ဖဲယနုာ်လီၤဘှီထံပီၤအကျိၤ, ဒီးယခိၣ်အိၣ်ကတာ်အသးလၢ တၢ်သ့စုအလီၢ်အဖီလာ် အကတီၢ်န့ၣ်, ယစံးဘၣ်တဲဘၣ်ယဖိမုၣ်လၢ နတဘၣ်လဲၤဆူထံကမါဘၣ်န့ၣ်လီၤ. ယဖိမုၣ် မၤသ့ၣ်နီၣ်က့ၤယၤလၢ “ပါပၢ်ဧၢ, နအၢၣ်လီၤတ့ၢ်ယၤလၢ ယမၤဟံၣ်အတၢ်မၤတဖၣ် မ့ၢ်ဝံၤန့ၣ်ဒီး, ယလဲၤသ့တမ့ၢ်ဘၣ်ဧါ” န့ၣ်လီၤ. မ့ၢ်လၢယဘှီက့ၤတၢ်သ့စုအလီၢ် ထံပိၤအကျိၤ, ဒီးယတၢ်မၤအါအဃိ, ယသးပ့ၤနီၣ်ယတၢ်ကတိၤန့ၣ်လီၤ. ယတၢ်ဂ့ၢ်ကီတမံၤအံၤ မၤသးပ့ၤနီၣ် ယတၢ်အၢၣ်လီၤန့ၣ်လီၤ.

ဒ်ယဖိမုၣ် မၤသ့ၣ်နီၣ်ယၤအသိး, ပှၤကွဲးထါစံးထီၣ်ပတြၢၤတဂၤ မၤသ့ၣ်နီၣ် ကစၢ်ယွၤ, တၢ်လၢယွၤအၢၣ်လီၤတ့ၢ်တဖၣ်, ဒီးကွဲးပာ်ဖျါဝဲ “မ့ၢ်နဒုးမုၢ်လၢ်ယၤလၢတၢ်ဒီးသ့ၣ်နီၣ်ထီၣ်က့ၤနကလုၢ်ကထါလၢ နခ့နပှၤအဂီၢ်တက့ၢ်” (၁၁၉:၄၉) န့ၣ်လီၤ. ပပၢ်ယွၤ အိၣ်လၢမူခိၣ်တဂၤန့ၣ် တမ့ၢ်ပှၤလၢအသးဒံဝ့ၤဒံဝီၤ, ဒီးတမ့ၢ်ပှၤလၢသးပ့ၤနီၣ်တၢ်သ့တဂၤအဃိ, ပကဘၣ်စံးဘျုးယွၤန့ၣ်လီၤ. ပဟဲဆူ ကစၢ်ယွၤအအိၣ် သ့ဝဲဒၣ်န့ၣ် တမ့ၢ်ထဲလၢ ပဘၣ်နးဘၣ်ဖှီၣ်, ပဘၣ်ကီဘၣ်ခဲ, ဒီးပသးဟးဂီၤအကတီၢ်န့ၣ်ဘၣ်. မ့မ့ၢ် ပဟဲဆူ ယွၤအအိၣ်သ့ဝဲဒၣ် လၢတၢ်နာ်န့ၢ်လီၤသးအပူၤန့ၣ် တၢ်သ့ၣ်ညါယွၤ, ဒ်အမ့ၢ်ပၢ်လၢအဂ့ၤတဂၤအသိး, “အအံၤမ့ၢ်တၢ်လၢအမၤမုာ်ထီၣ်က့ၤယၤ လၢယဘၣ်နးဘၣ်ဖှီၣ်အဖၢမုၢ်န့ၣ်, လၢနကလုၢ်နကထါ မၤမူထီၣ်က့ၤလံယၤ” (:၅၀) န့ၣ်လီၤ.

ပကမၤသ့ၣ်နီၣ်ထီၣ်က့ၤ အတၢ်အၢၣ်လီၤတဖၣ်အဂီၢ်, ကစၢ်ယွၤ ကွဲမုာ်ပှၤ, ဒ်သိးဒီးပကကွၢ်ထံဆိကမိၣ်အကလုၢ်အကထါန့ၣ်လီၤ. တမ့ၢ်လၢ ယွၤ သးပ့ၤနီၣ်ပှၤအဃိဘၣ်. မ့မ့ၢ် ကစၢ်ယွၤအသးအိၣ်ဝဲဒၣ်လၢ ပကသ့ၣ်ညါအီၤဘူးဘူးတံၢ်တံၢ်အဃိန့ၣ်လီၤ. လၢတၢ်န့ၣ်အဃိ, ပှၤကွဲးထါ စံးဝဲဒၣ်လၢ, “ယွၤဧၢ, နစံၣ်ညီၣ်တၢ် လၢပျၢၤ လၢကစၢၤန့ၣ်ယသ့ၣ်နီၣ်ထီၣ်က့ၤ, ဒီးယမၤမုာ်ထီၣ်ယသး” (:၅၂), ဒီး “နတၢ်မၤလိာ်န့ၣ် မ့ၢ်ယတၢ်သးဝံၣ်လၢ ယအိၣ်တမှံၤအဟံၣ်ပူၤ” (:၅၄) န့ၣ်လီၤ.

မ့ၢ်လၢယသးဒံဝ့ၤဒံဝီၤဝဲလၢ တၢ်ဂ့ၢ်အဂၤအဃိ, အလီၣ်အိၣ်လၢ ယဖိမုၢ် ကဘၣ် မၤသ့ၣ်နီၣ်ထီၣ်က့ၤ ယတၢ်အၢၣ်လီၤန့ၣ်လီၤ. ဖဲယဖိမုၣ် မၤသ့ၣ်နီၣ်ထီၣ်ယၤန့ၣ်ဒီး, လၢတၢ်သးခုအပူၤ ယပျဲလဲၤအီၤဆူကမါန့ၣ်လီၤ. ပပၢ်ကစၢ်ယွၤအိၣ်လၢမူခိၣ်တဂၤ, အသးတဒံဝ့ၤဒံဝီၤဘၣ်, (မ့) အတၢ်ဖံးတၢ်မၤ တအါဝဲဒၣ်အဃိ, ပကဘၣ်စံးဘျုးတၢ်န့ၣ်လီၤ. ကစၢ်ယွၤ အဲၣ်ဒိးကနၢ်ဝဲဒၣ် ပဃ့ထုကဖၣ်ကဒါက့ၤ အတၢ်အၢၣ်လီၤတဖၣ်ဆူအအိၣ်န့ၣ်လီၤ.