲဒၣ်လၢ အဝဲသ့ၣ်တမ့ၢ်ဝဲဒၣ် ပှၤသ့ၣ်တဖၣ်, ဒ်အဖိမုၣ် ဆိကမိၣ် တ့ၢ်ဝဲအသိးဘၣ်န့ၣ် မ့ၢ်အကဘၣ် စံးဘၣ်တဲဘၣ်အဖိမုၣ်ဒ်လဲၣ်န့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်န့ၣ် မ့ၢ်ဝဲဒၣ် ပှၤထံဖိကီၢ်ဖိလၢ အကါဒိၣ်တဖၣ်န့ၣ်လီၤ. အဂ့ၢ်ဒ်အံၤ, “ပတၢ်ဝ့ၢ်ဖိအလီၢ် ဘၣ်ဃးဒီးမူခိၣ်” (ဖံ ၃:၂၀) အဃိ, ပမ့ၢ် ပှၤအခၢၣ်စးတဖၣ်လၢ အဘၣ်ဃးဒီးစီၤပၤအဒိၣ်အထီကတၢၢ်တဂၤန့ၣ်လီၤ. ဖံလံးပံၤ အပှၤဝ့ၢ်ဖိတဖၣ် ပာ်ကဖၢလၢအသး, ဒ်အမ့ၢ် ရိမ့ၤအထံဖိကီၢ်ဖိတဖၣ်အဃိ, ဒီးမ့ၢ်လၢအဝဲသ့ၣ် အိၣ်ဆိးလၢ ဝ့ၢ်ဖံလံးပံၤအဃိ, အဝဲသ့ၣ် မၤဝဲဒၣ် ရိမ့ၤအတၢ်လၢတၢ်သးတီအပူၤန့ၣ်လီၤ. စီၤပီလူး စံးဝဲဒၣ် အဝဲသ့ၣ် အတၢ်သးတီဒၣ်လဲာ်န့ၣ် ကဘၣ်ယူာ်ထီထီၣ်ဝဲဒၣ်န့ၣ်လီၤ. အဝဲသ့ၣ် အတၢ်သးတီအထီကတၢၢ်န့ၣ် ကဘၣ်မ့ၢ် ကစၢ်ယ့ၣ်ရှူး, ပှၤလၢ အပၢဆှၢ ဝ့ၢ်ရိမ့ၤ, ဒီးဝ့ၢ်ဖံလံးပံၤ, အိၣ်ဆိးဝဲလၢ မူခိၣ်တဂၤန့ၣ်လီၤ.
ဒ် အဲ(န)နၣ်ဒီးအဝၤအသိး, ပတမၤခူသူၣ်ထီဒါ “ထံကီၢ်လၢပအိၣ်ဆိး” န့ၣ်ဘၣ်. ပမၤတၢ်ဖျိဖျိဖျါဖျါ လၢပထံကီၢ်အတၢ်ဂ့ၤအဂီၢ်န့ၣ်လီၤ. ပတၢ်သးတီဒီးကစၢ်ယ့ၣ်ရှူးန့ၣ် ထိၣ်ဂဲၤပှၤ ဒ်သိးပကမၤတၢ်လၢ ပှၤအိၣ်လၢပခိၣ်ပဃၢၤတဖၣ်အဂီၢ်, ဒီးဃ့ထုကဖၣ်တၢ်လၢ “ကယဲၢ် ပှၤအိၣ်လၢပဒိၣ်အလီၢ်အဂီၢ်, ဒ်သိးပကအိၣ်ဂၢၢ်အိၣ်ဘှီၣ်, ဒီးအိၣ်ဃူအိၣ်ဖိးလၢကယဲၢ် တၢ်ယူးယီၣ်ယွၤ” (၁ တံၤ ၂:၂) န့ၣ်လီၤ. ပကဘၣ်ဃုပ “ဝ့ၢ်န့ၣ်အတၢ်ဃူတၢ်ဖိး, ဒီးအတၢ်ဂုၤထီၣ်ပသီထီၣ်” အဂီၢ်, ခီဖျိလၢယွၤအတၢ်မၤစၢၤန့ၣ်လီၤ. “ဘါထုကဖၣ်န့ၢ်ယွၤလၢအဂီၢ်တက့ၢ်. အဂ့ၢ်ဒ်အံၤ, လၢအဝဲန့ၣ် အတၢ်ဃူတၢ်ဖိးအပူၤန့ၣ် သုကန့ၢ်တၢ်ဃူတၢ်ဖိး” (ယံး ၂၉:၇) န့ၣ်လီၤ.
