ဒ်သိးကကဲထီၣ် ပီၣ်ရီ လၢကီၢ်စဲၣ် ခဲလဖိနံယၤ (California) အဂီၢ်, မဲး(စ)စံၣ် ဖဲလၣ် (Maxcy Filer) တဂၤ, ကဘၣ်နုာ်လီၤဒိးစဲး, ဒီးဖျိထီၣ် ကီၢ်စဲၣ်ပဒိၣ် အတၢ်ဒိးစဲးအကီအခဲ ၃ သီန့ၣ်လီၤ. လၢတၢ်န့ၣ်အဃိ, တုၤလၢအဖျိထီၣ်ဝဲတစုန့ၣ် အဝဲနုာ်လီၤစံးဆၢတၢ်ဒိးစဲးန့ၣ် တမ့ၢ်ထဲတဘျီ, ခံဘျီဧိၤဘၣ်. အဝဲဘၣ်နုာ်လီၤတၢ်ဒိးစဲး ၄၈ ဘျီန့ၣ်လီၤ. အတၢ်ပညိၣ်န့ၣ် မ့ၢ်ဝဲဒၣ် ကမၤစၢၤပှၤလၢ အတဒိးန့ၢ်ခွဲးယာ်တဖၣ်, ပှၤအိၣ်ဆိးလၢဝ့ၢ် ကိၣ်(ပ)တၣ် (Compton), လၢအအဲၣ်ဘၣ်ဝဲအဂီၢ်န့ၣ်လီၤ. အတၢ်ကျဲးစၢးနုာ်လီၤတၢ်ဒိးစဲး အခီၣ်ထံးကတၢၢ်တဘျီ, ဒီးလၢခံအကတၢၢ်တဘျီအဘၢၣ်စၢၤ, ၂၅ နံၣ်အတီၢ်ပူၤန့ၣ် အဝဲသ့ၣ်နီၢ်ဒီမိၤဝၤခံဂၤ လုၢ်ဒိၣ်ထီၣ် အဖိနွံဂၤ, ဒီးအဖိတဖၣ်ခဲလၢာ်မၤလိဖျိထီၣ် ခီလ့ၣ်ကၠိန့ၣ်လီၤ. လၢအတၢ်ဖံးတၢ်မၤအဂီၢ်, ကဘၣ်မၤဝဲတၢ်အၢၣ်လီၤအီလီၤအကတီၢ်, စံၣ်ညီၣ်ကွီၢ်န့ၣ် စံးဝဲဒၣ်, “လၢမဲး(စ)စံၣ် ဖဲလၣ်အဂီၢ်, ယအဲၣ်ဒိး စံးကတိၤပာ်ဖျါထီၣ်ယဲ တၢ်ကတိၤသၢထံၣ်, လၢအမ့ၢ် တၢ်ပာ်လီၤသးစွံကတုၤ, တၢ်ပာ်လီၤသးစွံကတုၤ, တၢ်ပာ်လီၤသးစွံကတုၤ” န့ၣ်လီၤ.
မဲး(စ)စံၣ် ဖဲလၣ် အဂ့ၢ်န့ၣ် ဒုးသ့ၣ်နီၣ်ထီၣ်က့ၤယၤ, ပှၤပာ်လီၤသးစွံကတုၤတဖၣ်အဂ့ၢ်, လၢလံာ်စီဆှံအပူၤန့ၣ်လီၤ. ပှၤကွဲးလံာ်ဧ့ၤဘြံၤ ကွဲးပာ်ဖျါ ပှၤတနီၤအဂ့ၢ်, စီၤနိအၤ, “ကဲထီၣ် ပှၤန့ၢ်ဘၣ်သါ တၢ်တီတၢ်လိၤဘၣ်ဃးဒီးတၢ်နာ်” (ဧ့ၤ ၁၁:၇) န့ၣ်လီၤ. (မ့) စီၤအၤဘြၣ်ဟၣ်, စီၤအံၤစဲး, စီၤယၤကိာ် (:၈-၂၁), စီၤမိၤရှ့ (:၂၃-၂၈), ဒီးပှၤအဂုၤအဂၤတဖၣ်န့ၣ်လီၤ. တၢ်အဒိအတဲာ်သ့ၣ်တဖၣ်အံၤ ထိၣ်ဟူးထိၣ်ဂဲၤထီၣ်ပသးန့ၣ်လီၤ.
မ့ၢ်ဝံၤန့ၣ်ဒီး, ပှၤကွဲးလံာ်ဧ့ၤဘြံၤ ဟ့ၣ်ဂံၢ်ဟ့ၣ်ဘါ ပှၤစူၢ်က့ၤနာ်က့ၤ ကစၢ်ခရံာ်တဖၣ်လၢ, “မၤသးဒ်န့ၣ်ဒီး, ပှၤအုၣ်အသးဂီၢ်မုၢ်ပှဲၤန့ၣ် အိၣ်ဝးတရံးပှၤသတးဒီး, မ်ပဝဲဒၣ်စ့ၢ်ကီး ပာ်လီၤကွံာ်ကယဲၢ်တၢ်အဃၢတမံၤလၢ်လၢ်, ဒီးတၢ်ဒဲးဘးလၢပမၤအီၤညီ, ဒီးတၢ်ဃ့ၢ်သတြီၤအိၣ်လၢပမဲာ်ညါန့ၣ်, မ်ပဃ့ၢ်လၢတၢ်သးစူၤတက့ၢ် (ဧ့ၤ ၁၂:၁) န့ၣ်လီၤ. ပကဘၣ် ဃ့ၢ်ဒ်လဲၣ်. ခီဖျိ “ပှၤလၢအဒုးကဲထီၣ်, ဒီးမၤလၢထီၣ်ပှဲၤထီၣ်ပတၢ်နာ်, ယ့ၣ်ရှူးတဂၤန့ၣ်, မ်ပကွၢ်ဃီၤတၢ်ဆူအအိၣ်” ဒီးပကဘၣ်ဃ့ၢ်ဝဲဒၣ် ( ၁၂:၂) န့ၣ်လီၤ. ဒ်ပကွၢ်ဆိကမိၣ်ကစၢ်ခရံာ် တူၢ်သံအသးလၢပဂီၢ်, ဒီးဒ်သိးတၢ်ဘှံးသုသးသုတအိၣ်, ဒီးသုသုတလီၤဘှံးလီၤတီၤတဂ့ၤန့ၣ်တက့ၢ် (ဧ့ၤ ၁၂:၃).
တၢ်မၤကွၢ် ပတၢ်စူၢ်တၢ်နာ်တဖၣ်န့ၣ် ဒ်သိးပကတူၢ်ခီၣ်တၢ်, လၢတၢ်ပာ်သးစွံကတုၤ ကန့ၢ်ကသ့ဝဲလၢ ကစၢ်ခရံာ်အမံၤအဂီၢ်, ဟ့ၣ်ပှၤခွဲးဂ့ၤယာ်ဘၣ်န့ၣ်လီၤ. ပပာ်လီၤသး
စွံကတုၤ လၢကစၢ်ခရံာ်အစိအကမီၤအပူၤန့ၣ်လီၤ.