ဟၢးစၢၣ် ထ့လၢၣ် (Hudson Taylor) တဂၤ ဘၣ်ကိၢ်ဘၣ်ဂီၤဝဲဒၣ်န့ၣ်လီၤ. ဒ်သိးကဟ့ၣ်ခီဟ့ၣ်နီၤ ခရံာ်အတၢ်သးခုကစီၣ် လၢတရူးကီၢ်အဂီၢ်, အဝဲဟးထီၣ်လၢ ကီၢ်အဲကလံးန့ၣ်ဒီး, တၢ်တၤတဖၣ် အိၣ်ဝဲဘၣ်ဆၣ်, အတၢ်ဖံးတၢ်မၤတဖၣ် လဲၤအသးဂ့ၤဂ့ၤဘၣ်ဘၣ်န့ၣ်လီၤ. ဖဲ ၁၈၆၅ နံၣ်န့ၣ် အဝဲဆိကမိၣ်ဝဲဒၣ်လၢ ကဆှၢအါထီၣ် ပှၤမၤကစၢ်ယွၤ အတၢ်မၤတဖၣ်ဆူ တၢ်လီၢ်တၢ်ကျဲ အိၣ်ပှဲၤဝဲဒီးတၢ်လီၤဘၣ်ယိာ်တဖၣ်, ဒီးတၢ်ဘံၣ်တၢ်ဘၢတအိၣ်ဘၣ်အဃိ, အသးကလၢၢ်ဘၣ်ဝဲ “တၢ်သးသဘံၣ်ဘုၣ်ဒိၣ်ဒိၣ်ကလဲာ်” န့ၣ်လီၤ. အဝဲဂုာ်ကျဲးစၢးဂဲၤလိာ်ဝဲ ဒီးကစၢ်ယွၤ, ခီဖျိလၢတၢ်ထုကဖၣ်ဝံၤ, ကွဲးပာ်ဖျါဝဲဒၣ်လၢ, “ကစၢ်ယွၤ မၤနၢၤတ့ၢ် ယတၢ်စူၢ်တၢ်နာ် လၢအလီၤတုာ်လီၤကာ်, ဒီးယသ့ၣ်ညါတူၢ်လိာ်ယဲလၢ မူဒါတဖၣ်, ဒီးတၢ်လၢပိာ်ထွဲထီၣ်အခံတဖၣ်န့ၣ် ဘၣ်ဃးဒီးကစၢ်ယွၤအဃိ, ယဟ့ၣ်လီၤယသးလၢကစၢ်ယွၤန့ၣ်လီၤ.”

စီၤမိၤၡ ဒိးန့ၢ်ဝဲ ကစၢ်ယွၤအတၢ်ကိး, ဒီးကကဲထီၣ် တၢ်ကိၢ်တၢ်ဂီၤလၢအဂီၢ်န့ၣ်လီၤ. ဖဲ စီၤမိၤရှ့ နဲၣ်ဆှၢဒုးဟးထီၣ် ပှၤအံၣ်စရ့လးဖိတဖၣ် လၢကီၢ်အဲၤကူပတူးန့ၣ်ဒီး, ကစၢ်ယွၤ ကတိၤတၢ်ဒီး စီၤမိၤရှ့, ဒီးစံးဝဲဒၣ် “စံးဘၣ်ပှၤအံၣ်စရ့လးဖိ ဒ်သိးအကဃၣ်အသး, ဒီးသူၣ်အဒဲလၢ ပံၤဟဃံရိးအမဲာ်ညါ, လၢမံးကဒိးလးဒီးပီၣ်လဲၣ်အဘၢၣ်စၢၤ, လၢဘဧၤလးစဖိၣ်အမဲာ်ညါန့ၣ်တက့ၢ်, သုဘၣ်သူၣ်ဒဲသဃီၤဒီးအီၤလၢပီၣ်လဲၣ်နံၤ (၂ မိၤ ၁၄:၂) န့ၣ်လီၤ. အခီပညီန့ၣ် ပှၤအံၣ်စရ့လးဖိတဖၣ် အိၣ်ထီကတာ်အသးလၢ ဖၤရိၤအသုးမုၢ်တဖၣ်, ဒီး ပီၣ်လဲၣ်အဘၢၣ်စၢၤန့ၣ်လီၤ. “ဒီးတုၤဖၤရိၤ ဟဲဘူးဒီး,” ပှၤအံၣ်စရလးဖိတဖၣ် ပျံၤတၢ်ဒိၣ်မး (:၁၀) န့ၣ်လီၤ. မ့ၢ်လၢ ပှၤဂီၢ်မုၢ်တဖၣ် ပျံၤတၢ်ဘၣ်ယိၣ်တၢ်ဒိၣ်မးအဃိ, စံးဘၣ် စီၤမိၤရှ့လၢ, “ပမၤပှၤအဲၤကူပတူးဖိအတၢ်န့ၣ် ဂ့ၤန့ၢ်ပသံလၢပှၢ်မုၢ်ကနၢအံၤတက့ၢ်” (:၁၂) န့ၣ်လီၤ. ဘၣ်ဆၣ်, စီၤမိၤၡ စံးဘၣ်ပှၤဂီၢ်မုၢ်လၢ, “ပျံၤတဂ့ၤ” (:၁၃) န့ၣ်လီၤ. ဒီးစီၤမိၤရှ့ အတၢ်ကတိၤန့ၣ် ဘၣ်ဝဲဒၣ်န့ၣ်လီၤ. မ့ၢ်လၢအဝဲသ့ၣ်သန့ၤအသးလၢ ကစၢ်ယွၤအဃိ, ကစၢ်ယွၤ ကတဲာ်ကတီၤန့ၢ်ဝဲဒၣ် တၢ်အုၣ်က့ၤခီၣ်က့ၤ, ဒီးတၢ်မၤနၢၤလၢအပှၤဂီၢ်မုၢ် (:၁၅-၃၁) အဂီၢ်န့ၣ်လီၤ.

မ့ၢ်လၢပတအိၣ်ဒီး ကစၢ်ယွၤအတၢ်ထံၣ်အဃိ, အကတီၢ်ကအိၣ်ဝဲဒၣ်လၢ, ကစၢ်ယွၤ မၤတၢ်လၢပသးသမူအပူၤန့ၣ် ပတသ့ၣ်ညါပတနၢ်ပၢၢ်ဘၣ်. ဖဲလၢအကတီၢ်ဖိဒ်သိးအံၤန့ၣ် ဟၢးစၢၣ် ထ့လၢၣ် ကွဲးပာ်ဖျါဝဲဒၣ်, “ဒ်ကစၢ်ယ့ၣ်ရှူး အခ့အပှၤတဂၤအသိး, ယမူဒါန့ၣ် မ့ၢ်ဝဲဒၣ် ယကဘၣ်ဒိကနၣ်အီၤ, ဒီးလူၤပိာ်အခံ” န့ၣ်လီၤ. ပဝဲနၤယၤစ့ၢ်ကီး, ပနာ်သန့ၤ ကစၢ်ယွၤ အတၢ်ထံၣ်, ဒီးအတၢ်တိာ်ကျဲၤတဖၣ်အပူၤ သ့ဝဲဒၣ်န့ၣ်လီၤ.